ރޯދަ މަހުގައި ކާބޯތަކެތީގެ އިސްރާފް ބޮޑު، ހަދާނީ ކިހިނެއް؟

އުކާލަން ޖެހޭވަރަށް ގޭގައި ކާއެއްޗެހި ތައްޔާރުކުރެވޭ ހެއްޔެވެ؟ މިތަކެއްޗަށް ހަދާނެގޮތެއް ނޭންގި އިސްރާފު ކުރެވޭހެއްޔެވެ؟ ގިނަ ގޭގޭގައި ބޭނުންވާ ވަރަށް ވުރެ އިތުރަށް ކާއެއްޗެހި ތައްޔާރުކުރެވޭ ފަހަރު އާދެއެވެ. ޙާއްސަކޮށް ރަމަޟާންމަހު އިސްރާފު ކުރެވޭ މިންވަރު އިތުރުވެގެންދެއެވެ. ރޯދައަށް ހުންނައިރު ވަރަށް ގިނަ އެއްޗެހި ކާލާނަމޭ ހިތައްއަރައި ތައްޔާރުކުރެވެއެވެ. އެހެންނަމަވެސް ރޯދަ ވީއްލާގަޑީގައި އަދި ތަރާވީސް ގަޑީގައިވެސް ކެވެނީ މީގެއިން ވަރަށް މަދު އެއްޗެކެވެ. ގިނަ ބައި ވަނީ އިސްރާފެވެ. އެހެންނަމަވެސް އިސްރާފުކުރުމަކީ ރަނގަޅުކަމެއްނޫނެވެ.

ގަބޫލުކުރަން ދަތިވިއަސް އަޅުގަނޑުމެންގެ މި މުޖްތަމައުގައި ކާނެ އެއްޗެއް ނުލިބި އުޅޭ މީހުންވެސް ވަރަށް ގިނައެވެ. ކޯވިޑް19 އާއިއެކު ގިނަ ބައެއްގެ ވަޒީފާގެއްލި އާމްދަނީ ލިބޭނެ މަގު ބަންދުވުމުގެ ސަބަބުން ހާލުގައި ޖެހިފައިވާ މީހުންގެ އަދަދު ވަނީ އިތުރުވެފައެވެ. އެހެންކަމުން މިފަދަ މާތް މައްސަރެއްގައި ކާއެއްޗެހި އުކާލުމުގެ ބަދަލުގައި އެތަކެތި ބޭނުންޖެހިފައިވާ ބަޔަކާއި ހަމައަށް ފޯރުކޮށްދިނުމަކީ ސަވާބު ލިބިގެންދާނެކަމެކެވެ. ގޭގައި ނުކެވި އުކާލެވޭ ތަކެތި އެއަށް ބޭނުންޖެހިފައިވާ މީހުންނަށް ދޭނީ ކިހިނެތްތޯ ބައެއް މީހުންގެ ހިތައް އަރާފާނެއެވެ. ދިވެހި ޒުވާނުންތަކެއް އިސްނަގައިގެން މިކަމަށް މިރޯދަމަހުމިވަނީ ހައްލު ހޯދާދީފައެވެ.

advertisement

“އެންމެން ކައިގެން” ގެ ނަމުގައި ކާއެއްޗެހި ނުލިބިފައިވާ ފަރާތްތަކަށް މި ރަމަޟާންމަހު ކާތަކެތި ފޯރުކޮށްދިނުމަށް ވަނީ ހާއްސަ ހަރަކާތެއް ފަށާފައެވެ. ހ.މުނިއުފާ ނުވަތަ ހެންވޭރު ޔޫތު ސެންޓަރުގައި މިކަމަށް ޚާއްސަ ޓެންޓެއް ވަނީ ޖަހާފައެވެ. ގޭގައި ނުކެވި ބާކީވާ ތަކެތި މިތަނަށް ގެނައުމުން ކާއެއްޗެހި ނުލިބި އެއަށް ބޭނުންޖެހިފައިވާ ފަރާތްތަކަށް ފޯރުކޮށްދޭނެއެވެ. މިތަނުން ތަކެތި ބަލައިގަންނާނީ ކޮންމެ ރެއެއްގެ 21:30އިން ފެށިގެން 12:00 ޖެހުމާ ހަމައަށެވެ. މި ހަރަކާތް ފަށާފައިވަނީ މިމަހުގެ 20 ވަނަ ދުވަހުއެވެ.

އެންމެން ކައިގެން މޫވްމަންޓަކީ ގޭގައި ބާކީވާ ކާބޯތަކެތި ރައްކާތެރިކަމާއެކު އެކަމަށް އެދިއެދި ތިބި މީހުނަށް ފޯރުކޮށްދިނުމަށް ހިންގާ ޙަރަކާތެކެވެ. އެހެންކަމުން ކާބޯތަކެތި ގެންނައިރު ޑިސްޕޯސަބަލް ތަކެތީގައި ބަންދުކޮށްގެން ގެނައުމަށް މިޙަރަކާތް އިންތިޒާމުކުރާ ފަރާތްތަކުން އެދެއެވެ. އަދި އެއްވެސް މީހަކު ނެތްނަމަ ކާތަކެތި ދޫކޮށްލާފައި ނުދިޔުމަކީވެސް އެފަރާތްތަކުގެ އެދުމެކެވެ.

ކާއެއްޗެހި ނުލިބޭ ގިނަ ބަޔަކު މި މުޖްތަމައުގައި އުޅެމުންދާއިރު ކޮންމެ މީހަކުވެސް މަސައްކަތްކުރަންވީ އިސްރާފު ނުކުރުމަށެވެ. އަދި ގޭގައި ނުކެވި ބާކީވާ ތަކެތިވެސް އުކާލުމުގެ ބަދަލުގައި އެތަކެތި ބޭނުންޖެހިފައިވާ އެހެން މީހަކަށް ފޯރުކޮށްދިނުމަށެވެ.