ދައުލަތުގެ އާމްދަނީ 5 ބިލިއަނުގައި، ހަރަދު 7 ބިލިއަނުގައި

ދައުލަތަށް އާމްދަނީގެ ގޮތުގައި މިއަހަރުގެ މިހާތަނަށް ފަސް ބިލިއަން ރުފިޔާ ލިބުނުއިރު، ހަރަދުގެ ގޮތުގައި ހަތް ބިލިއަން ރުފިޔާ ހޭދަ ކޮށްފައިވާކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ފިނޭންސް މިނިސްޓްރީގެ “ވީކްލީ ފިޒްކަސް ޑިވެލޮޕްމަންޓް” އިން ދައްކާ ގޮތުން މި މަހުގެ 15 ވަނަ ދުވަހުގެ ނިޔަލަށް ދައުތަލަށް އާމްދަނީގެ ގޮތުގައި ލިބުނީ 5.4 ބިލިއަން ރުފިޔާ އެވެ. އޭގެ ތެރޭގައި ހިމެނެނީ ޓެކްސްގެ ގޮތުގައި ދައުލަތަށް ލިބުނު 4.3 ބިލިއަން ރުފިޔާ އާއި ޓެކްސް ނޫން ގޮތްގޮތުން ދައުލަތަށް ލިބުނު އެއް ބިލިއަން ރުފިޔާ އާއި ހިލޭ އެހީން ލިބުނު 55 މިލިއަން ރުފިޔާ އެވެ.

advertisement

އެ ރިޕޯޓް ދައްކާ ގޮތުން މި މުއްދަތުގައި ސަރުކާރުން މި އަހަރުގެ މިހާތަނަށް 7.5 ބިލިއަން ރުފިޔާ ހަރަދު ކޮށްފައި ވެއެވެ.

މި މުއްދަތުގެ ތެރޭގައި ސަރުކާރުން ކުރި ހަރަދު 7 ބިލިއަނުގައި އުޅޭއިރު މީގެތެރެއިން އެންމެ ބޮޑުބައެއް ހަރަދުކޮށްފައިވަނީ ރިކަރަންޓް ހަރަދުތަކަށެވެ. އެއީ ހަރަދުކުރި އަދަދުން ބަލާނަމަ %75 އެވެ. އަދި ކެޕިޓަލް ހަރަދުތަކަށް %25 ވަނީ ހަރަދުކޮށްފައެވެ.