އިނގިރޭސި ވިލާތުގައި ބޭއްވި އަސްކަރީ ތަމްރީނު ކޯހަކުން ދިވެއްސަކަށް 1 ވަނަ

އިނގިރޭސި ވިލާތުގައި ބޭއްވި އަސްކަރީ ތަމްރީނު ކޯހަކުން ދިވެހި ސިފައިންގެ އޮފިސަރަކު އެއްވަނަ ހޯދައިފިއެވެ.

އެމްއެންޑީއެފުން ވިދާޅުވީ އިނގިރޭސިވިލާތުގެ ރޯޔަލް މިލިޓަރީ އެކަޑަމީ ސޭންޑްހާސްޓްގައި ކުރިއަށް ގެންދިޔަ އޮފިސަރ ކެޑޭޓް ކޯހުގައި ބައިވެރިވި ސަރޖަންޓް ފިރުޝާނާ ތައުފީގު، ބެސްޓް އިންޓަރނޭޝަނަލް ދަރިވަރުގެ މަޤާމު ހޯދާފައިވާ ކަމަށެވެ. މިއީ ރާއްޖޭގެ އަންހެން އޮފިސަރަކު އެ ކޯހުގައި ބައިވެރިވި ފުރަތަމަ ފަހަރެވެ. އެއްވަނަ ހޯދާފައިވަނީ ގދ.ފަރެސްމާތޮޑާއަށް އުފަން ސަރޖަންޓް ފިރުޝާނާ ތައުފީގުއެވެ.

advertisement

ސާޖަންޓް ފިރުޝާނާގެ ކާމިޔާބު ފާހަގަކޮށް ގިނަ ބަޔަކު އަންނަނީ އޭނާއަށް މަރުހަބާ ކިޔަމުންނެވެ. އެގޮތުން ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހްވެސް ވަނީ އޭނާއަށް މަރުހަބާ ވިދާޅުވެފައެވެ. ރައީސްގެ ޓްވިޓުގައި ވިދާޅުވެފައިވަނީ ސާޖަންޓް ފިރުޝާނާގެ ހޯއްދެވި ކާމިޔާބީގެ ސަބަބުން މުޅި ޤައުމު ފަހުރުވެރިވާކަމަށެވެ.

ޑިފެންސް މިނިސްޓަރު އަލްއުސްތާޛާ މާރިޔާ އަޙުމަދު ދީދީ ކުރެއްވި ޓްވީޓެއްގައި ވިދާޅުވީ އެކިއެކި ސަރުކާރު ތަކުގައި ރާއްޖޭގެ އަންހެން ސިފައިންނަށް އެ މީހުންނަށް ޙައްގުވާ ފުރުސަތު ނުލިބި އޮތް ކަމީ ހިތާމައެއްކަމަށެވެ. އަދި ފިރުޝާނާއާ މެދު ފަޚުރުވެރިވެވަޑައިގަންނަވާ ކަމަށްވެސް މިނިސްޓަރ ވިދާޅުވިއެވެ.

ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލްވެސްވަނީ މިއީ އެމްއެންޑީއެފްއަށާއި ރާއްޖެއަށް ފަޚުރުވެރި ވަގުތުކޮޅެއްކަން ފާހަގަކުރައްވާފައެވެ. އަދި ފިރުޝާނާއަކީ ޝަރަފްވެރި ސޭންޑްހާސްޓްގައި ތަމްރީނުވުމުގެ ފުރުސަތު ލިބުނު ފުރަތަމަ އަންހެން އޮފިސަރުކަންވެސް އޭނާ ފާހަގަކުރެއްވިއެވެ.