ދުނިޔޭގެ އެންމެ ބޮޑު 3ޑީ ޕްރިންޓެޑް ކޮރަލް ރީފް ސަމާ އައިލެންޑް ރިސޯޓުގައި

ދުނިޔޭގެ އެންމެ ބޮޑު 3ޑީ ޕްރިންޓެޑް ކޮރަލް ރީފްގެ ލަގަބު ސަމާ އައިލެންޑް ރިސޯޓުގެ ފަޅުތެރޭ ހަދާފައިވާ އާޓިފިޝަލް ފަރަށް ލިބިއްޖެ އެވެ.

ސަމާ އައިލެންޑް ރިސޯޓުން ބުނީ އެ ރިސޯޓުގެ 3ޑީ ފަރު ދުނިޔޭގެ ފެންބަރުގައި ފާހަގަވެ، ބަލައިގަނެފައިވާކަމަށެވެ.

advertisement

ސަމާ އައިލެންޑް ރިސޯޓުގެ ފަޅުތެރޭގައި މުރަކަ އިންދުމުގެ މަސައްކަތް ފެށީ އޮސްޓްރޭލިއާގެ ރީފް ޑިޒައިން ލެބާއި ޑައިވާލޭންޑް މޯލްޑިވްސްއާ ގުޅިގެންނެވެ. މި މަޝްރޫއުގެ ދަށުން ރިސޯޓުގެ ފަޅުގައި މުރަކަ އުފެދިފައި ނެތް ސަރަހައްދުތަކުގައި މުރަކަ އިންދައި އާލާކުރިއެވެ.

މުރަކަ އިންދައި އާލާކުރުމަށްޓަކައި އޮސްޓްރޭލިއާގެ ރީފް ޑިޒައިން ލެބުން ވަނީ، ރާއްޖޭގައި އުފެދިފައި ހުންނަ ފަދަ ފަރުގެ ބައްޓަމަށް އޮނިގަނޑުތަކެއް ކޮމްޕިއުޓަރު ބޭނުންކޮށްގެން ފަރުމާކޮށްފައެވެ. އަދި ބޮޑު 3ޑީ ޕްރިންޓަރެއްގެ އެހީގައި މި އޮނިގަނޑުތައް ޕްރިންޓުކޮށް، އެ ރިސޯޓުގެ އެ ފަރުގައި ވަނީ އިންދައިފައެވެ.

ސަމަރ އައިލެންޑް ރިސޯޓުން ވަނީ ތިމާވެށި ހިމާޔަތްކޮށް ރައްކާތެރިކުރުމަށް ދޭ ސަމާލުކަން އިތުރު ކޮށްފައެވެ. އެގޮތުން ރިސޯޓުގައި ޕްލާސްޓިކް ކޮތަޅާއި ހޮޅި އަދި ފުޅި ފަދަ ސިންގަލް ޔޫސް ޕްލާސްޓިކް ބޭނުން ކުރުން ވަނީ ހުއްޓާލާފައެވެ.