ބޭހާއި ކާޑު އެތެރެކުރަން އެސްޓީއޯއަށް 25 މިލިއަން ޑޮލަރުގެ ގެރެންޓީއެއް

ރާއްޖެއަށް ބޭނުންވާ ބޭހާއި ކާޑު އެތެރެ ކުރަން ސަރުކާރުން އެސްޓީއޯއަށް 25 މިލިއަން ޑޮލަރުގެ ގެރެންޓީއެއް ދީފި އެވެ.

ފިނޭންސް މިނިސްޓްރީން އާންމުކޮށްފައިވާ މައުލޫމާތުން އެނގޭ ގޮތުގައި މިދިޔަ ޖެނުއަރީ މަހު އެ ކުންފުނިން މި ލޯނު ނަގާފައިވަނީ ހޮންކޮންގް ޝަންހާއީ ބޭންކިން ކޯޕަރޭޝަންގެ މާލޭގެ ބްރާންޗުންނެވެ.

advertisement

މިދިޔަ އަހަރުގެ މެއި މަހުވެސް އެސްޓީއޯ އިން މެޑިކަލް އިކުއިޕްމެންޓާއި ބޭހާއި ކާބޯތަކެތި ގަތުމަށް ނެގި ލޯނަށް ސަރުކާރުން ސޮވެރިން ގެރެންޓީ ދިނެވެ. އެ ފަހަރު ސޮވެރިން ގެރެންޓީ ދިނީ އިންޓަނޭޝަނަލް އިސްލާމިކް ޓްރޭޑް ފައިނޭންސް ކޯޕަރޭޝަންއިން ނެގި 15 މިލިއަން ޑޮލަރުގެ ލޯނަކަށެވެ. އަދި އެސްޓީއޯ އިން ތެޔޮ ގަތުމަށް އައިޓީއެފްސީން ނެގި 150 މިލިއަން ޑޮލަރުގެ ލޯނަށް ވެސް މިދިޔަ އަހަރު ސަރުކާރުން ގެރެންޓީ ދިނެވެ.

މިދިޔަ އަހަރު ރާއްޖެ އަށް ކުރިމަތިވި ކޮވިޑްގެ ހާލަތުގައި ސަރުކާރުގެ ހަރަދުތައް ހަމަޖެއްސުމަށް ގިނަ އަދަދެއްގެ ލޯނު ނަގަން ޖެހުނެވެ. އެހެންވެ، ދައުލަތުގެ ދަރަނި މިހާރު ވަނީ 86 ބިލިއަން ރުފިޔާ ރުފިޔާ އަށް އަރައިފަ އެވެ.