ޤައުމީ ފެރީ ވިއުގަ މަޝްރޫއުއަށް ޖުލައި މަހު މުވައްޒަފުން ނަގަން ފެށޭނެ – އާޒިމް

ޤައުމީ ފެރީވިއުގަ ޤާއިމުކުރުމުގެ މަޝްރޫޢުގެ ދަށުން އަންނަ ޖުލައިމަހު މުވައްޒަފުން ނެގުމުގެ މަސައްކަތް ފަށާނެކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ. ޤައުމީ ފެރީ ވިއުގަ ޤާއިމްކުރުމުގެ މަސައްކަތް ހަވާލުކޮށްފައިވަނީ އެމްޓީސީސީއާއެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ ޤައުމީ ފެރީވިއުގަ ޤައިމުކުރުމުގެ މަޝްރޫޢުގެ ދަށުން އަންނަ ޖުލައިމަހު މުވައްޒަފުން ނެގުމުގެ މަސައްކަތް ފަށަން ނިންމާފައިވާކަމަށެވެ. އަދި މިކަމުގައި ރަށުގައި ތިބެގެން ވަޒީފާ އަދާކުރަންބޭނުންވާ ފަރާތްތަކަށް އިސްކަންދިނުމަށް ނިންމާފައިވާކަމަށް އާޒިމް ވިދާޅުވިއެވެ. އެހެން ގޮތަކަށް ދަންނަވާނަމަ ރަށު ފެރީއަށް ދިވެހިން ނެގުމުގެ ބިޔަ މަޝްރޫޢެކެވެ.

advertisement

ޤައުމީ ފެރީ ވިއުގައިގެ ސަބަބުން ޖުމްލަ 81 ވަޒީފާ ހަމައެކަނި މިއޮޕަރޭޝަނާގުޅިގެން އުފެދިފައިވާކަން އާޒިމް ފާހަގަކުރެއްވިއެވެ. މީގެ ތެރޭގައި 34 އޮޕަރޭޓަރުންނާއި 36 ކްރޫއިންނާއި 11 އެޑްމިން އޮފިސަރުން ނެގުމަށްވަނީ ހަމަޖެހިފައެވެ.

ރައްޔިތުންނަށް ރައްކާތެރި ޚިދުމަތެއް ފޯރުކޮށް ދިނުމަށްޓަކައި މިފަރާތްތަކަށް ޚާއްސަ ތަމްރީން ޕްރޮގްރާމްތަކެއް ހިންގުމަވެސް އެމްޓީސީސީންވަނީ ނިންމާފައެވެ. އެގޮތުން ރާއްޖޭގައި ހެދިފައިވާ ދަތުރުފަތުރާގުޅޭ ޤާނޫނުތަކާއި ޤަވާއިދުތަކަށް އަހުލުވެރިކުރުވައި މިފަދަ ޚިދުމަތެއް ދިނުމަށް ފަރިތަ ބަޔަކަށް މުވައްޒަފުން ހައްދަވާނެކަމަށް އާޒިމް ވިދާޅުވިއެވެ.

ރާއްޖޭގެ ޤައުމީ ފެރީ ވިއުގައިގެ ދަށުން މުޅި ރާއްޖެ ގުޅާލުމަށް ކުރާ މަސައްކަތް ފެށުމަށް ވާންޖެހޭ ތައްޔާރީތައް ވަމުން އަންނައިރު ޖުމްލަ 41 ރަށުގައި އެއްފަހަރާ މިމަސައްކަތް ކުރިއަށް ގެންދިޔުމަށް އެމްޓީސީސީގެ 9 ޓީމަކުން ޙަރަކާތްތެރިވަމުން އަންނާނެކަމަށް އެކުންފުނިން ވިދާޅުވެއެވެ. އަދި މިއީ ރައްޔިތުންނާއި ސަރުކާރުން އެދޭފަދަ ކާމިޔާބު ޕްރޮޖެކްޓަކަށް ހެދުމަށް އެކުންފުނިން އަންނަނީ މަސައްކަތްކުރަމުންނެވެ.

ހައި ސްޕީޑް ފެރީ ނިޒާމުގެ ތެރެއިން ޙިދުމަތުގައި އެމް.ޓީ.ސީ.ސީން ބޭނުންކުރުމަށް ނިންމާފައިވަނީ 40-50 ދެމެދުގެ މީހުންގެ ޖާގައިގެ 47 ފޫޓުގެ ލޯންޗެވެ. ކޮންމެ ޕަސިންޖަރަކަށްވެސް 20 ކިލޯގެ ކާގޯ އުފުލޭނެކަމަށްވެސް އެކުންފުނިން ހާމަކުރެއެވެ.