“އާރތް ޑޭ” : އަހަރުގެ ކޮންމެ ދުވަހަކުވެސް ފާހަގަކުރާ ދުވަހަކަށް ހަދަންޖެހޭ

ކޮންމެ އަހަރެއްގެވެސް އޭޕްރީލް މަހުގެ 22 ވަނަ ދުވަސް ފާހަގަކުރަނީ “އާރތް ޑޭ” ނުވަތަ ދުނިޔޭގެ ދުވަހުގެ ގޮތުގައެވެ. މިއަހަރު ފާހަގަކުރަމުން މިދަނީ 51 ވަނަ އާރތް ޑޭއެވެ. މިއަހަރުގެ އާރތް ޑޭގެ ތީމްއަކީ “ރީސްޓޯރ އަވަރ އާރތް” އެވެ.

އާރތް ޑޭ އެންމެ ފުރަތަމަ ފާހަގަކޮށްފައިވަނީ 1970ވަނަ އަހަރު އެމެރިކާގެ ސެނެޓް މެމްބަރަކު އިންސާނުންގެ ސަބަބުން ދުނިޔެއަށް ލިބޭ ގެއްލުން އާއްމުންނާއި ހަމަޔަށް ހަމައަށް ދައްކައިދިނުމަށް ފެށި ކުޑަ ހަރަކާތަކުންނެވެ. ގޭލޯޑް ނެލްސަން އަދި ވިސްކޮންސިން ނަމަކަށް ކިޔާ ދެ ސެނެޓަރުން ކެލަފޯނިއާގެ ސަންޓާ ބާބްރާގެ ކަނޑަށް 1969 އެޅުނު ތެޔޮ އެޅުން މައްސަލައާއިގުޅިގެން މި ހަރަކާތް ފެށިއިރު، މިހަރަކާތްވެގެން ގޮސްފައިވަނީ ތިމާވެށީގެ ކަންކަމާއި ބެހޭގޮތުން އާންމުނެގް ނަޒަރު ބަދަލުކޮށްލިކަމަކަށެވެ. އެގޮތުން މި ސެނެޓަރުންގެ މަސައްކަތް ފުރަތަމަ އަމާޒުހިފީ، މި ކަމުގެ ސަބަބުން އާންމުންގެ މެދުގައި ވަޔާއި ފެނުގެ ތަޣައްޔަރުވުމުގެ ނުރައްކަލާއި ބެހޭގޮތުން ހޭލުންތެރިކުރުމަށެވެ. މި މަސައްކަތުގެ ދަށުން، “ނެޝަނަލް ޓީޗް އިން އޮން ދި އެންވާރަމެންޓް”ގެ ނަމުގައި ޚާއްސަ ހަރަކާތެއް ފެށިއެވެ.

advertisement

ދުނިޔޭގައި އިންސާނުން އުޅޭތާ ދުއިއްސައްތަ ހާހަށްވުރެ ގިނަ އަހަރު ވަނީ ވެފައެވެ. އިންސާނުންގެ ސަބަބުން އަޅުގަނޑުމެން ދިރިއުޅެމުންދާ މާހައުލައް އެތައް ބަދަލުތަކެއް ދަނީ އަންނަމުންނެވެ. ގަސް ކެނޑުމާއި، ޖަންގަލިތައް އަންދާ ހުސްކުރުމާއި، ކަނޑަށް ޕްލާސްޓިކް އެޅުމާއި، ތެޔޮ އެންދުންފަދަ ކަންކަމަކީ އެކަމެއްގެ ސަބަބުން، ދުނިޔެއަށް ގިނަ ގެއްލުންތަކެއް ލިބޭ ކަންކަމެވެ.

