ސިންގަލް ޔޫޒް ޕްލާސްޓިން ބޭނުންކުރުން މަދުކުރުން ސަރުކާރުގެ މުހިންމު އަމާޒެއް!

ޕްލާސްޓިކް ފުޅިއަކީ ރާއްޖޭގައި ކުނީގެ ގޮތުގައި އެންމެ ގިނައިން އުކާލާ ބާވަތެވެ. މީގެތެރެއިންވެސް އެއްފަހަރު ބޭނުންކޮށްފައި އުކާލާ ފުޅި ގިނަކަން ފާހަގަކުރެވެއެވެ. މީގެތެރޭގައި އެކި ސައިޒުގެ ފެންފުޅިއާއި އެކިބާވަތުގެ ފިޒީ ޑްރިންކްސް ހިމެނެއެވެ. ތަފާސްހިސާބުތައް ދައްކާގޮތުން ރާއްޖޭގައި އަހަރަކު 3300 ޓަނުގެ ފުޅި ބޭނުންކޮށް އުކާލައެވެ. މީއީ 163 މިލިއަން ފުޅިއެވެ.

ޕްލާސްޓިކަކީ ރާއްޖޭގެ ތިމާވެއްޓަށް އޮތް އެންމެ ބޮޑު މައްސަލަކަމަށް ހުރިހާ އިދާރާއަކުންވެސް އަންނަނީ ފާހަގަކުރަމުންނެވެ. ވަކިން ޙާއްސަކޮށް މިކަމުގެ މުހިންމުކަން ސަރުކާރުގެ މުއައްސަސާތަކުން ފާހަގަކުރައްވައެވެ. އެހެންކަމުން ރާއްޖެއަށް ދިމާވެފައިވާ ޕްލާސްޓިކްގެ މައްސަލައަށް ހައްލެއް ހޯދުމަށް މި ސަރުކާރުން އަންނަނީ ގިނަ މަސައްކަތްތަކެއް ކުރައްވަމުންނެވެ. މީގެތެރޭގައި އިމްޕޯޓް އެކްސްޕޯޓްގެ ޤާނޫނަށް ގެނެވުނު އިސްލާޙަކާއެކު ރާއްޖެއަށް އެތެރެކުރެވޭ ވަކި ބާވަތްތަކެއްގެ ޕްލާސްޓިކް ކޮންޓްރޯލްކުރުމަށް ނިންމާ މިދިޔަ ޑިސެމްބަރ މަހުން ފެށިގެން ވަނީ ޢަމަލުކުރަން ފަށާފައެވެ.

advertisement

އިމްޕޯޓް އެކްސްޕޯޓް ޤާނޫނަށް ގެނައި އިސްލާހާއިއެކު އެއް ފަހަރު ބޭނުންކޮށްފައި އުކައިލެވޭ ޒާތުގެ ޕްލާސްޓިކް ރާއްޖެއަށް އެތެރެކުރުން މަނާކުރުގެ ޤާނޫނުގެ ދަށުން ޕްލާސްޓިކާއި ޕްލާސްޓިކުން ތައްޔާރުކޮށްފައި ހުންނަ އެއްޗެހީގެ ތެރެއިން 12 ބާވަތެއް ރާއްޖެ އެތެރެކުރުން ވަނީ މަނާކޮށްފައެވެ. މީގެތެރޭގައި 9 ބާވަތެއް މި އަހަރުގެ ޖޫން މަހުން ފެށިގެން ރާއްޖެ އެތެރެކުރުމަކީ މަނާކަމެއްކެވެ.

މި އަހަރުގެ ޖޫންމަހުން ފެށިގެން ރާއްޖެ އެތެރެކުރުން މަނާކޮށްފައިވާ ތަކެތީގެ ތެރޭގައި ހިމެނެނީ:
ދިޔާތަކެތި ބޯން ބޭނުންކުރާ ޕްލާސްޓިކް ހޮޅި
ޕްލާސްޓިކް ތަށި، ސަމުސާ، ވަޅި، އޫ، ދިޔާތަކެތި ގިރަން ބޭނުންކުރާ ޕްލާސްޓިކް ދަނޑިކޮޅު
ކާބޯތަކެތި ބަންދުކުރާ ސްޓައިރަފޯމް ފޮށި
ބާޒާރުކުރަން ބޭނުންކުރާ 30 ސެންޓިމީޓަރަށް ވުރެ ކުޑަ ޕްލާސްޓިކް ކޮތަޅު
ޕްލާސްޓިކްގައި ބަންދުކޮށްފައި އިމްޕޯޓްކުރާ ސުޕާރީ
250 މިލިލީޓަރަށް ވުރެ ކުޑަ ސިންގަލް ޔޫސް ކޮފީ ތަށި
ޕްލާސްޓިކް ދަނޑިކޮޅު ލާފައިވާ ކަފަބުރު
50 މިލިލީޓަރާއި އެއަށްވުރެ ކުދި ޝޭމްޕޫ އަދި ސައިބޯނި ފުޅި
ރާއްޖެއަށް އިމްޕޯޓުކުރާ 500 މިލިލީޓަރަށް ވުރެ ކުދި ޕެޓު ފުޅި (ފެނާއި ލުއި ބުއިން ހިމެނޭ ގޮތަށް)

