ފަރުދީ ޒިންމާ އަދާނުކޮށް ކޯވިޑްގެ ކޭސްތައް ދަށްކުރެވޭކަށް ނެތް!

ކޯވިޑް19 ގެ ކޭސްތައް އަނެއްކާވެސް ރާއްޖޭގައި އަންނަނީ ކަންބޮޑުވާންޖެހޭ ބާރުމިނެއްގައި އިތުރުވަމުންނެވެ. ކޯވިޑްގެ ކޭސްތައް 100 އިން ދަށުގައި ހުރުމަށްފަހު މިހާރު ކޭސްތަކުގެ އަދަދު މިވަނީ 200 އިން މައްޗަށް އަރައި 300 އާއި ގާތްކޮށްފައެވެ. އަނެއްކާވެސް ރާއްޖެއަށް ކޯވިޑްގެ އިތުރު ރާޅެއް އަންނަން އުޅޭކަމުގެ އިޝާރާތެއް މިވަނީ ވެފައެވެ.

ރާއްޖޭގައި ކޯވިޑްގެ ކޭސްތައް އިތުރުވާން އަނެއްކާވެސް ފަށާފައިމިވަނީ ސަރުކާރުން ގިނަ ލުއިތަކެއް ދީފައިވާ ދަނޑިވަޅެއްގައެވެ. ދުނިޔޭގެ ބައެއް ބޮޑެތި އެހެން ޤައުމުތަކުގައިވެސް ސަރުކާރުން ދިން ލުއިތަކާއިއެކު ކޯވިޑްގެ ކޭސްތައް އިތުރުވެ އެ ޤައުމުތަކުގެ ސިއްހީ ނިޒާމަށް ވަނީ ނުކަތާވަރުވެފައެވެ. މީގެ އެއް މިސާލަކީ އަވަށްޓެރި އިންޑިއާއެވެ. އިންޑިއާގައި ކޯވިޑްގެ ކޭސްތައް އާދަޔާ ހިލާފަށް މަތިވެފައިމިވަނީ އެ ޤައުމުގެ ސަރުކާރުން ބޮޑެތި ލުއިތަކެއް ދިނުމާއި ގުޅިގެންނެވެ. މިއާއިއެކު އަނެއްކާވެސް ވަނީ ފިޔަވަޅުތައް ވަރުގަދަކޮށްފައެވެ.

advertisement

ރާއްޖޭގައިވެސް ކޯވިޑް19 ގެ ސަބަބުން އަޅާފައިވާ ފިޔަވަޅުތަކަށް މިހާރު ސަރުކާރުން ވަނީ ބޮޑެތި ލުއިތަކެއް ދީފައެވެ. އޭގެތެރޭގައި ކާފިއުގެ ވަގުތު އުވާލުމާއި، ކެފޭ ރެސްޓޯރަންޓްތައް ހުޅުވާފައި ހުންނަ ވަގުތުތައްވެސް ވަނީ އިތުރުކޮށްފައެވެ. މިހާރު ދަންވަރު 3 ޖެހުމާއި ހަމައަށް ކެފޭ ރެސްޓޯރަންޓްތައް ހުޅުވުމުގެ ހުއްދަ ވަނީ ދީފައެވެ. އަދި ބޭރުގައި އުޅުމަށް އެއްވެސް ހުރަހެއް ނެތެވެ.

ސަރުކާރުން އަޅާފައިވާ ފިޔަވަޅުތަކަށް ލުއިތަކެއް ދީފައިވަނީވެސް ގިނަ ބަޔަކު މިކަމުގެ ކަންބޮޑުވުން ފާޅުކުރި ދަނޑިވަޅެއްގައެވެ. އޭގެތެރޭގައި ވިޔަފާރިވެރިން ހިމެނެއެވެ. ވިޔަފާރިވެރިން ބުނެފައިވަނީ ރަމަޟާންމަހުގެ ކުރިން ކެފޭ ރެސްޓޯރަންޓްތައް ހުޅުވާފައި ހުންނަ ވަގުތުތަކުގައި ހިދުމަތްދޭނަމަ މުޅި ކެފޭ ރެސްޓޯރަންޓް ވިޔަފާރި ބަނގުރޫޓުވެގެންދާނެކަމަށެވެ. މިނޫނަސް އާންމު ގިނަ ފަރާތްތަކަކުން އެއިރު ސަރުކާރުން އާޅފައިވާ ފިޔަވަޅުތަކަށް ލުއިތަކެއް ދިނުމަށް ގޮވާލިއެވެ. އެހެންނަމަވެސް ލުއިތައް ދިނުމާއިއެކު އަނެއްކާވެސް މިވަނީ ކޯވިޑްގެ ނަންބަރުތައް އިތުރުވާން ފަށާފައެވެ.

