ފ. ނިލަންދޫ އެއަރޕޯޓް މަސައްކަތް އޮތް ގޮތް މުޅިން ސާފެއް ނުވޭ – ރައީސް

ފ.އަތޮޅު ނިލަންދޫގައި އެއާޕޯޓެއް އެޅުމުގެ މަސައްކަތް އޮތް ގޮތެއް މުޅިއަކުން އަދި ސާފުނުވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ވިދާޅުވެއްޖެއެވެ.

ރައީސުލް ޖުމްހޫރިއްޔާ މިހެން ވިދާޅުވީ، ރައްވެހި ފަތިސް ކެމްޕެއިންގައި ވާހަކަދައްކަވަމުންނެވެ. ރައްވެހި ފަތިސް ކެމްޕެއިންގައި ފ.އަތޮޅު ނިލަންދޫގެ އެއާޕޯޓު ތަރައްޤީ ކުރުމުގެ މަސައްކަތް ކިހާތާކު ފެށޭނެތޯ ދެންނެވުމުން ރައީސް ޞާލިހު ވިދާޅުވީ އެ މަޝްރޫޢު އޮތް ގޮތެއް އަދި މުޅިއަކުން ސާފު ނުވާކަމަށެވެ. އެއާޕޯޓުގެ މަސައްކަތް މެލޭޝިޔާގެ ކުންފުންޏަކާއި އޭރުގެ ސަރުކާރުން ހަވާލު ކުރިނަމަވެސް އެކުންފުނީގެ ފަރާތުންވެސް އަދި ސަރުކާރުގައިވެސް މިކަމުގެ މާބޮޑު މައުލޫމާތެއް ނެތްކަމަށް ރައީސް ވިދާޅުވިއެވެ.

advertisement

ރައީސް ޔާމީންގެ ވެރިކަމުގައި ފ.އަތޮޅުގައި އެއަރޕޯޓެއް އެޅުމަށް 3 އަހަރެއްގެ މަތިން ވަނީ ބަޖެޓްކޮށްފައެވެ. ރާމީންގެ ވެރިކަމުގައި ނިލަންދޫ އެއަރޕޯޓްގެ މަސައްކަތް ކުރުމަށް ހަމަޖެހިފައިވަނީ އޯފިޑުން ރާއްޖެއަށް ދިން ލޯނު އެހީގެ ދަށުންނާއި، ދަޢުލަތުގެ ބަޖެޓުން ހަރަދުކޮށްގެންނެވެ.

މިސަރުކާރުން ވެރިކަމަށް އައުމަށްފަހުވެސް ނިލަންދޫގެ އެއާޕޯޓް މަޝްރޫއު ކުރިއަށް ގެންދިއުމަކީ އެރަށު ރައްޔިތުން ސަރުކާރުގައި އެދެމުންދިޔަ އެންމެ ބޮޑު އެދުމެވެ. މި ސަރުކާރުގެ އަމާޒަކީ މީހުން ދިރިއުޅޭ ކޮންމެ ރަށްރަށުން 30 މިނެޓުން އެއަރޕޯޓަށް ދެވޭނެ އިންތިޒާމް ހަމަޖެއްސުމެވެ. އެގޮތުން 4 ރަށެއްގައި އެއަރޕޯޓް އަޅައިދޭނެ ބަޔަކު ހޯދުމުގެ މަސައްކަތްވެސް ސަރުކާރުން މިހާރު އަންނަނީ ކުރަމުންނެވެ.