ސަލީމް މަޖިލީހުގައި ދެއްކެވި ވާހަކައަކީ ސިވިލްސާވަންޓުންނަށް ކުރި މަލާމާތެއް : ޓީޗާސް އެސޯސިއޭޝަން

ހޯރަފުށީ ދާއިރާގެ މެމްބަރު އަހުމަދު ސަލީމް މަޖިލީހުގައި ދެއްކެވި ވާހަތަކަކީ ދިވެހި ސިވިލްސާވަންޓުންނަށް ކުރެއްވި ވަރަށްބޮޑު މަލާމާތެއް ކަމުގައި ޓީޗާސް އެސޯސިއޭޝަނުން ބުނެފިއެވެ.

ހޯރަފުށީ ދާއިރާގެ މެމްބަރު އަޙްމަދު ސަލީމް ރައްޔިތުންގެ މަޖިލީހުގެ ޖަލްސާގައި ވިދާޅިވެފައިވަނީ ސިވިލް ސަރވަންޓުންނަކީ ވަޒީފާ ބަޔާނުގައި ސޮއި ކުރާ ހިސާބުން ކަށްވަޅަށް ދާންދެން އަނގަމަޑުން ލައިގެން ތިބެންޖެހޭނެ ބައެއް ކަމަށެވެ. ސަލީމް މިހެން ވިދާޅުވުމުން ޓީޗާސް އެސޯސިއޭޝަނުން ވަނީ މިކަން ކުއްވެރިކުރައްވާފައެވެ.

advertisement

ޓީޗާސް އެސޯސިއޭޝަނުން ބުނީ ރާއްޖޭގައި ޑިމޮކްރަސީ ފައްކާވަމުންދާ ދުވަސްވަރެއްގައި ޤާނޫނު އަސާސީން ރައްޔިތުންނަށް ލިބިދޭ ޙައްޤުތައް ކަށަވަރު ކޮށްދޭން އޮތް، ދައުލަތުގެ އެންމެ މުހިންމު އެއް ބާރަކީ، ރައްޔިތުންގެ މަޖިލިސް ކަމަށް ވީ ހިނދު، ރައްޔިތުންގެ ޙައްޤުތައް އުނިވާ ފަދަ ގޮތަކަށް، ޑިމޮކްރެޓިކް ޕާޓީއަކަށް ނިސްބަތްވެ ހުރެ، ރައްޔިތުންގެ މަޖިލީހާމެދު ސިވިލްސަރވަންޓުގެ ހިތުގައި ނުރަނގަޅު ތަޞައްވުރެއް އުފެދޭނެފަދަ ގޮތްގޮތަކަށް އަޙްމަދު ސަލީމް ވާހަކަ ދެއްކުމަކީ ވަރަށް ޒިންމާދާރުކަން ކުޑަ ފިނޑި ޢަމަލެއް ކަމަށެވެ. ސަލީމު ދެއްކި ވާހަކައަކީ އޭނާ ތަމްސީލްކުރާ ޕާޓީގެ އެންމެހައި މެމްބަރުންނަށާއި ހޯރަފުށީ ދާއިރާގެ އެންމެހައި ރައްޔިތުންނަށާއި ދިވެހި ސިވިލް ސަރވަންޓުންނަށް ކުރި މަލާމާތެއް ކަމަށް އެސޯސިއޭޝަނުން ބުނެފައިވެއެވެ.