އިންތިހާބާއި ގުޅިގެން 208 ޝަކުވާއެއް ވަނީ ހުށައަޅާފައި – އީސީ

ނިމިދިޔަ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިޚާބާ ގުޅިގެން ޖުމްލަ 208 ޝަކުވާއެއް ލިބިފައިވާކަމަށް އިލެކްޝަން ކޮމިޝަނުން ވިދާޅުވެއްޖެއެވެ.
ނޫސްވެރިންގެ ބައްދަލުވުމުގައި އެ ކޮމިޝަންގެ ރައީސް އަޙްމަދު ޝަރީފް ވިދާޅުވީ، އިންތިހާބާއި ގުޅިގެން ހުށައަޅާފައިވާ ޝަކުވާތަކުގެ ތެރޭގައި ގިނައީ އެއްވެސް ހެއްކެއްގެ މައްޗަށް ބިނާކުރުމެއްނެތި، މީހަކު ބުނި ބުނުމަކަށް ބަލައި ހުށަހަޅާފައިވާ ޝަކުވާތަކެއްކަމަށެވެ. މި ޝަކުވާތަކަށް ބެލުމަށްފަހު، 11 ފޮށްޓެއްގެ ނަތީޖާ އަލުން ޔަޤީންކުރުމަށްޓަކާ ކޮމިޝަންގެ ފަރާތުން ފުރިހަމަ ކުރަންޖެހޭ ކަންކަން ފުރިހަމަ ކުރާނެކަމަށް ޝަރީފް ވިދާޅުވިއެވެ.

ނަތީޖާ ޔަޤީންކުރުމަށް ނިންމާފައިވާ 11 ފޮށްޓަކީ ތ. މަޑިފުއްޓާއި، ދ. މީދޫއާއި، މިލައިދޫ އައިލެންޑް ރިސޯޓާއި، ލ. ކަލައިދޫއާއި، ދ. ރިނބިދޫއާއި، ޅ. އޮޅުވެލިފުއްޓާއި، މ. ރަތްމަންދޫއާއި، ތ. ދިޔަމިގިލީގައި ބެހެއްޓި ވޯޓު ފޮށްޓެއްގެ އިތުރުން، ގއ. އަތޮޅުގެ ރައްޔިތުން ވޯޓުލުމަށް މާލޭގައި ބެހެއްޓި ފޮށްޓަކާއި، މ. އަތޮޅުގެ ރައްޔިތުން ވޯޓުލުމަށްޓަކާ މާލޭގައި ބެހެއްޓި ފޮށްޓެކެވެ.

އިލެކްޝަން ކޮމިޝަންގެ ރައީސް ވިދާޅުވީ، ދާއިމީ ނަތީޖާ ކަށަވަރުކުރުމަށްޓަކާ މި 11 ފޮށީގެ ސެކިއުރިޓީ އުރަ 3 ކަނޑާ، ޝަކުވާތަކަށް އެޓެންޑްކުރުމުގެ މަސައްކަތް މިއަދު ފަށާނެކަމަށެވެ. އަދި މިކަން ކުރާނީ ހުށަހަޅާފައިވާ ޝަކުވާތަކުގައި މަސްލަޙަތު ހިމެނޭ ކެނޑިޑޭޓުންނާއި ޕާޓީތަކަށްވެސް ދަޢުވަތުދީގެންކަމަށް ޝަރީފް ވިދާޅުވިއެވެ.

ލޯކަލް ކައުންސިލްތަކުގެ އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިޚާބު 2020ގެ ދާއިމީ ނަތިޖާ ވީހާވެސް އަވަހަކަށް އިޢުލާންކުރުމަށް އިލެކްޝަން ކޮމިޝަނުން ދަނީ ތައްޔާރުވަމުންނެވެ.

advertisement