ސިނޯފާމް ވެކްސިންގެ ދެވަނަ ޝިޕްމަންޓް ރާއްޖެ ގެނެސްފި

ޗައިނާ ސަރުކާރުން ދިވެހިރާއްޖެއަށް ހަދިޔާކުރި ސިނޯފާމް ވެކްސިންގެ ދެވަނަ ޝިޕްމަންޓް ރާއްޖެ ގެނެސްފިއެވެ.

ޗައިނާއިން ވަނީ ސިނޯފާމް ވެކްސިންގެ 200000 ޑޯޒް ރާއްޖެއަށް ހަދިޔާކޮށްފައެވެ. ވެކްސިންގެ ފުރަތަމަ ޝިޕްމަންޓް ރާއްޖެއަށް ގެނެސްފައިވަނީ މަރޗް 24 ވަނަ ދުވަހުއެވެ. އެ ޝިޕްމަންޓުގައި އެއް ލައްކަ ވެކްސިން ޑޯޒް ގެނެސްފައެވެ.

advertisement

ދެވަނަ ޝިޕްމަންޓް ރޭގެ ވަގުތެއްގައި ރާއްޖެ ގެނެސްފައިވާއިރު، އެ ޝިޕްމަންޓުގައިވެސް 1 ލައްކަ ވެކްސިން ޑޯޒް ގެނެސްފައިވެއެވެ. މި ވެކްސިން ޗައިނާގެ ބެއިޖިންއިން ރާއްޖެއަށް ގެނެސްފައިވަނީ ޤައުމީ އެއަރލައިން މޯލްޑިވިއަންގެ ފްލައިޓެއްގައެވެ.

ރާއްޖޭގެ ފުޑް އެންޑް ޑްރަގް އޮތޯރިޓީން މިހާތަނަށް ވަނީ، ކޯވިޑް19އިން ދިފާޢުވުމަށް ޖަހާ 3 ވެކްސިނެއް ރާއްޖޭގައި ދިނުމުގެ ހުއްދަ ދީފައެވެ. އެއީ އޮކްސްފޯޑާ އެސްޓްރަޒެނެކާގެ ކޮވިޝީލްޑް ވެކްސިނާ، ޗައިނާގެ ސިނޯފާމް އަދި ޖަރުމަނުވިލާތުގެ ބަޔޯއެން ޓެކްގެ ފައިޒާ ވެކްސިންއެވެ. މީގެތެރެއިން މިހާތަނަށް ދޭން ފަށާފައިވަނީ ކޮވިޝީލްޑާ، ސިނޯފާމްއެވެ.

ކޮވިޝީލްޑް ވެކްސިން ދޭންފެށީ ފެބްރުއަރީމަހުގެ 1 ވަނަ ދުވަހުއެވެ. އަދި ސިނޯފާމް ވެކްސިން ދޭން ފަށާފައިވަނީ މަރޗް 22 ވަނަ ދުވަހުއެވެ. ސިނޯފާމް ވެކްސިން މިހާތަނަށް ދޭން ފަށާފައިވަނީ މާލެ ސަރަޙައްދުގައި އެކަންޏެވެ. ސިނޯފާމް ވެކްސިން ފުރިހަމަކުރެވޭނީ ދެ ޑޯޒް ޖެހުމުންނެވެ. ދެވަނަ ޑޯޒް ދޭނީ ފުރަތަމަ ޑޯޒް ޖަހާތާ 4 ހަފްތާ ފަހުންނެވެ.