ރައީސުލްޖުމްހޫރިއްޔާގެ ޤަރާރުގައި 2022 ވަނަ އަހަރާއި 2023 ވަނަ އަހަރުވެސް ބައެއް ތަކެތި ރާއްޖެ އެތެރެކުރުން ވަނީ މަނާކަމަށް ކަނޑައަޅާފައެވެ. އެގޮތުން 2022 ވަނަ އަހަރުގެ ޑިސެމްބަރުމަހުގެ 1 ވަނަ ދުވަހުން ފެށިގެން ބާޒާރުކުރަން ބޭނުންކުރާ 50 މައިކްރޯނަށް ވުރެ ތުނި ޕްލާސްޓިކް ކޮތަޅުގެ އިތުރުން، 50 މިލިލީޓަރާއި 200 މިލިލީޓަރާ ހަމައަށް ހިމެނޭ ކުދި ޝޭމްޕޫ ފުޅިއާއި ސައިބޯނި ފުޅި ހިމެނެއެވެ. މީގެއިތުރުން 2023 ވަނަ އަހަރުން ފެށިގެން ރާއްޖެއަށް އިމްޕޯޓްކުރުން މަނާކުރާ ބާވަތުގެ ގޮތުގައި ކަނޑައަޅާފައިވަނީ 1 ލީޓަރާއި 1 ލީޓަރަށްވުރެ ކުދި ޕެޓް ފުޅީގައި ބަންދުކޮށްފައި ހުންނަ ފެން ފުޅިއެވެ.

އެއް ފަހަރު ބޭނުންކޮށްފައި އުކާލާ ޒާތުގެ ޕުލާސްޓިކު ރާއްޖޭގައި ބޭނުންކުރުން 2023 ވަނަ އަހަރުގެ ނިޔަލަށް ހުއްޓާލާނެކަން ރައީސުލްޖުމްހޫރިއްޔާ އިޢުލާނުކުރައްވާފައި ވަނީ އ.ދ. ގެ ޢާންމު މަޖިލީހުގެ 74 ވަނަ ބައްދަލުވުމުގެ ހަވާސާގައި 2019 ސެޕްޓެންބަރު 23 ވަނަ ދުވަހު ބޭއްވި ކްލައިމެޓް ސަމިޓުގައި އެ މަނިކުފާނު ދެއްކެވި ވާހަކަފުޅުގައެވެ.

އެއް ފަހަރު ބޭނުންކޮށްފައި އުކާލާ ޒާތުގެ ޕުލާސްޓިކު ރާއްޖެ އެތެރެކުރުމާއި، ރާއްޖޭގައި އުފެއްދުމާއި، އަދި ބޭނުންކުރުން 2023 ގެ ނިޔަލަށް ހުއްޓާލުމަށްޓަކައި މިނިސްޓްރީ އޮފް އެންވަޔަރަންމަންޓްއިން ވަނީ “ސިންގަލް ޔޫޒް ޕްލާސްޓިކް ފޭސްއައުޓް ޕްލޭން” އެއް އެކުލަވާލާފައެވެ.

މީގެ އިތުރުން ސަރުކާރުގެ ސްޓްރެޓީޖިކް އެކްޝަން ޕްލޭން (އެސް.އޭ.ޕީ) ގެ “ޖަޒީރާ ދިރިއުޅުން” ބައިގެ “ކުންޏަކީ ވަޞީލަތަކަށް ހެދުން،” މި ދާއިރާގެ ދަށުން އެއް ފަހަރު ބޭނުންކޮށްފައި އުކާލާ ޒާތުގެ ޕުލާސްޓިކު މަދުކުރުމުގައި އަމަލުކުރާނެ ސިޔާސަތުތައް އެކަށައަޅާފައިވެއެވެ.

އެއްފަހަރު ބޭނުންކޮށްފައި އުކާލެވޭ ޕްލާސްޓިކް ބޭނުންކުރުން މަދު ކުރުމަށް ޚާއްސަ ޙަރަކާތައް ސަރުކާރުންފަށައި ރައީސުލްޖުމްހޫރިއްޔާގެ އޮފީހާއި ސަރުކާރުގެ އޮފީސްތަކުގެ އިތުރުން އަމިއްލަ ބައެއް ތަންތަނާއި ކެފޭ ރެސްޓޯރެންޓްތަކުގައިވެސް އެހަރަކާތުގައި ވަނީ ބައިވެރިވެ އެކަން ތަންފީޒުކުރަމުންނެވެ.