ގޭތެރޭގެ މަސައްކަތުގައި އަންހެނުންނަށް އެހީތެރިވެދެންތަ؟

ކުރީޒަމާނުގައި ގޭތެރޭގެ މަސައްކަތްތަކަކީ އަންހެނުންނަށް ހާއްސަވެފައިވާ މަސައްކަތްތަކެކޭ ބުނުމަކީ ދޮގަކަށް ނުވާނެއެވެ. ދަރިން ބެލުމާއި، ކެއްކުމާއި، ގޭތެރެ ސާފުރުމާއި މިހުރިހައި ކަންކަން ވެފައިވަނީ ހަމައެކަނި އަންހެން މީހާ ކުރާ މަސައްކަތަކަށެވެ. މިފަދަ މަސައްކަތެއް ފިރެހެނަކު ކޮށްފިނަމަ މުޖްތަމައުގެ ފާޑުކިޔުންތައް އަމާޒުވެ އެމީހަކީ އަނބި ދަށުވެފައިވާ މީހެއްކަމަށްބުނެ ލޭބަލްވެސް ކުރެއެވެ. ނަމަވެސް އެއިރު މުޖްތަމައުއަށް ނޭންގޭ ކަމަކީ ދިރިއުޅުމުގެ ކޮންމެ ކަމެއްގައި އަނބިމީހާއާއި ފިރިމީހާގެ ހިއްސާ އޮންނަކަމެވެ.

ޒަމާން ބަދަލުވެގެން އައިސް މުޖްތަމައު ހޭލުންތެރިވާން ފެށުމުގެ ސަބަބުން މިކަމާއިމެދު މީހުން ދެކެމުންއަންނަ ގޮތް ކޮންމެވެސް ވަރަކަށް އަންނަނީ ބަދަލުވަމުންނެވެ. ނަމަވެސް އަދިވެސް އެންމެ އެކަށީގެންވާ ގޮތެއްގައި ގޭތެރޭގެ ކަންކަމުގައި އަންހެނުންނާއި ފިރެހެނުން ހަމަހަމައެކޭ ދެންނެވޭކަށްނެތެވެ.

advertisement

ދާދިފަހުން “މޯލްޑިވްސް އޮޕީނިއަން ނެޓްވަރކް” އިން ވަނީ ގޭތެރޭގެ މަސައްކަތްތަކާއި ކުދިންބެލުން އެންމެ ގިނައިން ކުރަނީ ކޮންބައެއްތޯ ބެލުމަށް ދިރާސާއެއްވެސް ކުރިއަށްގެންގޮސްފައެވެ.

މި ދިރާސާއިން ދައްކާގޮތުގައިވެސް ގޭތެރޭގެ މަސައްކަތްތައް ގިނައިން ކުރަނީ އަންހެނުންނެވެ. ދިރާސާގައި ބައިވެރިވި %60 މީހުން ބުނެފައިވަނީ ގޭތެރޭގެ ގިނަ މަސައްކަތްތައް ކުރަނީ އަންހެނުންކަމަށެވެ. %40 މީހުން ބުނެފައިވަނީ ގޭތެރޭގެ މަސައްކަތް ކުރަނީ ބައިވެރިޔާއާއި 2 މީހުން އެއްވަރަކަށް ހިއްސާވެގެންކަމަށެވެ. އަދި ދިރާސާގައި ބައިވެރިވި އެކަކުވެސް ގޭތެރޭގެ ގިނަ މަސައްކަތްތައް ކުރަނީ ފިރެހެނުންކަމަށް ބުނެފައެއް ނުވެއެވެ.

މިއަދުގެ މުޖްތަމައުގައި ފިރެހެނުންނެކޭ އެއްފަދައިން އަންހެނުންވެސް ތައުލީމު ހާސިލްކުރުމާއި ވަޒީފާގެ މައިޒާނުގައި އަންނަނީ ހަރަކާތްތެރިވަމުންނެވެ. ހުރިހައި ކަމެއްގައިވެސް ފިރެހެނުންނާއި އަންހެނުން ހަމަހަމަކަމަށްބުނެ އަންނަނީ ވަކާލާތުކުރަމުންނެވެ. އެހެންކަމުން ގޭތެރޭގެ މަސައްކަތުގައި އަންހެނުންނާއި ފިރެހެނުން ހަމަހަމަ ނުވާންވީ ކީތްވެހެއްޔެވެ.؟

ކުރިއާއި އަޅާބަލާއިރު މިހާރު ދިރިއުޅުމުގައި ކުދިންބެލުމާއި ގޭތެރޭގެ މަސައްކަތުގައި ފިރެހެނުން ބައިވެރިވާލެއް ވަނީ އިތުރުވެފައެވެ. އެހެންނަމަވެސް އަދިވެސް ގިނަފަހަރު ގޭތެރޭގެ ގިނަ މަސައްކަތްތައް ކުރަންޖެހެނީ އަންހެނުންނަށެވެ. މި މަސައްކަތަކީ ހަމައެކަނި އަންހެން މީހާ ކުރާ މަސައްކަތަކަށް ވުމުގެ ބަދަލުގައި ކެއްކުމާއި، ދަރިންބެލުމާއި، އަދި އެނޫންވެސް ގޭތެރޭގެ މަސައްކަތުގައި 2 މީހުން އެއްވަރަކަށް ހިއްސާވެގެން ކުރާނަމަ ފަސޭހަވެގެންދާނެއެވެ. އަދި މިއީ އާއިލީ ގުޅުން ބަދަހިވެ ދެމަފިރިންގެ ދެމެދުގައި އޮންނަ ލޮތްބާއި، ޔަޤީންކަންވެސް އިތުރުވެގެންދާނެކަމެކެވެ.