އިންތިހާބުގައި ބަލިވެގެން ލީޑަޝިޕް އިސްތިއުފާ ދޭންޖެހޭކަމަށް ޤަބޫލެއް ނުކުރަން – ނަޝީދު

ލޯކަލް ކައުންސިލް އިންތިހާބެއްގައި ޕާޓީއަށް ނާކާމިޔާބު ވެގެން ލީޑަޝިޕް އިސްތިއުފާ ދެއްވަން ޖެހި ވަޑައިގަންނަވާ ސަބަބެއް ނެތް ކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް ކަމުގައި ހުންނެވި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

މިމަހުގެ 10 ވަނަ ދުވަހު ބޭއްވި ލޯކަލް ކައުންސިލްތަކުގެ އިންތިހާބުގެ ވަގުތީ ނަތީޖާ ދައްކާ ގޮތުގައި އާބާދީ ބޮޑެތި ސަރަހައްދުތަކުގައި އިދިކޮޅު ޕީޕީއެމް ކެންޑިޑޭޓުން ވަނީ ބޮޑު ކާމިޔާބީއެއް ހޯދާފަ އެވެ.

advertisement

ކައުންސިލް އިންތިހާބަށްފަހު ނޫސްވެރިންނާ ފުރަތަމަ ފަހަރަށް ބައްދަލު ކުރައްވައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ ކައުންސިލް އިންތިހާބެއްގައި ބައްޔެއް ވުމަކީ އިސްތިއުފާ ދޭން ޖެހޭ ސަބަބެއް ނޫން ކަމަށެވެ. އަދި އެއީ ދުނިޔޭގެ އެއްވެސް ގައުމެއްގައި ޕާޓީއެއްގެ ލީޑަރަކު ކުރެއްވި ކަމެއް ވެސް ނޫން ކަމަށެވެ.

އިންތިހާބުގައި ރާއްޖޭގެ ބޮޑެތި ބައެއް ސަރަހައްދުތަކުގެ ގޮނޑިތައް އެމްޑީޕީއަށް ގެއްލުމާއި ގުޅިގެން ނަޝީދު ވިދާޅުވީ، އެމްޑީޕީއަށް ލިބޭ ނާކާމިޔާބީއަކީ އެންމެންގެ އިހުމާލުން ވާ ކަމެއް ކަމަށެވެ. ނަޝީދު ވިދާޅުވީ، ނަތީޖާއަށް ބެލުމަށްފަހު ދެން ޖެހޭނީ ވިސްނާފަ ކަންކަން ކުރަންކަމަށެވެ. މިއީ ރަނގަޅު ކެންޑިޑޭޓުން އިހުތިޔާރު ނުކުރެވިގެން ވީ ކަމެއް ނޫން ކަމަށަށް ވެސް ރައީސް ނަޝީދު ވަނީ ވިދާޅުވެފައެވެ.