ރިޕޯޓު: އެޗްޕީއޭ އަށް ބިލިއަނުން ކުރި ހަރަދު: ނަތީޖާ ސުމެއް!

ޗައިނާ އިން ފެތުރިގަތް ކޮވިޑްގެ ރާޅު ރާއްޖެ އަށް އަތުވެދާނެ ކަމަށްޓަކައި ސަރުކަރުން ކުރިޔާލާ ތައްޔާރުވިއެވެ. އެކަމުގެ އިސް ފަރާތަކީ ހެލްތު ޕްރޮޓެކްޝަން އެޖެންސީ (އެޗްޕީއޭ) ކަމުގައި ކަނޑައަޅައި މަސައްކަތްތަކެއް ފެށިއެވެ. ބޯޑު ބަންދުކުރުމުގެ ކުރިން ކަރަންޓީން ފެސިލީޓީތައް ތައްޔާރުކުރިއެވެ. ބޭރުން އަންނަހާ ބަޔަކާއި ކަރަންޓީންކުރަންޖެހޭ އެންމެން ރިސޯޓްތަކާއި ޓުއަރިސްޓް ފެސިލިޓީތަކުގައި ބައިތިއްބައިގެން މޮޅެތިހެން ހީވާ ކެއުން ދީގެން ބޮޑެތި ހޭދަތަކެއް ސަރުކާރުން ކުރިއެވެ. ބަލި އެހާ ވަރަށް ކޮންޓްރޯލްކުރެވުނީ މި ފިޔަވަޅުތަކުގެ ސަބަބުން ކަމާ މެދު ބަހުސެއް ނެތެވެ. ބަހުސްކުރެވެނީ އަދި އާންމުންގެ ސުވާލުތައް ފެންމަތިވެފައި ވަނީ އޭގެ ފަހުން ހިނގައިދިޔަ ކަންކަމާ ގުޅިގެންނެވެ.

އެޗްޕީއޭގެ ލަފާގެ މަތިން ސަރުކާރުން ދިޔައީ ގިނަ ފިޔަވަޅުތަކެއް އަޅަމުންނެވެ. ކޮވިޑްގެ ހުރިހާ ކަމެއް ނިންމުމުގެ ބާރު އެޗްޕީއޭ އާއި ޓެކް ޓީމަށް ދޫކޮށްލީ ވަރަށް އިތުބާރުކޮށްފައެވެ. ސަރުކާރުގެ ޒިންމާއަކަށް އޮތީ އެކަމަށްޓަކައި ކުރަންޖެހޭ ހޭދަ ކުރުމެވެ. ސަރުކާރުން އައީ އެކަން ކޮށްދެމުންނެވެ. މިހާތަނަށް ތިން ބިލިއަނަށް ވުރެ ގިނަ ރުފިޔާ އެ ބޭނުމަށްޓަކައި ސަރުކާރުން ހަރަދުކޮށްފިއެވެ. ނަމަވެސް އާންމުންގެ ސުވާލަކީ ކުރި ހޭދައާ އަދި ކުރަމުން ދާ ހަރަދާ ބަލާފައި ނަތީޖާއަކީ ކޮބައިހެއްޔެވެ؟ އެޗްޕީއޭ އަށް ކުރި އިތުބާރު ދެމެހެއްޓިއްޖެ ހެއްޔެވެ؟

advertisement

ކަރަންޓީން ކުރަންޖެހޭ އެންމެން އަގުބޮޑު ރިސޯޓްތަކާއި ހޮޓާތަކަށް ގެންދާތީ ވެސް ގިނަ ބަޔަކު ފާޑުކިޔެވެ. އެ ފަރާތްތަކުގެ ކެއިން ބުއިމަށް ކުރި ހޭދައާ މެދު ވެސް ސުވާލު އުފެއްދިއެވެ. ނަމަވެސް ރާއްޖޭގެ ހާލަތު ގޯހުން ގޯހަށް ނުގޮސް ހިފެހެއްޓުނީތީ އެކަމާ މެދު ޝަކުވާކުރާ މީހުން އޭރު އެހާ ގިނައެއް ނޫނެވެ. އެޗްޕީއޭގެ އިންތިޒާމްތަކާ މެދު އޭރު ވެސް ބައެއް ފަރާތްތަކުން ސުވާލު އުފައްދަމުންދިޔައެވެ. ލޮކްޑައުން އަށް ފަހު އާންމު ހާލަތަށް ރުޖޫއަވުމަށް ކުރި ދަތުރުގައި އެޗްޕީއޭ އިން އެޅި ފިޔަވަޅުތަކާ މެދު އެތައް ބަޔަކު ސުވާލު އުފެއްދިއެވެ.

