ކުޑަކުދިންނަށް ޖިންސީ ގޯނާ ކުރުމުގެ ކުށެއް ސާބިތުވެފައިވާނަމަ ވަކި ވަޒީފާއެއް ނުލިބޭ ގޮތައް ކަނޑައަޅަނީ

ކުޑަކުދިންނަށް ޖިންސީ ގޯނާ ކުރުމުގެ ކުށެއް ސާބިތުވެފައިވާ މީހަކަށް ކުޑަކުދިންނަށް މުއާމަލާތް ކުރަން ޖެހޭ ވަޒީފާއެއް ނުލިބޭނެ ގޮތަށް ސިވިލް ސާވިސް ގާނޫނު ކޮމިޓީއިން އިސްލާހުކޮށްފި އެވެ.

ސިވިލް ސާވިސް ގާނޫނަށް އިސްލާހު ހުށަހެޅުއްވީ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް އެވެ. ފުރަތަމަ އެ އިސްލާހު މަޖިލީހަށް ހުށަހެޅުއްވި އިރު ސިވިލް ސާވިސްގެ ވަޒީފާއަށް އައްޔަން ކުރުމުގެ ޝަރުތު ތަކަށް އެއްވެސް ބަދަލެއް ގެންނަން ހިމަނާފަ އެއް ނުވެ އެވެ.

advertisement

ސިވިލް ސާވިސް ގާނޫނަށް ގެންނަ އިސްލާހު ތަކުގެ ބިލު ކޮމިޓީއިން ފާސްކޮށްފައިވާއިރު އެ ގާނޫނުގެ 41 ވަނަ މާއްދާއަށް އަކުރެއް އިތުރު ކުރުމަށް ވަނީ ނިންމާފަ އެވެ. އެ މާއްދާގައި ބުނެފައިވަނީ ކުޑަކުދިންނަށް ޖިންސީ ގޯނާ ކުރުމުގެ ކުށެއް ސާބިތުވެފައިވާ މީހަކަށް ކުޑަކުދިންނާ މުއާމަލާތް ކުރަންޖެހޭ ވަޒީފާއެއް ދީގެން ނުވާނެ ކަމަށެވެ.

އއިސްލާމްދީނުގައި ހައްދެއް ކަނޑައެޅިފައިވާ ކުށެއް ކުރިކަން ނުވަތަ ވައްކަން ޓެކުން، މަކަރާއި ހީލަތް ހެދުން އަދި ހިޔާނާތް ފަދަ ބޮޑުކުށެއް ކުރިކަން ވޭތުވެދިޔަ ފަސް އަހަރު ދުވަހުގެ ތެރޭގައި ޝަރީއަތަށް ސާބިތުވެފައިވާ މީހަކަށް ސިވިލް ސާވިސްގެ ވަޒީފާ ނުލިބޭނެ ކަމަށް އެ ޤާނޫނުގައި ވަނީ ބުނެފައެވެ.

ކޮމިޓީއިން އެ ގާނޫނުގެ 41 ވަނަ މާއްދާއަށް (ރ)ގެ ގޮތުގައި އަކުރެއް އިތުރު ކުރިއިރު ބުނެފައިވަނީ 41 ވަނަ މާއްދާގެ (ހ) ގެ ހަތަރުވަނަ ނަމްބަރުގައި އެހެން ބުނި ނަމަވެސް ކުޑަކުދިންނަށް ޖިންސީ ގޯނާކުރި ކަމުގެ ކުށެއް ސާބިތުވެއްޖެ ނަމަ ކުޑަކުދިންނާ މުއާމަލާތް ކުރަން ޖެހޭ ވަޒީފާއެއް ދީގެން ނުވާނެ ކަމަށެވެ.