ޖުލައި 1 ގައި އިންޓަނެޓް އަގުހެޔޮކުރަން އަދި ނުނިންމާ – މިނިސްޓަރ

ޖުލައި 1 ވަނަ ދުވަހު އިންޓަނެޓްގެ އަގުހެޔޮކުރާނެކަމަށް ދެކެވޭވާހަކަތައް ކޮމިއުނިކޭޝަން މިނިސްޓްރީ ހިންގެވުމާއި ވަގުތީ ގޮތުން ހަވާލުވެ ހުންނެވި އިކޮނޮމިކް މިނިސްޓަރު ފައްޔާޒް އިސްމާއީލް ދޮގުކުރައްވައިފިއެވެ.

ފައްޔާޒު ވިދާޅުވީ ސަރުކާރުން ވެފައިވާ ވައުދު ފުއްދެވުމަށް ހިދުމަތްދޭ ކުންފުނިތަކާ ވާހަކަ ދައްކާ މަޝްވަރާ ކުރަމުންދާ ކަމަށެވެ. ނަމަވެސް މިވަގުތަށް ވަކި މުއްދަތަކަށް އަދި ވަކި އަގުތަކަކަށް އެއްބަސްވެވިފައިނުވާ ކަމަށެވެ. ނަމަވެސް އިންޓަނެޓްގެ އަގަށް ހެޔޮ ބަދަލުތަކެއް ގެނެސްދެއްވާނެ ކަމުގެ ޔަގީންކަން ވަނީ ދެއްވާފައެވެ.

advertisement

ފެބްރުއަރީ މަހުގެ 10 ވަނަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސްގެ ތަރުޖަމާނު މަބްރޫކް އަބްދުލް އަޒީޒް ވިދާޅުވީ ދުރު ރާސްތާ ވިސްނުމުގެ ތެރެއިން އިންޓަނެޓްގެ އަގު ހެޔޮ ކުރެވޭނެ ކަމަށެވެ. ނަމަވެސް އެކަމާ ގުޅޭ މާބޮޑު ތަފްސީލެއް އޭނާ އެ ދުވަހު ނުދެއްވަ އެވެ.

ރާއްޖޭގެ ނޫސްތަކުން ރިޕޯޓްކޮށްފައިވަނީ ރާއްޖޭގައި މިހާރު ދޭ އިންޓަނެޓްގެ ހިދުމަތުގެ އަގު އަންނަ ޖުލައި 1 އިން ފެށިގެން ހެޔޮކުރަން ނިންމައި، އަގުތަކާ މެދު މަޝްވަރާ ކުރަން ފަށާފައިވާކަމަށެވެ. އަދި ހެޔޮކުރާ އަގުތައްވެސް ނޫސްތަކުގައި ވަނީ ހާމަކޮށްފައެވެ.