ގިނަ ބައެއްގެ ޝަކުވާ އޮތީ އެޗްޕީއޭ އިން ނެރޭ ގައިޑްލައިންތަކާ މެދުއެވެ. އެކި ފަހަރު އެކި ގޮތްގޮތަށް ގައިޑްލައިތައް ނެރުމާއި ވަކި ބަޔަކު ރުއްސުމަށް ގައިޑްލައިންތައް ހަދާކަން ވަނީ ފާހަގަކުރެވިފައެވެ. ހާއްސަކޮށް ސިޔާސީ ފަރާތްތައް ރުއްސުމަށް ގައިޑްލައިތައް ހެދުމާއި ސިޔާސީ ބޭނުންތަކަށް ލުއިދިނުމާއި ސަރުކާރުގެ ވެރިންނަށް ވަކި ގޮތެއް، އާންމުން އަމަލުކުރުމަށް ވަކި ގޮތެއް ކަނޑައެޅުމަކީ އެޗްޕީއޭ އަށް އާންމުގެ އިތުބާރު ގެއްލެން މެދުވެރިވި ސަބަބެކެވެ. އެޗްޕީއޭގެ ގައިޑްލައިންތައް މިހާރު މީހުން ނަގަނީ ޖޯކަކަށެވެ.

ގައިޑްލައިންތަކުގެ އިތުރުން ކޮވިޑް ފެތުރުން ކޮންޓްރޯލްކުރުމަށްޓަކައި ވަސީލަތްތައް ތަރައްގީކުރުމުގައި ވެސް އެޗްޕީއޭ އާއި ސަރުކާރު ވަރށް ބޮޑަށް ފެއިލްވެފައިވާ ކަމަށް ބައެއް ފަރާތްތަކުން ދެކެއެވެ. ވެންޓިލޭޓަރުތައް ގަތުމާއި ވެކްސިން މެނޭޖްކުރުމުގައި ވެސް ސަރުކާރުގެ ކަމާ ބެހޭ ފަރާތްތައް ވަނީ ފެއިލްވެފައެވެ. ވެންޓިލޭޓަރު ހޯދުމުގައި ފަރުވާކުޑަކުރި އިރު ރާއްޖެ އަށް ލިބުނު ވެކްސިން މެނޭޖްކުރުމުގައި ވެސް އެޗްޕީއޭ ފެންނަނީ ފެއިލްވެފައިވާތަނެވެ. އެ ގޮތުން އިންޑިއާ އިން 200،000 ޑޯޒް ވެކްސިން ދިނުމުން ދެ ޑޯޒް އް ބަހާލުމުގެ ބަދަލުގައި އެ ވެކްސިންތައް ޖަހައި ހުސްކޮށްލީއެވެ. ދެ ވަނަ ޑޯޒް ހަމަވާވަރަށް ވެކްސިން ހޯދިފައި ނެތުމުން ފުރަތަމަ ޑޯޒްގެ ބޭނުން ކެނޑުމުގެ ފުރުސަތު މިހާރު އެބަ އޮތެވެ. އެކަށީގެންވާ ގޮތެއްގައި އެކަން މެނޭޖްކުރި ނަމަ ދެ ޑޯޒް ޖަހަންޖެހޭ މުއްދަތުގެ ތެރޭގައި ޖެހޭނެ އިންތިޒާމު ހަމަޖެއްސުނީހެވެ. ނުވަތަ ރާއްޖެ އަށް ލިބިފައި ހުރި ވެކްސިނުން ދެ ޑޯޒް ހަމަވާނެ ގޮތަކަށް އެކަން ކުރެވުނީހެވެ. ކުރިމަތިވެދާނެ ކަމަކުން ވެކްސިން ލިބުން ލަސްވެއްޖެ ނަމަ ކަންކުރާނެ ގޮތުގެ ޕްލޭނެއް އެޗްޕީއޭ އަށް ހެދިފައެއް ނެތެވެ. ކަންވީ ވެސް އެހެންނެވެ. ވެކްސިން ހުސްވީއެވެ. ނުވިތާކަށް ވެކްސިން ހުސްނުވާނެ ކަމަށް ބުނެ އާންމު ރައްޔިތު މީހާ އަށް އޮޅުވާ ވެސް ލީއެވެ.

