އުތުރު ތިލަފަޅު މައްސަލައިގެ ތެރެއަށް އެމްއެންޑީއެފް ވެއްދުމަކީ ހެދި ގޯހެއް – އާދަމް ޝަރީފް

ސަރުކާރުން ހެދި ގޯހެއް ކަމަށް ކުރީގެ ޑިފެންސް މިނިސްޓަރު އަދި މަޑުއްވަރީ ދާއިރާގެ މެމްބަރު އާދަމް ޝަރީފު އުމަރު ވިދާޅުވެއްޖެ އެވެ.

އާދަމް ޝަރީފު އުމަރު އެކަމާއި ގުޅިގެން ކުރެއްވި ޓްވީޓެއްގައި ވިދާޅުވީ، އެމްއެންޑީއެފްގެ އަގު ވެއްޓޭ ގޮތަށް ކޮރަޕްޝަންގެ އިނގިލި ދިއްކުރުމުން ކަންބޮޑުވާކަމަށެވެ. ޔޫޓީއެފް އެގްރީމެންޓުގެ މައްސަލައިގެ ތެރެއަށް އެމްއެންޑީއެފް ވެއްދުމަކީ ސަރުކާރުން ހެދި ގޯހެއްކަމަށާއި، މިފަދަ ކަންކަމުގެ ސަބަބުން އަސްކަރިއްޔާއަށް ކުރާ އިތުބާރާއި، އިހުތިރާމާއި ގަދަރު ކުޑަވާނެކަމަށާއި އެކަން މިދަނީ ފެންނަމުންކަމަށް އާދަމް ޝަރީފު ވިދާޅުވި އެވެ.

advertisement

އުތުރު ތިލަފަޅުގެ އެއްބަސްވުމުގެ މައްސަލައާ ގުޅިގެން ޑިފެންސް މިނިސްޓްރީއިން ވިދާޅުވެފައިވަނީ ރާއްޖޭގެ ގައުމީ ދިފާއީ ބާރަށް ރައްޔިތުންގެ ހިތްތަކުގައި އޮންނަ އިތުބާރާއި އިހްތިރާމާއި ގަދަރު ނަގާލަން ކުރާ މަސައްކަތަށް ފުރުސަތު ނުދޭނެކަމަށެވެ.

އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމަންޔަން ޖައިޝަންކަރު ރާއްޖެއަށް ކުރެއްވި ދަތުރުފުޅުގެ ތެރެއިން، އުތުރު ތިލަފަޅުގައި ކޯސްޓްގާޑުގެ ބަނދަރަކާއި ޑޮކްޔާޑެއް އެޅުމަށް ރާއްޖެއާ އެގައުމާ ދެމެދު ވަނީ އެއްބަސްވުމެއްގައި ސޮއިކޮށްފަ އެވެ.

އެ އެއްބަސްވުމުގެ ޑްރާފްޓް ކޮޕީއެއް ކަމަށް ބުނާ ލިޔުމެއް ކުރީގެ ހޯމް މިނިސްޓަރު އުމަރު ނަސީރު ވަނީ ލީކުކުރައްވައިފަ އެވެ. އަދި މައުލޫމާތު ލިބުނީ އެމްއެންޑީއެފްގެ އިސް ފަރާތްތަކުގެ ކިބައިން ކަމަށް ބައެއް ނޫސްތަކުގައި ރިޕޯޓުކޮށްފައިވެ އެވެ. އެކަމާ ގުޅިގެން އެމްއެންޑީއެފްގެ ޖެނެރަލުން ވަނީ ނޫސްވެރިންގެ ބައްދަލުވުމެއް ބާއްވައި، މި ބައްދަލުވުމުގައި އެމްއެންޑީއެފްއިން ވަނީ ލީކުކޮށްލައިގެން އުޅޭ ކޮޕީއަކީ އަސްލެއް ނެތް ކޮޕީއެއްކަމަށް ވިދާޅުވެ އެ ލިޔުން ދޮގުކޮށްފަ އެވެ.