ކުޑަކުދިން މަރުކަޒުތަކުގައި ހިނގަމުންދާ ކަންތައްތަކާމެދު އާކްއިން ކަންބޮޑުވުން ފާޅުކޮށްފި

ދަޢުލަތުގެ ބެލުމުގެ ދަށުގައި ވިލިންގިލީގައި ކުޑަކުދިން ދިރިއުޅެމުންދާ ކުޑަކުދިންގެ ހިޔާގައި ހިނގަމުންދާ ކަންތައްތަކާއި ގުރައިދޫގައި ޚާއްޞަ އެހީއަށް ބޭނުންވާ މީހުން ދިރިއުޅެމުންދާ މަރުކަޒުގެ ހާލަތާމެދު “އެޑްވޮކޭޓިން ދަ ރައިޓްސް އޮފް ޗިލްޑްރަން” އިން ކަންބޮޑުވުން ފާޅުކޮށްފިއެވެ.

މިފަހުން ކުޑަކުދިންގެ ހިޔާގައި ހިނގާދިޔަ ހާދިސާތަކަކީ އެތައް ދުވަހެއް ވަންދެން ޙައްލުނުކުރެވި ހުރި މައްސަލަތަކެއްގެ ނަތީޖާއެވެ. މިގޮތުން ހިޔާގައި ހުރި މައްސަލަތަކުގެ ތެރޭގައި މެނޭޖްމަންޓަށް އެކަށީގެންވާވަރަށް ކުޑަކުދިންގެ ހިޔާ ނުބެލެހެއްޓުމާއި، ކުދިންނަށް ބޭނުންވާ އެކިކަހަލަ ކަންކަން ފުރިހަމަކޮށްނުދެވުމާއި އަދި ކޮވިޑް 19 އާ ގުޅިގެން ކުރިމަތިވި ގޮންޖެހުންތައް ހިމެނެއެވެ. ހިޔާގައި ހުރި މިފަދަ މައްސަލަތައް މި ޖަމިއްޔާއިން ވަނީ ސަރުކާރުގެ ކަމާބެހޭ އިދާރާތަކާއި މިނިވަން މުއައްސަސާތަކުގެ ސަމާލުކަމަށް އެކިފަހަރުމަތިން 2020 ވަނަ އަހަރުގެ ތެރޭގައިވެސް ގެނެސްފައެވެ.

advertisement

ކުޑަކުދިންގެ ހިޔާގެ މައްސަލަތައް ބައެއް މީޑިއާތަކުގައި ރިޕޯޓްކޮށްފައިވާ ގޮތަށް ބަލާއިރު ކުޑަކުދިންގެ ހިޔާ މިހާލަތަށް ވެއްޓުނު އަސްލު ސަބަބު ކަމުގައިވާ ދަޢުލަތުގެ އިދާރާތަކަށް އެކުދިންނަށް ރައްކާތެރިކަން ފޯރުކޮށްނުދެވުމާއި، މުއައްސަސާތަކާއި ކުޑަކުދިންގެ ހިޔާގެ މެނޭޖްމަންޓްގެ އިޙްމާލު ފާހަގަކުރުމުގެ ބަދަލުގައި ކުދިން ބަދުނާމުވާގޮތަށް މީޑިއާގައި އެކުދިންގެ ވާހަކަތައް ރިޕޯޓްކޮށްފައިވާތީ އެ ޖަމިއްޔާއިން ހިތާމަކޮށް ކަންބޮޑުވުން ފާޅުކުރެއެވެ.

މިގޮތުން ހިޔާގައި ދިރިއުޅޭ ގިނަ ކުދިންނަކީ ކުށްކުރާ ކުދިންކަމަށް ދައުލަތުގެ ޒިންމާދާރު މަޤާމުތަކުގައި ތިއްބަވާ ބައެއް ފަރާތްތަކާއި މީޑިއާގެ އެކި ފަރާތްތަކުން ބަޔާންކުރަމުން ގެންދިއުމަކީ އާރކްއިން އެކަމާ ނުހަނު ކަންބޮޑުވާކަމެކެވެ. ކުޑަކުދިންގެ ހިޔާގައި ދިރިއުޅޭ ގިނަ ކުދިންނަކީ އަޅާލުންތެރިކަމެއް ނުލިބި، ބޮޑެތި އަނިޔާތަކުގެ ޝިކާރައަކަށް ވެފައިވުމުގެ ސަބަބުން ނުވަތަ އެ ކުދިންނާމެދު ވެފައިވާ އިހުމާލެއްގެ ސަބަބުން ނުވަތަ ނަހަމަގޮތުގައި އެކުދިންގެ ބޭނުން ކޮށްފައިވާތީ، އެކުދިންނަށް ބޭނުންވާ އަޅާލުމާއި ރައްކާތެރިކަން ފޯރުކޮށްދިނުމުގެ މަގުސަދުގައި ދައުލަތުގެ ބެލުމުގެ ދަށަށް ގެނެސްފައިވާ ކުދިންނެވެ.

