ޚަބަރު

ބީއެމްއެލްގެ ނަމުގައި އޮޅުވާލައިގެން ގުޅާ ފަރާތްތަކަށް ސަމާލުވުމަށް އެދިއްޖެ

27 މާޗް 2021 - 14:43

ބޭންކުގެ ނަމުގައި އޮޅުވާލައިގެން ފައިސާ ހޯދުމަށް ކުރާ ކޯލްތަކަށް ސަމާލުވުމަށް ބީއެމްއެލްއިން އެދިއްޖެއެވެ.

ބޭންކް އޮފް މޯލްޑިވްސް، ބީއެމްއެލުން ވިދާޅުވީ މިހާރަކަށް އައިސް އެބޭންކުގެ ނަމުގައި އެކައުންޓާއި ކާޑުގެ މައުލޫމާތު ހޯދުމަށާއި ސިސްޓަމް މައްސަލައަކާ ގުޅިގެން އެކައުންޓުގައި ހުރި ފައިސާ އެހެން އެކައުންޓަކަށް ޖަމާކުރުމަށް އެދި މަކަރާއި ހީލަތުން ފައިސާ ހޯދުމަށް ކަސްޓަމަރުންނަށް ގުޅަމުންދާކަން ފާހަގަކުރެވިފައިވާކަމަށެވެ.

advertisement

ނަމަވެސް ބީއެމްއެލުން އެއްވެސް ކަސްޓަމަރެއްގެ ޒާތީ މައުލޫމާތު ހޯދަން ނުގުޅާނެ ވާހަކަ އެ ބޭންކުން ވަނީ ތަކުރާރުކޮށްފައެވެ. އަދި އެކައުންޓްގައި މައްސަލައެއް ދިމާވެގެން އެހެން އެކައުންޓަކަށް ފައިސާ ޖަމާކުރުމަށް ބޭންކުން އެއްވެސް ހާލަތެއްގައި ނޭދޭނެ ކަމަށާއި ބޭންކުން މޮބައިލް ނަންބަރު ބޭނުންކޮށްގެން ކަސްޓަމަރުންނަށް ނުގުޅާނެކަމަށްވެސް ބީއެމްއެލުން ހާމަކުރެއެވެ. އެހެންކަމުން އެންމެހާ ފަރާތްތަކުންވެސް އިތުރަށް ސަމާލުވެ، މިފަދަ ކޯލްތަކަށް ޖަވާބުދާރީނުވުމަށް ބީއެމްއެލުން އިލްތިމާސްކުރެއެވެ.

ބޭންކުން ކަމަށް ބުނެ އަންނަ މިފަދަ ކޯލްތަކާބެހޭ މައުލޫމާތު ބޭންކަށް ހުށަހެޅުއްވުމަށް ނުވަތަ ކާޑުގެ މައުލޫމާތު އެހެން ފަރާތަކަށް ހިއްސާކުރެވިފައިވާނަމަ ބޭންކުގެ ފޯން ނަންބަރު 3330200 އަށް ގުޅުއްވުމަށްވެސް ބީއެމްއެލުން ވަނީ އެދިފައެވެ. މީގެކުރިންވެސް ބީއެމްއެލްގެ ނަމުގައި އޮޅުވާލައިގެން ގުޅާ މިފަދަ ފަރާތްތަކަށް ސަމާލުވުމަށް އެތައް ފަހަރަކު އެ ބޭންކުން ކަސްޓަމަރުންނަށް ވަނީ އިލްތިމާސްކޮށްފައެވެ.

ރިއެކްޝަންސް
0
0
0
0
0
0
0