ދައުލަތުގެ މުވައްސަސާތަކަކީ ނުފޫޒުން އެއްކިބާވެފައިވާ ތަނަކަށް ހައްދަވާނެކަމުގެ ޔަޤީންކަން ރައީސް ދެއްވައިފި

ދައުލަތުގެ މުވައްސަސާތަކަކީ ނުފޫޒުން އެއްކިބާވެފައިވާ ތަނަކަށް ހައްދަވާނެކަމުގެ ޔަޤީންކަން ރައީސުލްޖުމްހޫރިއްޔާ ދެއްވާކަމަށް ރައީސުލްޖުމްހޫރިއްޔާގެ އޮފީހުން ވިދާޅުވެއްޖެއެވެ.

ރައީސް އޮފީހުން މިހެން ބުނެފައި މިވަނީ ވެންޓިލޭޓަރުތައް ރައްޖެގެނައުމުގައ ކޮރަޕްޝަން ހިންގާފައިވާކަމަށް ތުހުމަތުކުރެވޭ މައްސަލާގައި ދައުވާ ނުކުރުމަށް ޕީޖީ ނިންމެވި ނިންމެވުމާއި ގުޅިގެން ފާޑުކިއުންތައް އަމާޒުވެފައިވަނިކޮށެވެ. ރައީސް އޮފީހުން ވިދާޅުވީ، ދައުލަތުގެ މުއައްސަސާތަކުން ކުރާ އެންމެހާ މަސައްކަތްތައް އެއްވެސް ނުފޫޒެއް ނެތި މިނިވަންކަމާއި މުސްތަޤިއްލުކަމާއި އެކު ކުރިއަށް ގެންދިއުމަށް މަގުފަހިކޮށްދިނުމަށް ކުރަންޖެހޭ ކަންކަން ކުރައްވާނެކަމުގެ ޔަޤީންކަން ރައީސް ދެއްވާފައިވާކަމަށެވެ.

advertisement

ވެންޓިލޭޓަރުގެ މައްސަލައިގައި ސަރުކާރު ހިންގާ މައި ޕާޓީ އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވަނީ ޕްރޮސެކިއުޓާރ ޖެނރަލް ޙުސައިން ޝަމީމް މަޤާމުން އިސްތިއުފާ ދެއްވުމަށްވެސް ގޮވާލައްވާފައެވެ. އަދި ވައްކަންކުރާ ސަރުކާރަކާއެކު އެމްޑީޕީ އޮންނަން ނޭދޭކަމަށް ވިދާޅުވެ ނަޝީދު ވަނީ މިސަރުކަރަށް ފަޑުވިދާޅުވެފައެވެ.

ވެންޓިލޭޓަރުތަކުގެ މައްސަލައާއި ގުޅިގެން ރައީސް އޮފީހުން ނެރުނު ބަޔާނެއްގައި ވަނީ، ވެންޓިލޭޓަރުގެ މައްސަލައިގައި އެއްވެސް ފަރާތަކަށް ނާޖާއިޒް ފައިދާއެއް ލިބޭގޮތަށް ޢަމަލުކޮށްފައިވޭތޯ ބެލުމަށް ސަރުކާރުން އިސްވެ އެންޓި-ކޮރަޕްޝަން ކޮމިޝަނަށާއި، އަދި މޯލްޑިވްސް ޕޮލިސް ސަރވިސްއަށް އެ މައްސަލަ އަވަސް މައްސަލައެއްގެ ގޮތުގައި ތަޙްޤީޤު ކުރުމަށް އަންގާފަކަމަށެވެ.

އެގޮތުން، މި މައްސަލައާ ގުޅިގެން، ކޮރަޕްޝަންގެ ޢަމަލެއް ހިނގާފައިވޭތޯ ބެއްލެވީ، ޤާނޫނު އަސާސީއިން އެކަން މަތިކޮށްފައިވާ މުސްތަޤިއްލު ކޮމިޝަން، “އެންޓި-ކޮރަޕްޝަން ކޮމިޝަން” އިން ކަމަށާއި، އެ މުއައްސަސާއިން ކުރެއްވި ތަޙްޤީޤަށް ބޭނުންވި އެންމެހައި މަޢުލޫމާތުތަކާއި، ފުރިހަމަ އެއްބާރުލުން އެ ކޮމިޝަނަށް ސަރުކާރުން ވާނީ ދީފައިވާކަމަށް ރައީސް އޮފީހުގެ ބަޔާނުގައިވެއެވެ. އަދި އެ ތަޙްޤީޤް ހިނގަމުން ދިޔައިރު، ވީހާވެސް އިންސާފުވެރިކަމާއި އެކު މައްސަލަ ތަޙްޤީޤް ކުރުމަށް ފުރުޞަތު ދިނުމުގެ ގޮތުން އެ މައްސަލައިގައި ތުހުމަތު ކުރެވުނު ސަރުކާރުގެ އެންމެހައި މުވައްޒަފުން، ތަޙްޤީޤް ނިމެންދެން މަސައްކަތުން އެކަހެރި ކުރެވުނުކަމަށްވެސް ބުނެފައިވެއެވެ.