ސީ.އޭ މޯލްޑިވްސްގެ ކުރިއަށްއޮތް 2 އަހަރުގެ ސްޓްރެޓެޖިކް ޕްލޭން އިފްތިތާޙްކޮށްފި

އިންސްޓްޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސް (ސީ.އޭ މޯލްޑިވްސް) ގެ 2021 ވަނަ އަހަރުން ފެށިގެން 2023 ވަނަ އަހަރަށް ތައްޔާރު ކޮށްފައިވާ ސްޓްރެޓެޖިކް ޕްލޭން އިފްތިތާޙްކޮށްފިއެވެ. ސްޓްރެޓެޖިކް ޕްލޭން އިފްތިތާޙް ކޮށްދެއްވާފައިވަނީ އެކަމަށްޓަކައި ބޭއްވި ހާއްސަ ޖަލްސާގައި ޝަރަފްވެރި މެހެމާން މިނިސްޓަރ އޮފް ޓުއަރިޒަމް ޑޮކްޓަރ އަބްދުﷲ މައުސޫމްއެވެ.

ޖަލްސާގައި ވާހަކަފުޅުދައްކަވަމުން އޮޑިޓަރ ޖެނެރަލް ހަސަން ޒިޔަތުގެ ފާހަގަކުރެއްވީ މި ސްޓްރެޓެޖިކް ޕްލޭންގެ މައިގަނޑު އަމާޒަކީ ސީ.އޭ މޯލްޑިވްސްގެ ހިންގުން ހަރުދަނާ ބިންގަލެއްގެ މައްޗަށް ބިނާކުރުން ކަމުގައެވެ. އަދި އިންސްޓްޓިއުޝަނަލް ކެޕޭސިޓީ ބިލްޑް ކުރުމާއި، ބައިނަލަގްވާމީ ދުނިޔެ ބަލައިގަންނަ އިންސްޓިޓިއުޓަކަށް ހެދުމާއި، ސީ.އޭ މޯލްޑިވްސްގެ މެންބަރުންނަށާއި ގައުމަށް ލާބަހުރި މަސައްކަތްތަކެއް ކޮށްދީ، މި ޕްރޮފެޝަންއަކީ އިތުބާރުހިފޭ، ފަހި ފުރުސަތުތަކެއް އޮތް ޕޮރޮފެޝަންއަކަށް ހެދުމަކީވެސް މި ޕްލޭންގެ އަމާޒުތަކެއް ކަމުގައި އޮޑިޓަރ ޖެނެރަލް ވިދާޅުވިއެވެ.

advertisement

މިހަފްލާގައި އިގްތިސާދީ ކުރިއެރުމަށްޓަކައި ދެމެހެއްޓެނިވި ވިޔަފާރީގެ އުސޫލުތައް ގެންގުޅުމުގެ މުހިންމުކަމުގެ މަށްޗަށް އަލި އަޅުވާލައި ބޭއްވި ޕެނަލް ޑިސްކަޝަންގައި ބައިވެރިވެލައްވާފައި ވަނީ މިނިސްޓަރ އޮފް ޓުއަރިޒަމް ޑޮކްޓަރ އަބްދުއްﷲ މައުސޫމް، ކެޕިޓަލް މާކެޓް ޑެވެލޮޕްމަންޓް އޮތޯރިޓީގެ ސީ.އީ.އޯ މުޙައްމަދު ހުސެއިން މަނިކް، ސީ.އޭ މޯލްޑިވްސްގެ ވައިސް ޕްރެސިޑެންޓް ހަސަން މުޙައްމަދު އަދި ސީ.އޭ މޯލްޑިވްސްގެ ކައުންސިލް މެންބަރ ހުސެއިން ނިޔާޒީއެވެ. މި ޕެނަލް ޑިސްކަޝަންގައި ވަނީ މިވަގުތު ބޭނުން ކުރެވެމުންދާ ދެމެހެއްޓެނިވި ވިޔަފާރީގެ އުސޫލުތަކާއި ކުރިއަށް އޮތްތާނގައި އެޅުމަށް ޕްލޭން ކުރެވިފައިވާ ފިޔަވަޅުތަކަށް އަލި އަޅުއްވާލައްވާފައެވެ.