އަނެއްކޮޅުން ސިއްހީ ދާއިރާގައި އެތައް ބަޔަކު ރެއާ ދުވާލު ގުރުބާނީތަކެއް ވަމުންދާ އިރު މަތިފަޑީގައި ސިޔާސަތު ކަނޑައަޅަން ތިބި ބޮޑުން އެކަން ކުރަނީ އެ ފަރާތްތަކުގެ ފައިދާ އަށް ވިސްނައިގެން ކަމަށް ތުހުމަތުތައް ކުރެވެއެވެ. ރައްޔިތުންގެ މަޖިލީހުގެ މެންބަރުން ވެސް ވަނީ ޓެކް ޓީމަށް އެ ތުހުމަތުތައް ކޮށްފައެވެ. ޓެސްޓްތައް ހެދުމާއި އެ ނޫން ވެސް މެޑިކަލް އިކުއިޕްމެންޓް ހޯދުމުގައި ޓެކް ޓީމުގެ މެންބަރުންނަށް މާލީ މަންފާ ލިބޭނެ ގޮތަށް އުސޫލްތައް ހަމަޖައްސާކަމުގެ ތުހުމަތު ވަނީ ކުރެވިފައެވެ. ހާއްސަކޮށް ޓެކް ޓީމުގައި ތިއްބެވި ބައެއް ބޭފުޅުންނަކީ މިކަމާ ގުޅުންހުރި ބޮޑެތި ވިޔަފާރިތައް ކުރައްވާ ބޭފުޅުން ކަމަށް ވުމުން އެ ތުހުމަތުތައް ކުރުމުގެ ފުރުސަތު ވެސް އެބަ އޮތެވެ.

މިއަދު ހާލަތު ގޯހުން ގޯހަށް ދިއުމުން އެޗްޕީއޭ އާއި ޓެކް ޓީމުން ސަރުކާރު ބޮލަށް ކަނޑާލަން ކިތަންމެ މަސައްކަތެއް ކުރިޔަސް އެއީ ގަބޫލުކުރަން ފަސޭހަ ކަމަކަށް ނުވެއެވެ. މިއަދު ޕޮޒިޓިވް މީހުން އިތުވަނީ ހަމައެކަނި ބޯޑަރު ބަންދު ނުކޮށްގެން ނުވަތަ ލޮކްޑައުންއަކަށް ނުގޮސްގެން ކަމަށް ދެއްކުމަށް އެޗްޕީއޭ އާއި ޓެކް ޓީމުގެ މެންބަރުން މަސައްކަތްކުރުމަކީ ވަރަށް ޒިންމާދާރުކަން ކުޑަ އަމަލެކެވެ. އަވަށްޓެރި އިންޑިއާގައި ހަލުވިކަމާ އެކު ބަލި ފެތުރުމަކީ ރާއްޖޭގައި އެކަން ކޮންޓްރޯލްނުވާންވީ ސަބަބެއް ނޫނެވެ. އެއީ އެއްފަސްގަނޑަކަށް އޮތް ދުނިޔޭގެ އާބާދީގެ ހަތްބައިކުޅަ އެއް ބައި މީހުން އުޅޭ، ތޮއްޖެހުން ބޮޑު ގައުމެކެވެ. ރާއްޖެއަކީ މުޅިން ވަކިން އޮތްތަނެކެވެ. އެހެންކަމުން ބަލި ކޮންޓްރޯލްނުކުރެވިގެން އުޅެނީ ބޯޑަރު ބަންދުނުކޮށްގެންނޭ ބުނެ ފަރުޖެއްސެކަށް ނެތެވެ.