އަނެއްކާވެސް ނަންބަރުތައް އިތުރުވާން ފެށުމާއިއެކު ފިޔަވަޅުތައް ވަރުގަދަކުރުމަށް ބައެއް ފަރާތްތަކުން ދަނީ ގޮވާލަމުންނެވެ. ނަމަވެސް ހަޤީޤަތަކީ އަޅުގަނޑުމެންގެ ދިރިއުޅުން މިހާރު ބައްޓަން ކުރަންޖެހިފައިވަނީ ކޯވިޑް19 އާއިއެކުގައިކަމެވެ. އަބަދަކު ޤައުމު ލޮކްޑައުންކޮށްފައެއް ނުބޭއްވޭނެއެވެ. އިޤްތިޞާދަށް މިހާބޮޑު ހީނަރުކަމެއް އައިސްފައިވާ ދަނޑިވަޅެއްގައި އެތައް ބައެއްގެ ވަޒީފާ ގެއްލުނު ދަނޑިވަޅެއްގައި އަލުން ޤައުމު ކުރިއަރަންފަށާފައިވަނީ ބުރަ މަސައްކަތަކުންނެވެ. އެހެންކަމުން ވިޔަފާރިތައް އަލުން ހިނގައިގަތުމަށް ފުރުސަތު ފަހިކޮށްދޭންޖެހެއެވެ. ފިޔަވަޅުތައް ވަރުގަދަކޮށް ގިނަ ބައެއްގެ ވަޒީފާ ގެއްލުމުން އެތައް އާއިލާއެއް އަނެއްކާވެސް ނިކަމެތިވެގެންދާނެއެވެ. މީގެ ބަދަލުގައި ކޯވިޑާއި އެކު އުޅެން އަޅުގަނޑުމެން ވީ ދަސްކުރާށެވެ. ފަރުދީ ޒިންމާވީ އަދާކުރާށެވެ. ބޭރަށްދިއުންވީ މަދުކުރާށެވެ. ހަފްލާތަކާއި ޕާޓީތައްވީ އިހަށް މެދުކަނޑާލާށެވެ. ޕިކްނިކްތަކަށްވީ އިހަށް ނުދާށެވެ. ކޮންމެ ފަހަރަކު ސަރުކާރުގެ ބޮލުގައި އެޅުވުމުގެ ބަދަލުގައި އަމިއްލަ ފަރުދީ ޒިންމާ އަދާކޮށް ކޯވިޑްގެ ކޭސްތައްވީ ދަށްކުރާށެވެ.

ކޯވިޑުން ރައްކާތެރިވުމަށް ކުރަންޖެހެނީ ފަސޭހަ އަދި މަދު ކަންތައްތަކެކެވެ. ބޭރަށް ދާއިރު މާސްކް އެޅުމާއި، އިޖްތިމާއި ގައިދުރުކަން ބެހެއްޓުމާއި، ގިނަގިނައިން އަތޮ ދޮވުމެވެ. ނުވަތަ ހޭންޑް ސެނިޓައިޒަރ ބޭނުންކުރުމެވެ. މިކަންކަން އެންމެން ބަރާބަރަށް ކުރާނަމަ އިރާދަކުރެއްވިއްޔާ އަޅުގަނޑުމެންގެ މި މުޖްތަމައުގައި ކޯވިޑްގެ ކޭސްތައް ދައްކުރެވޭނެއެވެ. ސިއްހީ މާހިރުން މިކަމުގައި ޔަޤީންކަން ދެއްވައެވެ.