މިފަދަ ކަންކަމުގެ ސަބަބުން އެންމެ ބޮޑު އަސަރެއް ކުރާ ޤައުމުތަކުގެ ތެރޭގައި ހިމެނެނީ ރާއްޖެ ފަދަ ޖަޒީރާ ޤައުމުތަކެވެ. ދުނިޔެއަށް އަންނަ ތަފާތު ބަދަލުތަކުގެ ސަބަބުން ދުނިޔެ ހޫނުވުމާއި، ކަނޑުގެ ލޮނުގަނޑު އުފުލުން ފަދަ އެތަކެއް ކަންކަމާއި މިއަދު ކުރިމަތިލާން ޖެހިފައިވާއިރު މީގެ ނޭދެވޭ އަސަރު ރާއްޖެއަށް އަންނަނީ ކުރަމުންނެވެ. އެގޮތުން ރާއްޖޭގެ ރަށްތައް ގިރުމަކީ މިހާރު އާންމުކޮށް ކޮންމެ ރަށަކަށް ކަހަލަ ގޮތަކަށް ކުރިމަތިލާން ޖެހިފައިވާ މައްސަލައެކެވެ.

ކަނޑަށް ޕްލާސްޓިކް އުކުން ފަދަ ކަންކަމުގެ ސަބަބުންވެސް ރާއްޖެއަށް މިކަމުގެ ނޭދެވޭ އަސަރުތައް އަންނަނީ ލިބެމުންނެވެ. %99 ކަނޑު ހިމެނޭ ޤައުމަކަށް ރާއްޖެ ވީހިނދު ކަނޑުގެ އެކިއެކި ދިރުންތަކަށްވެސް މީގެ ސަބަބުން ނޭދެވޭ އަސަރިތައްކޮށް ގިނަ ދިރުންތައް އަންނަނީ މަރުވެސްވަމުންނެވެ.

1970ވަނަ އަހަރު ފާހަގަކުރަންފެށި، އާރތް ޑޭއަކީ މިހާރު ދުނިޔޭގައި ތިމާވެށި ހިމާޔަތްކުރުމަށް ހިންގާ އެންމެ ބޮޑު ހަރަކާތެވެ. އެގޮތުން ކޮންމެ އަހަރަކު މިދުވަސް ފާހަގަކުރުމަށް ދުނިޔޭގެ އެތައް ސަތޭކަ ޤައުމަކުން، އެއް ބިލިއަނަށްވުރެ ގިނަ މީހުން ފާހަގަކުރަމުން ގެންދެއެވެ.

އާބާދީ ބޮޑުވެ ޒަމާނަށް އަންނަ ބަދަލުތަކާއި އިންސާނުންގެ ދިރިއުޅުމުގެ ވައްޓަފާޅިއަށް އަންނަ ބަދަލުތަކުގެ ސަބަބުން ދުނިޔެއަށް ތަފާތު ބޮޑެތި ބަދަލުތަކެއް ދަނީ އަންނަމުންނެވެ. އެހެންކަމުން ކޮންމެ މީހަކުވެސް ފަރުދީ ފެންވަރެއްގައި ދުނިޔެ ސަލާމަތްކުރުމަށް ކުރެވޭނީ ކޮންކަމެއްތޯ ވިސްނާލަންޖެހެއެވެ.

ކޮންމެ އަހަރަކުވެސް އާރތް ޑޭފަދަ ދުވަހެއް ފާހަގަކުރުމުގެ އެންމެ ބޮޑު ބޭނުމަކީ ދުނިޔެއަށް ކުރިމަތިވަމުންއަންނަ އެކިއެކި ކަންކަމުން ރައްކާތެރިވެ ދުނިޔެ ސަލާމަތްކުރުމެވެ. އެހެންކަމުން މިދުވަހަކީ ހަމައެކަނި އެންމެ ދުވަހެއްގައި ފާހަގަކޮށްލާ ދުވަހަކަށް ހެދުމުގެ ބަދަލުގައި މިއީ އަހަރުގެ ކޮންމެ ދުވަހަކުވެސް ފާހަގަކުރާ ދުވަހަކަށް އެބަ ހަދަންޖެހެއެވެ.