ވެކްސިންގެ 2 ވަނަ ޑޯޒް 70،000 އަށްވުރެ ގިނަ މީހުން ޖަހައިފި

ރާއްޖޭގައި މިހާތަނަށް 70،000 އަށް ވުރެ ގިނަ މީހުން ކޮވިޑް-19ށް ދިފާއުގައި ވެކްސިންގެ ދެވަނަ ޑޯޒު ޖަހާފައިވާ ކަމަށް އެޗްޕީއޭގެ ތަފާސްހިސާބުތަކުން ދައްކައިފިއެވެ.

އެޗްޕީއޭއިން އާންމުކުރި ތަފާސްހިސާބުތަކުން ދައްކާގޮތުން ވޭތުވެދިޔަ 24 ގަޑިއިރު ރާއްޖެއިން ވެކްސިންގެ ފުރަތަމަ ޑޯޒު ޖެހީ 1،111 މީހުންނެވެ. އަދި ދެވަނަ ޑޯޒު ޖެހީ 1،181 މީހުންނެވެ. އެ އެންމެންނަކީ ވެސް އަތޮޅުތެރެއިން ވެކްސިން ޖެހި މީހުންނެވެ. ހުކުރު ދުވަހު މާލެ ސަރަހައްދުގައި ވެކްސިނެއް ނުޖަހައެވެ.

advertisement

މިއާއެކު ވެކްސިން ޖެހި މީހުންގެ ޖުމްލަ 290،014 އަށް އަރާފައިވާއިރު އޭގެ ތެރެއިން ދެވަނަ ޑޯޒު ޖެހީ 70،983 މީހުންނެވެ.

މިދިޔަ ފެބްރުއަރީ މަހުގެ 1 ވަނަ ދުވަހުން ފެށިގެން ރާއްޖޭގައި ވެކްސިނޭޝަން ޕްރޮގްރާމް ކުރިއަށްގެންދާއިރު، ދެވަނަ ޑޯޒު ޖަހަން ފަށާފައި ވަނީ މި މަހު ކުރީކޮޅުއެވެ. ދެވަނަ ޑޯޒު ޖަހަނީ ކޮވިޝީލްޑް ވެކްސިންއާއި ސިނޮފަރމް ވެކްސިންގެއެވެ.

މިހާރު ރާއްޖޭގައި ޖުމްލަ ތިން ވެކްސިނެއް އަންނަނީ ބޭނުންކުރަމުންނެވެ. އެއީ ކޮވިޝީލްޑް ވެކްސިނާއި ސިނޮފަރމް ވެކްސިން އަދި ފައިޒާ ވެކްސިނެވެ. އޭގެ ތެރެއިން މިވަގުތު އާންމުންނަށް ފުރަތަމަ ޑޯޒު ޖަހަނީ ސިނޮފަރމްގެ އެކަންޏެވެ. އަދި ފައިޒާ ވެކްސިން ދެނީ ވަކި ޚާއްސަ ހާލަތެއްގައި ތިބޭ މީހުންނަށެވެ.

ސިނޮފާމްގެ ދެވަނަ ޑޯޒު ޖަހައިދެނީ ހުޅުމާލެ ޓްރީޓޮޕް ހޮސްޕިޓަލާއި، ރައްޔިތުންގެ މަޖިލީހުންނެވެ. އަދި މާލެ ސަރަހައްދުގައި ކޮވިޝީލްޑްގެ ދެވަނަ ޑޯޒް ދެމުން އަންނަނީ ސޯޝަލް ސެންޓަރާއި ނެޝަނަލް އާޓް ގެލަރީއާއި ރައްޔިތުންގެ މަޖިލީހާއި ހުޅުމާލޭ ވެކްސިނޭޝަން ސެންޓަރުގެ އިތުރުން ސެނެހިޔާ ހޮސްޕިޓަލާއި ވިލިމާލޭ ޒުވާނުންގެ މަރުކަޒުންނެވެ.