މާލޭގެ އެކި ސަރަހައްދުތަކަށް ޖަމާކޮށްފައިވާ ގިނަ ކުނި ތަކަކީ ދުވަހު ކުނި ނެގުމުގެ އުސޫލަށް ނުފެތޭ ކުނި -ވެމްކޯ

މާލޭ ސަރަހައްދުގެ ކުނި އުކުމުގެ މަސައްކަތް ކުރަމުންއަންނަނީ ވޭސްޓް މެނޭޖްމަންޓް ކޯޕަރޭޝަނުންނެވެ. ރަމަޟާންމަހާއި ދިމާކޮށް މާލޭގައި އުފެދޭ ކުނި ގިނަކަމަށް ވެމްކޯއިން ބުނެއެވެ. މާލޭގެ މަގުތަކުގައި ބަހައްޓާފައިވާ ގިނަ އަދަދެއްގެ ކުނި ނުނަގާ ކަމުގެ ޝަކުވާތަކާއެކު، މިދިޔަ ދެ ތިން ދުވަހު ސޯޝަލް މީޑިއާގައި ވެމްކޯ އަށް ވަރަށް ބޮޑަށް ފާޑުކިޔާފައި ވެ އެވެ. އާއްމުކޮށްފައިވާ ވީޑިއޯ އާއި ފޮޓޯތަކުން ފެންނަނީ ބޮޑެތި ފޮށިގަނޑުތަކުގައި ކުނި ބަހައްޓާފައި ތަނެވެ. މިކަމާއި ގުޅިގެން ވެމްކޯއިން ބުނެފައިވަނީ މާލޭގެ އެކި ސަރަހައްދުތަކަށް ޖަމާކޮށްފައިވާ ކުންޏަކީ ގޭބިސީތަކަށް ފޯރުކޮށްދޭ ދުވަހު ކުނި ނެގުމުގެ އުސޫލަށް ނުފެތޭ ބަރު އަދި ބޮޑެތި ކުނި ކަމަށެވެ.

ރޯދަމަހަކީ އެހެން މަސްތަކާ ހިލާފަށް ކުނި ގިނަވާ މަހަކަށް ވުމުން އެ މުއްދަތުގައި ގޭބިސީތަކަށް ފޯރުކޮށްދޭ ހިދުމަތްތައް ރާވާފައި ވަނީ ކަސްޓަމަރުންނަށް ފަސޭހަވާނެ ގޮތަކަށެވެ. ކުނި ބޭރުކުރަން ހަމަޖައްސާފައިވަނީ ރޭގަނޑު 10:00-11:00 އަށެވެ.

advertisement

ވެމްކޯ އިން ބުނިގޮތުގައި، ގޭބިސީތަކުގެ ތިރީ ފަންގިފިލާއިން ކުނި ނަގަނީ މާލެ ސަރަހައްދުގައި ކޮވިޑު ފެތުރުމާ ގުޅިގެން އާއްމުންގެ ރައްކާތެރިކަމަށް ބެލުމަށް ފަހު އެވެ. އެކަމަކު ހިދުމަތަށް ރަޖިސްޓަރީނުކުރާ ގޭބިސީތަކާއި ވިޔަފާރިވެރިން އޭގެ ނާޖައިޒު ފައިދާ ނަގަމުންދާ ކަމަށް ފާހަގަކުރި އެވެ.

އެހެންވެ، ވެމްކޯގެ މަސައްކަތަށް އުޖޫރަ ދެއްކުމަށް ހަނދާންކޮށްދީ އަދި ރަޖިސްޓަރީވެ، ބަރާބަރަށް ފީ ދެއްކުމަށް ވެސް އެ ކުންފުނިން ވަނީ އެދިފައެވެ.

ބަރު އަދި ބޮޑެތި ކުނި ނެގުމަށް ވެމްކޯ އިން ވަނީ “ކެޕްސް” ގެ ނަމުގައި އަގުހެޔޮ ޕިކަޕު ދަތުރުތައް ފަށައިފަ އެވެ. ހަފުތާގެ ކޮންމެ ދުވަހަކު ވެސް އެ ހިދުމަތް ލިބޭނެ ކަމަށް އެ ކުންފުނިން ބުންޏެވެ.