ބްލޮގަރ ޔާމީންގެ މަރަށް 4 އަހަރު، ކޮމިޝަނުން ފިނި ބަޔާނެއް

އަނިޔާވެރިގޮތަކަށް 2017 ވަނަ އަހަރު މަރާލި، ބްލޮގަރ ޔާމީން ރަޝީދުގެ މަރުގެ އަޑީގައި ތިބި ބަޔަކު ހޯދުމުގެ މަސައްކަތް މިހާރު ވެސް ކުރަމުންދާ ކަމަށް ބުނެ، މަރު ކޮމިޝަނުން ބަޔާނެއް ނެރެފި އެވެ.

ޔާމީންގެ މަރާލިތާ އިއްޔެ ވަނީ ހަތަރު އަހަރުވެފައެވެ. މިދުވަހާއި ގުޅިގެން އެފަދަ މައްސަލަތައް ބެލުމަށް އެކުލަވާލާފައިވާ ކޮމިޝަނުން ވަނީ ބަޔާނެއް ނެރެފަ އެވެ. އެ ބަޔާނުގައި ޔާމީން ރަޝިދު ނެތުމުން އާއިލާއަށާއި ރައްޓެހިންނަށް ލިބިފައިވާ ފުން ހިތާމާގައި ބައިވެރިވާ ކަމަށް ކޮމިޝަނުން ބުނެފައިވެ އެވެ. ބަޔާނުގައި ބުނެފައިވަނީ މައްސަލައިގެ ޝަރީއަތްތައް ހިނގަމުން ދިޔަކަމުގައި ވީނަމަވެސް، ޕްރޮސެކިއުޓާ ޖެނެރަލްގެ ލަފަޔާއެކު ހިނގަމުންދާ ޝަރީއަތަކަށް އެއްވެސް ނުފޫޒެއް ނުފޯރާގޮތަށް، މި މަރުގެ އަޑީގައި ތިބީ ކޮންބައެއްކަން ބަލައި ހޯދުމުގެ މަސައްކަތް އެ ކޮމިޝަނުން ކުރަމުންދާކަމަށެވެ.

advertisement

ޝަރީއަތަށް ނުފޫޒު ފޯރާ ގޮތަށް އެ މައްސަލައިގެ އަޑީގައި ތިބި މީހުން ހޯދުމުގެ މަސައްކަތް ކުރަމުންދާ ކަމަށް ކޮމިޝަނުން ބުނި ނަމަވެސް، އެކަމާ ގޫޅޭ ތަފްސީލެއް ހާމަކޮށްފައިނުވެ އެވެ. އަދި އެކަމުގައި ކުރިއެރުންތަކެއް ހުރި ތޯ ނޫންތޯވެވެސް ކޮމިޝަނުން ހާމަކޮށްފައެއް ނުވެ އެވެ.

ޔާމީން މަރުގެ މައްސަލައިގައި ހަ މީހަކަށް ދައުވާ އުފުލާފައިވެ އެވެ. އެއީ، މ. އަންނާރުމާގެ އިސްމާއީލް ހައިޝަމް ރަޝީދާއި މ. ތާއިފް، އިސްމާއީލް ރަޝީދާއި މ. ކުދެހިގޭ، ހަސަން ޝިފާޒާއި، މ. އިރާސްމިކުގެ އަހުމަދު ޒިހާން އިސްމާއީލްއާއި ގދ. ގައްދޫ/ސިންދުބާދުގޭ މުހައްމަދު ދިފްރާން އަދި މ. ކޮޅުފުށީ/އީސްޓް، ހުސައިން ޒިޔާދުގެ މައްޗަށެވެ.

ޔާމީންގެ މަރުގެ އަޑިގައި ތިބި މީހުން ހޯދުމުގެ މަސައްކަތް ކުރަމުންދާ ކަމަށް މަރު ކޮމިޝަނުން މިއަދު ބުނި އިރު، މީގެ ކުރިން އެ ކޮމީޝަނާއި ފުލުހުން ބުނެފައިވަނީ، ޔާމީންގެ މަރާލީ ދީނީ ގޮތުން ހައްދުފަނައަޅާފައި ތިބި ބަޔަކާ އުފެދުނު ހިލާފުތަކެއްގެ ސަބަބުން ކަމަށެވެ. އޭނާ މަރާލީ 40 ހަކަށް ފަހަރު ގައިގެ އެކި ތަންތަނަށް ވަޅި ޖަހަ އެވެ.