ސަރުކާރުގެ އަމާޒަކީ ކުންފުނިތައް ގިނަކުރުމެއް ނޫން – މިނިސްޓަރ އަމީރު

ސަރުކާރުގެ އަމާޒަކީ ކުންފުނިތައް ގިނަކޮށް، އަދަދު އިތުރު ކުރުން ނޫން ކަމަށް ފިނޭންސް މިނިސްޓަރު އިބްރާހިމް އަމީރް ވިދާޅުވެއްޖެ އެވެ.

މިނިސްޓަރު އަމީރު މިހެން ވިދާޅުވީ ދިވެހި އިގްތިސޯދަށް ފައިދާ ކުރަނިވި ކުންފުނި ތަކެއް ބިނާކުރުމުގެ މަގުސަދުގައި ޕްރައިވަޓައިޒޭޝަން އެންޑް ކޯޕަރޭޓް ބޯޑުން މިއަދު ބޭއްވި ޖޮބް ކްލެސިފިކޭޝަން ފްރޭމްވޯކް އިފްތިތާހު ކުރުމުގެ ރަސްމިއްޔާތުގައި ވާހަކަދައްކަވަމުންނެވެ.

advertisement

މިނިސްޓަރ އަމީރު ވިދާޅުވީ، ސަރުކާރުގެ އަމާޒަކީ ރަނގަޅު ހިދުމަތެއް ދޭ އުފެއްދުންތެރި އަދި ދެމެހެއްޓެނިވި އުސޫލުން ކުރިޔަށް ދާ ކުންފުނި ތަކެއް ގާއިމް ކުރުންކަމަށެވެ. މި ބަދަލުތަކާއެކު ކުރިމަގުގައި ކުންފުނިތަކުގައި މަސައްކަތް ކުރާ މުވައްޒަފުން ވެގެންދާނީ އެންމެ ގާބިލް، ކަމަށް ފަރުވާތެރި، އުފެއްދުންތެރި، ނަތީޖާ ނެރޭ ބަޔަކަށްކަންވެސް މިނިސްޓަރ އަމީރު ފާހަގަކުރެއްވިއެވެ.

މިނިސްޓަރު ވިދާޅުވީ ކުންފުނިތަކަކީ ދައުލަތެއް ހިންގުމަށް ބޭނުންވާ އެންމެ މުހިއްމު އެއް ތަނބު ކަމަށެވެ. ދައުލަތެއްގެ ކުރިއެރުމަށް ކޮރަޕްޝަން ހުއްޓުވުމުގެ މުހިއްކަން ފާހަގަކުރައްވާ އަމީރް ވިދާޅުވީ މިއަދު އިފްތިތާހު ކުރި ފްރޭމްވޯކަކީ ކޮރަޕްޝަން ހުއްޓުވުމަށް މުހިއްމު ދައުރެއް އަދާކުރާނެ އެއްޗެއް ކަމަށެވެ.

މިނިސްޓަރ ވިދާޅުވީ އުފެއްދުންތެރިކަމެއް ނެތް އަދި ދައުލަތަށް ގެއްލުންވަމުން އަންނަ ކޮރަޕްޝަނަށް މަގުފަހިވާ ކުންފުނިތައް އުވާލުމަށް ކުރިއަށްގެންދާ މަސައްކަތުގެ ދަށުން މިހާރުވެސް 17 ކުންފުންޏެއް އުވާލުމުގެ މަސައްކަތް ކުރަމުން އަންނަކަމަށެވެ.

މިނިސްޓަރ ވިދާޅުވީ އަލަށް އެކުލަވާލެވުނު ޕްރޮކިއުމަންޓްގެ ގައިޑްލައިންގެ ސަބަބުން ސަރުކާރުގެ ހުރިހާ ކުންފުނިތަކުންވެސް އެންމެ ކުޑަމިންވަރަށް ޢަމަލުކުރަންޖެހޭ ޕްރޮކިއުމަންޓް އުސޫލުތައް ގައިމުކޮށް ކޮރަޕްޝަނަށް މަގުފަހިވާގޮތަށް ހުރި ދޮރުތައް ބަންދުވެގެންދާނެކަމަށެވެ.

ކުންފުނިތަކުން މިހާރު އަމަލުކުރަމުން އަންނަނީ އެ ކުންފުންޏެއްގެ އަމިއްލަ ޕްރޮކިއުމެންޓް ގައިޑްލައިން ތަކަށެވެ. އެހެންކަމުން ކޮންމެ ކުންފުންޏަކުން ވެސް އަމަލުކުރަމުން އަންނަ އުސޫލުތައް ވަރަށް ބޮޑަށް ތަފާތެވެ. މިކަމުގެ ނަތީޖާއެއްގެ ގޮތުން ކޮރަޕްޝަނަށް ވަރަށް ބޮޑަށް މަގުފަހިވާ ކަމަށްވެސް ވިދާޅުވި އެވެ.

ރާއްޖޭގައި ސަރުކާރު ހިއްސާވާ 30 އަށް ވުރެ ގިނަ ކުންފުނި އެބައޮތެވެ. އަދި މި ސަރުކާރު އައި ފަހުން ހަ ކުންފުންޏެއް އަލަށް އުފައްދާފައިވެ އެވެ.