ހިޔާލުފާޅުކުރާ ކޮންމެ ފަހަރަކު ޕެޕަރ ސްޕްރޭ ޖަހަންވީތަ؟

މަސައްކަތްތެރިންގެ ދުވަހާއި ގުޅުވައިގެން މާލޭގައި މޭމަހުގެ 1 ވަނަ ދުވަހުގެ ރޭ ބޭއްވި އެއްވުން ފުލުހުންގެ ބާރުގެ ބޭނުންކޮށްގެން ރޫޅާލުމާއި ގުޅިގެން ގިނަ ބައެއްގެ ފާޑުކިޔުންތައް ވަނީ ފުލުހުންގެ މުވައްސަސާއަށް ކުރިމަތިވެފައެވެ.

މި އެއްވުމަކީ މަސައްކަތުގެ މާހައުލުމުގައި ލިބެމުންދާ ޖިންސީ ގޯނާ އާއި ފުރައްސާރައާ ދެކޮޅަށް ޒުވާނުންތަކެއް އިސްނަގައިގެން ބޭއްވި އެއްވުމެކެވެ. މި އެއްވުން ފަށާފައިވަނީ ރަސްފަންނު ސަރަހައްދުން މޭމަހުގެ 1 ވަނަ ދުވަހުގެ ރެއެވެ.

advertisement

“ރައިޒް އަޕް އެމްވީ” ގެ ނަމުގައި ޒުވާނުންތަކެއް އިސްވެ އުފައްދާފައިވާ ހަރަކާތުން ރަސްފަންނު ސަރަހައްދުގައި ޝުއޫރު ފާޅު ކުރުމަށް ފަހު މަޖީދީ މަގަށް ހިނގައިގަތުމާއެކު، އެ ސަރަހައްދުގައި ހަރަކާތްތެރިވި ފުލުހުން ވަނީ މުޒާހަރާގެ ބައިވެރިންގެ ގަޔަށް ޕެޕަ ސްޕްރޭ ޖަހައިފައެވެ. އަދި އަނިޔާވެރި ގޮތަކަށް ދަމާފައި ގެންދާ މަންޒަރު ފެންނަ ވީޑިއޯއާއި ފޮޓޯ ވަނީ މީސް މީޑިއާގައި ދައުރުވެފައެވެ. މިކަން ގިނަ ބަޔަކު ވަނީ ކުއްވެރިވެސްކޮށްފައެވެ.

ޖާނަލިސްޓު އެސޯސިއޭޝަން އިން ބުނެފައިވަނީ އެއްވުމުގައި ހަރަކާތްތެރިވި ބައެއް ނޫސްވެރިންނަށް އަނިޔާކޮށް ހަޑި ހުތުރު ބަހުން ފުލުހުން މުއާމަލާތްކޮށްފައިވާ ކަމަށެވެ. އެމްޖޭއޭ އިން ކުރި ޓްވީޓެއްގައި ވިދާޅުވެފައި ވަނީ، މުޒާހަރާގެ ތެރެއިން ގާނޫނާ ހިލާފަށް ފުލުހުން އެ މުޒާހަރާ ކަވާކުރަން މަސައްކަތްކުރަމުން ދިޔަ ނޫސްވެރިންނަށް ގެއްލުން ދީފައިވާކަމުގެ ރިޕޯޓުތައް އެ އެސޯސިއޭޝަނަށް ނޫސްވެރިން ހުށަހަޅާފައިވާ ކަމަށެވެ. އަދި މިއީ ފުލުހުން ނޫސްވެރިނަށް ފާޅުގައި ކޮށްފައިވާ ފުރައްސާރައެއް ކަމަށް އެ އެސޯސިއޭޝަނުން ވަނީ ވިދާޅުވެފައެވެ.

މި މުޒާހަރާ ކުރިއަށް ދިޔަ ވަގުތު އެ އެސޯސިއޭޝަނުން ވާނީ ތަކުރާރުކޮށް ފުލުހުންނަށް ނޫސްވެރިންގެ މަސައްކަތަށް ހުރަސް ނޭޅުމަށް އަންގާފައި ކަމަށާއި، ފުލުހުންގެ މިފަދަ ކޮންމެ ކަމެއްގައި ޓާގެޓަކަށް ނޫސްވެރިން ހެދުމަކީ ކަންބޮޑުވާކަމެއް ކަމަށް ޖާނަލިސްޓް އެސޯސިއޭޝަން އިން ވަނީ ވިދާޅުވެފައެވެ.

މުޒާހަރާ ރޫޅާލުމުގައި ފުލުހުން ކުރި އަނިޔާގެ މައްސަލަ ހިއުމަން ރައިޓްސް ކޮމިޝަން (އެޗްއާރުސީއެމް) އިންވެސް ވަނީ ބަލަން ފަށާފައެވެ. އެޗްއާރުސީއެމްއިން ކުރި ޓްވީޓެއްގައި ބުނީ މަސައްކަތްތެރިންގެ ދުވަހާ ގުޅިގެން ޒުވާނުންތަކެއް މާލޭގައި ބޭއްވި އެއްވުން ރޫޅާލުމުގައި ފުލުހުން ބާރުގެ ބޭނުން ކުރި ގޮތާ މެދު ކަންބޮޑުވުންތަކެއް އެބަ ހުރި ކަމަށެވެ.

މިކަމާއިމެދު ގިނަ ބައެއްގެ ފާޑުކިޔުންތައް އަމާޒުވުމުގެ ސަބަބުން ފުލުހުން ވަނީ މުޒާހަރާ ރޫޅާލި ފުލުހުން މަސްއޫލިއްތު ތަކުން ދުރުކޮށްފައިވާ ކަމަށް ވިދާޅުވެފައެވެ.

ހިޔާލު ފަޅުކުރުމުގެ މިނިވަންކަމަކީ ހަމަ ކޮންމެ މީހަކަށްވެސް ލިބިގެންވާ ހައްގެކެވެ. އެހެންކަމުން ހިޔާލުފަޅުކުރުމުގެ ފުރިހަމަ މިނިވަންކަން ސަރުކާރުގެ މުވައްސަސާތަކުންވެސް ރައްޔިތުންނަށް ފަހިކޮށްދޭން ޖެހެއެވެ.