ސުކޫކް ވިއްކައިގެން ދަރަނީގެ ބޮޑުބައެއް ދައްކައިފި

ސަރުކާރުން ވިއްކި ސުކޫކުން ލިބުނު ފައިސާ އިން އަންނަ އަހަރު ދަންކަންޖެހޭ 250 މިލިއަން ޑޮލަރުގެ ޔޫރޯ ބޮންޑުގެ ބޮޑު ބަޔެއް ދައްކާފައިވާކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.

އޯވަރޑްރޯ ކުރުމުގެ މުއްދަތު އިތުރުކުރުމުގެ މައްސަލަ ދިރާސާކުރި ވަގުތީ ކޮމިޓީގެ ބައްދަލުވުމުގައި މިނިސްޓަރ ވިދާޅުވީ އަންނަ 2022 ވަނަ އަހަރު މެޗުއަވާ 250 މިލިއަން ޑޮލަރުގެ ޔޫރޯ ބޮންޑަކީ އެކީ އެއްފަހަރާ ދައްކަންޖެހޭ ބޮންޑެއް ކަމަށެވެ. އެބޮންޑުގެ ސަބަބުން ލިކިޔުޑިޓީ މެނޭޖްމަންޓަށް ބޮޑު އަސަރެއް ކުރާކަމަށް މިނިސްޓަރ ވިދާޅުވިއެވެ. އަދި މިހާލަތުގައި އިންވެސްޓަރުންނަށްވެސް 2022 ވަނަ އަހަރު ރާއްޖެއަށް އެދެއްކޭނެ ކަމުގެ ޔަގީންކަމެއް ނެތް ކަމަށް މިނިސްޓަރ ވިދާޅުވިއެވެ. އެހެންކަމުން ސުކޫކު އިޝޫ ޕްރޮގްރާމްގެ ތެރެއިން ރަނގަޅު ރޭޓެއް ހޯދުމަށްޓަކައި މަސައްކަތްކުރީ ކަމަށް މިނިސްޓަރ ވިދާޅުވިއެވެ.

advertisement

މިނިސްޓަރ ވިދާޅުވީ އެހެންކަމުން މީގެ ހަފްތާއެއް ކުރިން ރާއްޖޭގެ ދަރަނީގެ ހާލަތު ހުރިވަރަށްވުރެ މިހާރުގެ ހާލަތު ރަނގަޅު ކަމަށެވެ. އަދި މިބޮންޑުގެ ތެރެއިން އަންނަ އަހަރު ދެން ދައްކަން ޖެހޭނީ 58 މިލިއަން ޑޮލަރު ކަމަށް މިނިސްޓަރ ވިދާޅުވިއެވެ. އަދި ދެން މާކެޓަށް ދާނަމަ ރާއްޖޭގެ ރޭޓިންގްސް ރަނގަޅުވާނެކަމަށް މިނިސްޓަރ ވިދާޅުވިއެވެ.

މިދިޔަ މަހުގެ ތެރޭގައި ސަރުކާރުން ބުނެފައިވަނީ ކްރެޑިޓް ސޫއިޒް އާއި އެމިރޭޓްސް އެންބީޑީ ކެޕިޓަލްގެ އިތުރުން އެސްއެސްބީސީ އަދި އިސްލާމިކް ކޯޕަރޭޝަން ފޯ ދަ ޑިވެލޮޕްމެންޓް އޮފް ޕްރައިވެޓް ސެކްޓާ (އައިސީޑީ) މެދުވެރިވެގެން ސަރުކާރުން 200 މިލިއަން ޑޮލަރުގެ ސުކޫކެއް ލިސްޓު ކޮށްފައިވާ ކަމަށެވެ. އެ ސުކޫކުން ލިބޭ ފައިސާ ބޭނުންކުރާނީ ކުރީގެ ސަރުކާރުގައި ވިއްކާފައިވާ 250 މިލިއަން ޑޮލަރުގެ ޔޫރޯ ބޮންޑު އަންނަ އަހަރު މެޗުއާވާތީ އެ ބޮންޑަށް ފައިސާ ދައްކަން ކަމަށް ސަރުކާރުން ވަނީ ބުނެފަ އެވެ.

މި އަހަރަށް ދައުލަތުގެ ބަޖެޓަށް ބޭނުންވާ ފައިސާ ހޯދުމަށް ބޭރުގެ ފަރާތަކަށް 300 މިލިއަން ޑޮލަރުގެ ސުކޫކެއް ވިއްކަން ސަރުކާރުން ވަނީ ނިންމާފައެވެ.