އެޗްޑީސީއަށް 20 އަހަރު، ދިގު މުއްދަތަކަށް ޚިދުމަތްކުރި މުވައްޒަފުންގެ އަގު ވަޒަންކޮށްފި

ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އަށް 20 އަހަރު ފުރުން ފާހަގަކޮށްފިއެވެ. އެޗްޑީސީގެ އަހަރީ ދުވަހަކީ 1 އޭޕްރިލް އެވެ.

އެ ކުންފުންޏަށް 20 އަހަރު ފުރުން ފާހަގަކޮށްފައިވަނީ ވާޗުއަލްކޮށް ބޭއްވި ރަސްމިއްޔާތެއްގައެވެ. މި ރަސްމިއްޔާތުގައި ވާހަކަދައްކަވަމުން ކުންފުނީގެ މެނޭޖިން ޑިރެކްޓަރު ސުހައިލް އަހުމަދު ވަނީ ހިދުމަތުގައި 20 އަހަރު ހޭދަކޮށްފައިވާ ބޭފުޅުންގެ އަގުވަޒަންކުރައްވައި އެބޭފުޅުންނަށް ޝުކުރު ދަންނަވައިފައެވެ. އަދި އެންމެ ހަތަރު މުވައްޒަފުންނާއެކު ފެށި އެޗްޑީސީގައި މިހާރު ތިބި 1000 އަށްވުރެ ގިނަ މުވައްޒަފުން މަސައްކަތުގެ އަގުވަޒަންކޮށް ސުހައިލް ވަނީ އެ މުވައްޒަފުންނަށް ހިތްވަރުދެއްވައިފައެވެ.

advertisement

އެޗްޑީސީއަށް 20 އަހަރު ފުރުމަށް ބޭއްވި ރަސްމިއްޔާތުގައި އެ ކުންފުނީގެ ހުރިހާ މުވައްޒަފުން ވަނީ ބައިވެރިވެފައެވެ. އަދި ކުންފުނީގައި ފެށުނީންސުރެ ހިދުމަތްކޮށްދީފައިވާ މުވައްޒަފުންގެ އަގުވަޒަންކޮށް ވަނީ ހާއްސަ ހަނދާނީ ފިލައެއް ދީފައެވެ. މި ހަނދާނީ ފިލާ ޖުމްލަ 9 މުވައްޒަފަކަށް ވަނީ ދީފައެވެ.

މީގެ އިތުރުން އެ ކުންފުނީގެ 20 އަހަރުގެ ތާރީހުގައި އެކި ގޮތްގޮތުން ހިދުމަތް ކުރައްވާފައިވާ ހަތަރު ބޭފުޅަކަށް ވަނީ ސްޕެޝަލް ރެކޮގްނިޒިޝަން އެވޯޑެއް ދީފައެވެ. އޭގެ ތެރޭގައި އެޗްޑީޔޫގެ ނަމުގައި އެ ކޯޕަރޭޝަންގެ މަސައްކަތްތައް ހިންގަމުން ދިޔަ ދުވަސްތަކުގައި ޑިރެކްޓާ ޖެނެރަލްގެ މަގާމު އަދާކުރެއްވި މައުރޫފް ޖަމީލް، އެޗްޑީސީގެ ފުރަތަމަ މެނޭޖިން ޑިރެކްޓަރު ކަމުގެ މަގާމު އަދާކުރެއްވި މަހްޖޫބް ޝުޖާއު، އެޗްޑީސީގެ ޑެޕިއުޓީ ޑިރެކްޓަރެއްގެ މަގާމުގައި ހުންނެވި ފަޔާޒް މަންސޫރާއި އެ ކުންފުނީގެ މެނޭޖިން ޑިރެކްޓަރުގެ މަގާމު އަދާކުރައްވަމުންގެންދަވާ ސުހައިލް އަހްމަދު ހިމެނިވަޑައިގަންނަވައެވެ.
މި ރަސްމިއްޔާތުގައި ދުވަހުގެ މުނާސަބާތުގައި ބޭނުންކުރާނެ ހާއްސަ ލޯގޯއެއް ވަނީ އިފްތިތާހުކޮށްފައެވެ.

އެޗްޑީސީއަކީ ހުޅުމާލޭގެ ތަރައްޤީއަށް މަސައްކަތްކުރުމަށް އުފެދިގެންއައި ކުންފުންޏެކެވެ. މިކުންފުންޏަށް 20 އަހަރު ފުރިފައިވާއިރު، އެޗްޑީސީ އަކީ ހުޅުމާލޭގެ ތަރައްޤީކުރުމަށް، އޭރު ރައީސުލްޖުމްހޫރިއްޔާގެ ޤަރާރަކުން އުފެދި ކުންފުންޏެކެވެ.