މިހެންކަމުން މި ކުދިންގެ ފަރާތުން ބައެއް ފަހަރު ފެންނަ އަޚުލާޤީ މައްސަލަތަކަކީ މާޒީގައި އެ ކުދިން ތަޙައްމަލުކޮށްފައިވާ އަނިޔާތަކާއި، މިހާރުވެސް އެކަމުގެ ސަބަބުން ތަހައްމަލުކުރަމުންދާ ވޭނާއި ހިތާމައިގެ ސަބަބުން އެ ކުދިންގެ އުޅުމަށް ކޮށްފައިވާ އަސަރުތަކެއްގެ ނަތީޖާކަން ދެނގަނެ، އެ ކުދިންނަށް ބޭނުންވާ ފަރުވާ ނުވަތަ އިންޓަވެންޝަންތައް ބިނާކުރަންވާނީ ކައުންސެލިންގއާއި، ފަންނީ މާހިރުންގެ އެހީތެރިކަމާއި، އަދި އެނޫންވެސް ރައްކާތެރިކަމާގުޅޭ އެންމެހައި ޚިދުމަތްތައް ފޯރުކޮށްދިނުމުގެ ނަޒަރަކުންކަމުގައި އެ ޖަމިއްޔާއިން ފާހަގަކުރެއެވެ.

މީގެ އިތުރުން، ހިޔާގައި ދިރިއުޅޭ ކުދިންގެ ތެރެއިން، ސްކޫލަށް ނުދާ ކުދިން އަނބުރާ ސްކޫލަށް ފޮނުވުމަށް އެކަށީގެންވާ މަސައްކަތެއް ކޮށްފައިނުވާކަމުގެ ރިޕޯޓްތަކާއި، މީގެ ސަބަބުން އެކަށީގެންވާ ތަޢުލީމީ ފުރުޞަތުތަކުން އެކުދިން މަޙްރޫމްވަމުންދާކަމާއި، އެކުދިންގެ މުސްތަޤުބަލާމެދު ބޮޑެތި ނިންމުންތައް ނިންމާއިރު އެކުދިންނާ އެކަށީގެންވާ މަޝްވަރާއެއް ނުކުރާކަންވެސް ފާހަގަކުރެވެއެވެ.

އަދި އަނިޔާ އާއި އިހުމާލުގެ ސަބަބުން ދަޢުލަތުގެ ބެލުމުގެ ދަށަށް ނެގޭ ކުދިން، ވަގުތީގޮތުން ރަށްރަށުގެ އެފް.ސީ.އެސް.ސީ ތަކުގައި ބައިތިއްބާކަމާއި، އަދި މިފަދަ ކުދިންނަށް އާއިލާގެ އެހެން ފަރާތަކާއެކު ދިރިއުޅެވޭނެ ގޮތެއް ހަމަޖެއްސުމުގެ މަސައްކަތްކުރަމުންދާތީ ކަމަށްބުނެ، އެ ރަށުގެ ސްކޫލުގައި ރަޖިސްޓްރީ ނުކޮށް ސްކޫލަށް ނުފޮނުވާ ބައިތިއްވާކަންވެސް މި ޖަމިއްޔާއަށް ވަނީ ފާހަގަކުރެވިފައެވެ. އަދި މިފަދަ ބައެއް ކުދިންގެ ތަޢުލީމަށް ބުރޫއަރާ އެހެނިހެން ޙައްޤުތަކެއް ނުލިބި އެތައް މަހެއް ވަންދެން އެފް.ސީ.އެސް.ސީ ތަކުގައި ބައިތިއްބާކަންވެސް ވަނީ ފާހަގަކުރެވިފައެވެ.

