ގްރެޖުއޭޝަންގައި ބެލެނިވެރިންނަށް ބައިވެރިނުވެވޭތީ ކަންބޮޑުވުން ފާޅުކޮށްފި

ގުރޭޑް 10 އަދި 12 ނިންމާ ދަރިވަރުންގެ ގްރެޖްއޭޝަންގައި ބެލެނިވެރިންނަށް ބައިވެރި ނުވޭވޭތީ ބެލެނިވެރިން ކަންބޮޑުވުން ފާޅުކޮށްފި އެވެ.

މިދިޔަ މަހުގެ 30 ވަނަ ދުވަހު އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ފާތިމަތު ނަސީރު ސޮއިކުރައްވާ ސުކޫލުތަކަށް ފޮނުވާފައިވާ އެންގުމެއްގައި ބުނެފައިވަނީ ގުރޭޑް 10 އަދި 12 ނިންމާ ދަރިވަރުންނަށް ގްރެޖްއޭޝަން ހަފްލާ އެޗްޕީއޭގެ މިންގަނޑުތަކާއި އެއްގޮތަށް ކުރިއަށް ގެންދެވިދާނެކަމަށެވެ. ނަމަވެސް ހަފްލާގައި ބައިވެރިވެވޭނީ ދަރިވަރުންނާއި ސުކޫލުގެ މުވައްޒިފުންނަށް އެކަނި ކަމަށް މިނިސްޓްރީން ވަނީ ބުނެފައެވެ.

އެޑިއުކޭޝަންގެ މި އެންގުމާއެކު ބެލެނިވެރިން ވަނީ މިކަމުގައި އެމީހުންގެ ކަންބޮޑުވުންތައް ފާޅުކޮށްފައެވެ. ބައެއް ބެލެނިވެރިން ބުނެފައިވަނީ ގްރެޖުއޭޝަން ހަފްލާއަކީ ދަރިވަރުންނަށް އަންނަ އެންމެ މުހިންމު ހަފްލާކަމަށާއި، މިކަމުގައި ބެލެނިވެރިންނަށް ބައިވެރިނުވެވުމަކީ ވަރަށް ބޮޑު ކަންބޮޑުވުމެއްކަމަށެވެ. މިކަމުގެ ކަންބޮޑުވުން ފާޅުކޮށް އަނެއްބައި ބެލެނިވެރިން ބުނެފައިވަނީ އެޗްޕީއޭގެ މިންގަނޑުތެރޭ ހުރިހާ ކަމެއް ކުރެވޭއިރު ގްރެޖްއޭޝަން ހަފްލާ އެ މިންގަނޑުތެރޭ ނުބޭއްވެންވީ ސަބަބެއް ނޭންގޭ ކަމަށެވެ.
ކޮވިޑްގެ ބަލިމަޑުކަމާއި ގުޅިގެން ރައްކާތެރިކަމަށްޓަކައި އަޅާފައިވާ ގިނަ ފިޔަވަޅުތަކަށް އެޗްޕީއޭއިން ވަނީ ލުއި ދީފައެވެ. އެގޮތުން އަންނަ އާދިއްތަ ދުވަހުން ފެށިގެން ސުކޫލަށް ހާޒިރުވެ ކިޔަވައިދޭން ވަނީ އަންގާފައެވެ. އާދިއްތައިން ފެށިގެން އެލްކޭޖީ އިން މަތީ ގުރޭޑްތަކުގެ ދަރިވަރުން ސުކޫލަށް ހާޒިރުވާނެއެވެ.

advertisement