ރަމަޟާންމަހު މާލޭގެ ޓްރެފިކް ބެލެހެއްޓުމަށް ފުލުހުންގެ ޚާއްސަ އޮޕަރޭޝަންތަކެއް

ރަމަޟާންމަހު މިސްކިތްތައް ކައިރީގައި ޓްރެފިކް ބެލެހެއްޓުމަށް ފުލުހުން ހަރަކާތްތެރިވާނެކަމަށް ފުލުހުން ވިދާޅުވެއްޖެއެވެ. އެގޮތުން ރަމަޟާންމަހާއި ދިމާކޮށް މިސްކިތްތައް ކައިރީ ކުރިން ޕާކުކުރުން މަނާ ތަންތަން ނަމާދު ގަޑިތަކާއި ދިމާކޮށް ޕާކުރުމަށް ހުޅުވާލާނެކަމަށްވެސް ފުލުހުން ވިދާޅުވެއެވެ. އެހެންނަމަވެސް މިގޮތަށް ބަލާނީ ނަމާދުކޮށް ނިމިގެން 15 މިނިޓަށް ކަމަށް ފުލުހުން ވިދާޅުވެއެވެ. އޭގެފަހުން ވީހާވެސް އަވަހަކަށް ވެހިކަލްތައް މަނާ ސަރަހައްދުތަކުން ނެގުމަށް ފުލުހުން ވިދާޅުވެއެވެ. މިސްކިތްތައް ހުންނަ ސަރަޙައްދުތަކުގައި ނަމާދުކުރަން ފެށުމުގެ 15 މިނިޓުކުރިން 4 ފުރޮޅުލީ ވެހިކަލްތައް އެސަރަޙައްދުތަކަށް ވަނުން މަނާވާނެކަމަށެވެ. އަދި މިސްކިތް ކައިރީގައި ދިރިއުޅޭ ފަރާތްތަކުން ފައިމަގުގައި މިސްކިތައް ދިއުމަށް ފުލުހުން އިލްތިމާސްކުރައްވައެވެ.

ކޮންމެ އަހަރެއްގެ ރަމަޟާންމަހަކުވެސް މާލޭގެ ޓްރެފިކް ބެލެހެއްޓުމަށް ޚާއްސަ އޮޕަރޭޝަންތަކެއް ފުލުހުން އަންނަނީ ހިންގަމުންނެވެ. ފުލުހުން ވިދާޅުވީ، ރަމަޟާންމަހުގެ ތެރޭގައި ޢާއްމުކޮށް ބާރު ބޮޑުވަނީ ލޯކަލް މާރުކޭޓް ސަރަޙައްދާއި ނަމާދު ގަޑިތަކާ ދިމާކޮށް މިސްކިތްތައް ކައިރީގައާއި ހަވީރު ފިންޏަށް ދުއްވަން ނުކުންނަ ގަޑިތަކުގައިކަމަށެވެ.
ހަވީރުގެ ގަޑިއަކީ ޢާއްމުން ރޯދަކުރުކުރުމަށް ފިނިބުރު ޖަހަންދާ ވަގުތެއްކަމުން އެގަޑީގައިވެސް ފުލުހުން މާލޭގެ 15 ސަރަޙައްދެއްގައި ޙަރަކާތްތެރިވާނެއެވެ. ފިނިބުރުޖެހުމަށް ނިކުމެއުޅޭއިރު ބޮޑުތަކުރުފާނު މަގާއި ބްރިޖުމަތީގައާއި ހައިވޭގައިވެސް އެމީހަކު ހުރި ލޭނެއްގައި ދަތުރުކުރުމަށާއި ލޭން ބަދަލު ނުކުރުމަށް ފުލުހުން އިލްތިމާސްކުރައްވައެވެ. ލޭން ބަދަލުކުރުމުގެ ސަބަބުން މަގު ބްލޮކްވުމާއި ނުރައްކާތެރި އެކްސިޑެންޓުތައް ހިންގުމަށް މަގުފަހިވާތީ އެކަން އެގޮތަށް ނުކުރުމަށް ފުލުހުން އިލްތިމާސްކުރައްވައެވެ.

advertisement