ދާދި ފަހުން ދައުލަތުން ފަށާފައިވާ މަސައްކަތްތަކުގެ ތެރޭގައި، ކުޑަކުދިންގެ ހިޔާގެ ބައެއް ކުދިން ރަށްރަށުގެ އަމާން ހިޔާތަކަށް ބަދަލުކުރުމުގެ މަސައްކަތަކީ ރަނގަޅު ފިޔަވަޅެއް ކަމުގައި ދެކޭހިނދު، މި މަސައްކަތް ކުރިއަށް ގެންގޮސްފައިވާނީ އެންމެ އެކަށީގެންވާގޮތަށް ނޫންކަންވެސް ފާހަގަކުރެވެއެވެ. މިގޮތުން މިކުދިން ބަދަލުކުރާއިރު ކުދިންނަށާއި މުވައްޒަފުންނާއި، އެ ރަށެއްގެ ރައްޔިތުންވެސް ތައްޔާރުވާނެ ފުރުޞަތުނުދީ ކުދިން ބަދަލުކުރާކަމާއި، ކުދިންނަށް ބޭނުންވާ އެކިކަހަލަ ސްޕެޝަލިސްޓް ޚިދުމަތްތައް ލިބޭނެ އިންތިޒާމް ހަމަޖެހިފައިނުވާކަންވެސް ހިތާމައާއެކު ފާހަގަކުރެވެއެވެ. މިހެންކަމުން މިގޮތަށް ބަދަލުކުރި ބައެއް ކުދިން އެއް ރަށުން އަނެއް ރަށަށް ބަދަލުކުރަމުންދާތީ، އެއީ އެކުދިންގެ މަސްލަޙަތަށް އެންމެ އެކަށީގެންވާ ގޮތްނޫންކަންވެސް ހިތާމަޔާއެކު ފާހަގަކުރަމެވެ.

މީގެ އިތުރުން ބައެއް ކުޑަކުދިން ދިރިއުޅެމުންދާ ޚާއްޞަ އެހީއަށް ބޭނުންވާ މީހުންގެ މަރުކަޒުގެ ހާލަތާމެދުވެސް މި ޖަމިއްޔާއިން ނިހާޔަތަށް ކަންބޮޑުވެއެވެ. އަދި ގުރައިދާ މަރުކަޒުގައި ތިބި ކުދިންނަށް ބޭނުންވާ ސިއްޚީ ފަރުވާއާއި އެހެނިހެން ޚިދުމަތްތައް ފޯރުކޮށްދިނުމަށް ސަރުކާރަށް އެ ޖަމިއްޔާއިން ގޮވާލައެވެ.

އާކުން ވަނީ 2010 ވަނަ އަހަރުން ފެށިގެން ދައުލަތުގެ ބެލުމުގެ ދަށުގައި ދިރިއުޅެމުންދާ ކުދިންނަށާއި މުވައްޒަފުންނަށް ޚާއްޞަކޮށްގެން އެކި ޕްރޮގްރާމްތައް ހިންގަމުންނެވެ. އެހެންނަމަވެސް ކޮވިޑް 19 އާގުޅިގެން މާރޗް 2020 ގައި ލޮކްޑައުން ކުރިފަހުން މިފަދަ އެއްވެސް ޕްރޮގްރާމެއް ހިންގުމުގެ ފުރުޞަތު އާކަށް ލިބިފައެއް ނުވެއެވެ.

މި ޖަމިއްޔާއިން ޤަބޫލުކުރާ ގޮތުގައި، ދަޢުލަތުގެ ބެލުމުގެ ދަށުގައިވާ ކުދިންގެ ސަލާމަތާއި ރައްކާތެރިކަން ފުރިހަމަޔަށް ފޯރުކޮށްދީ، އެކުދިންގެ ޙައްޤުތައް ހިމާޔަތްކޮށްދިނުމަކީ ދައުލަތުގެ މުހިންމު ޒިންމާއެކެވެ. އަދި ހިޔާގައި މި ހިނގަމުންދާ ޙާދިސާތައް މި ޖަމިއްޔާއިން ހަރުކަށި އިބާރާތުން ކުށްވެރި ކުރަމެވެ. ދައުލަތުގެ ބެލުމުގެ ދަށުގައިވާ ކުދިންނަކީ އަނިޔާއާއި އިޙްމާލުގެ ޝިކާރައަކަށްވެފައިވާ ކުދިންކަން ފާހަގަކޮށް، އެކުދިންގެ އިޙްސާސުތަކަށް އިހްތިރާމްކުރުމަށް މީޑިޔާއާއި ހުރިހާ މުއައްސަސާތައް އަދި މުޖްތަމައުގެ އެންމެހާ ފަރާތްތަކަށް އާރކްއިން އިލްތިމާސްކުރެއެވެ.