ރޭޕް : ކަންބޮޑުވާންޖެހޭ ބޮޑު މައްސަލައެއް!

ރާއްޖޭގައި ޒުވާންކުދިންނާއި ކުޑަކުދިން ރޭޕްކުރާ ވާހަކަތައް ދޭތެރެދޭތެރެއިން ދެކެވެއެވެ. މިއީ ކަންބޮޑުވާންޖެހޭ ވަރުގެ ބޮޑު މައްސަލައެކެވެ. އާއިލާގެ ފުށުންނާއި ގާތްމީހުންގެ ފުށުންވެސް މިފަދަ ނޭދެވޭ އަމަލުތައް ކުރިމަތިވާ ފަހަރު މަދެއްނޫނެވެ.

އިއްޔެވެސް މާލޭގައި ވަނީ ޒުވާން އަންހެންކުއްޖަކު ރޭޕްކުރަން އުޅުމުގެ މައްސަލައެއް ފެންމަތިވެފައެވެ. މަގުމަތިން ހިނގާފައިދަނިކޮށް 2 ފިރެހެނަކު އެ އަންހެން ކުއްޖާ އުފުލާލާއިގެން ގެންގޮސް ވަނީ ރޭޕްކުރަން އުޅެފައެވެ. މި ހާދިސާ ހިނގާފައިވަނީ ތަރާހީވް ނަމާދަށް މީހުންތިބި ވަގުތުގައެވެ.

advertisement

މަގުމަތީގައި ހިނގާފައި އުޅުމުގެ މިނިވަންކަން ނެތުމަކީ ބިރުވެރިކަމެކެވެ. ކޮންމެ މީހަކަށްވެސް އަމާންކަމާއިއެކު މަގުތައްމަތީގައި އުޅުމުގެ މިނިވަންކަން ލިބެންޖެހެއެވެ. ރޭޕްކުރުމުގެ މައްސަލަތައް ކުރިން ހުށައަޅާލެއް މަދުނަމަވެސް މިކަމާއިމެދު މިހާރު މުޖްތަމައު ވަނީ ހޭލުންތެރިވެފައެވެ. މީގެސަބަބުން ރޭޕްގެ މައްސަލަތައް ހުށައަޅާ މިންވަރު އަންނަނީ އިތުރުވަމުންނެވެ.

ޖިންސީ ގޯނާގެ މައްސަލަތައް ރާއްޖޭގައި އޮތް މިންވަރު ޖެންޑަރ މިނިސްޓްރީގެ ތަފާސްހިސާބުތަކުންވެސް ހާމަވެއެވެ. މިއަހަރުގެ ފެބްރުއަރީމަހު ޖެންޑަރ މިނިސްޓްރީއަށް 186 މައްސަލަ ހުށައަޅާފައިވެއެވެ. ޖެންޑަރ މިނިސްޓްރީން ވިދާޅުވީ އެންމެ ގިނައިން ހުށައަޅާފައިވަނީ ކުޑަކުދިންނަށް ކުރާ އެކި ބާވަތުގެ އަނިޔާގެ މައްސަލަތައްކަމަށެވެ. ޖެންޑަރ މިނިސްޓްރީން ފެބްރުއަރީ މަހު ބަލާފައިވާ އެކި މައްސަލަތަކުގައި، ކުޑަކުދިންނާ ކުރާ އެކި ބާވަތުގެ އަނިޔާއާ ގުޅޭ 92 މައްސަލަ ހިމެނެއެވެ. އެންމެ ގިނައިން ހުށައަޅާފައިވަނީ ޖިންސީ ހާނިކައިގެ މައްސަލަތަކެވެ. މިބާވަތުގެ 25 މައްސަލަ ހިމެނެއެވެ.

މިފަދަ މައްސަލަތައް ސިއްރުކުރުމުގެ ބަދަލުގައި ކަމާގުޅުންހުރި އިދާރާތަކަށް ހުށައެޅުމަކީ މުހިންމުކަމެކެވެ. މިއީ މިކަން ކުރާ މީހުންނަށް މިފަދަ އެހެން ކަމެއްކުރަން ހިތްވަރު ނުދިނުމަށް އެޅޭ މުހިންމު ފިޔަވަޅަކަށްވެސް ވެގެންދާނެއެވެ.