ބަންދުކުރަންވީ ރާއްޖޭގެ ބޯޑަރެއް ނޫނެވެ. ބަލިވާ މީހާ އަށް ފަރުވާދެވޭނެ އިންތިޒާމް ހަރުދަނާކުރަންވީއެވެ. ކަރަންޓީންގެ ކަންކަން ބެލެހެއްޓުން ހަރުދަނާކުރަންވީއެވެ. ނުވެ އޮތް ކަމަކީ މިހާ ދުވަސްވީ އިރު ވެސް ވަސީލަތްތައް ތަރައްގީކުރެވިފައި ނުވުމެވެ. ރެންޑަމް ސާމްޕަލް ނެގުން ފަދަ ކަންކަމަށް އިސްކަންދިނުމުގެ ބަދަލުގައި ބަލިވާ މީހާ އަށް އަމާޒުކޮށްގެން ވަސީލަތްތައް ތަރައްގީކުރި ނަމަ ހާލަތު އޮންނާނީ މި ގޮތަކަށް ނޫނެވެ. ހަރުދަނާ އުސޫލްތަކެއް ގާއިމުވެފައި އޮތް ނަމަ ރާއްޖެއަކީ ކޮވިޑް ފެތުރުން އެންމެ ފަސޭހައިން ކޮންޓްރޯލްކުރެވެންޖެހޭނެ ގައުމެވެ. ރާއްޖޭގެ ކޮންމެ ރަށަކީ ވެސް ކަރަންޓީން ފެސިލިޓީއެކެވެ. ބަންދުކުރާ ނަމަ ބަންދުކުރަންވީ ބަލި ފެތުރޭ ކޮންމެ ރަށެއްގެ ބޯޑަރެވެ.

ކޮންމެ ރިސޯޓަކީ ވެސް ކަރަންޓީން ފެސިލިޓީއެކެވެ. ރާއްޖެ އަންނަ ޓުއަރިސްޓުން އެއާޕޯޓުން ދަނީ ރިސޯޓްތަކަށެވެ. ރާއްޖެ އާދެވެނީ ޕީސީއާރު ޓެސްޓް ނެގެޓިވް ވެގެންނެވެ. ޕޮސިޓިވް ވެއްޖެ ނަމަ އެފަދަ މީހަކު ކަރަންޓީންކުރެވޭނެ އިންތިޒާމު ހުރެއެވެ. އެ މީހުންނަށް ހިދުމަތްދޭ ރިސޯޓް މުވައްޒަފުން ރިސޯޓް ބަންދުގައި ތިބޭތާ އެތައް ދުވަހެކެވެ. ކޮންމެހެން ދާންޖެހޭ ހާލަތެއް މެދުވެރިވިޔަސް ރަށަށް ދެވެނީ 10 ދުވަހު ކަރަންޓީންވާ ގޮތަށެވެ. އެހެންކަމުން ރިސޯޓްތަކުގައި ބަލި ފެތުރުނަސް އާންމު ރައްޔިތު މީހާއާ ހަމައަށް އެ ބަލި އައުމުގެ ފުރުސަތު ކުޑައެވެ. އެހެންކަމުން މާބޮޑު މާނައެއް ނެތް ކަމެއް ކޮށްގެން އިގްތިސާދު ފުނޑެން ފުރުސަތު ދޭންވީތޯއެވެ؟ ރައްކާތެރިކަމާ އެކު ޓުއަރިޒަމްގެ ކަންކަން ކުރިއަށް ގެންދެވޭނެ މަގު ފަހިވެފައިވާ އިރު ކުރަންޖެހޭ ކަމަކީ އެ ފިޔަވަޅުތައް ހަރުދަނާކޮށް އަދި ތަންފީޒުކުރުމެވެ. އާމްދަނީ ލިބޭނެ މާ ބޮޑު މަގެއް ނެތް އިރު ޓުއަރިޒަމް ހުއްޓުމަކަށް އަންނަ ގޮތަށް ބޯޑަރު ބަންދުކޮށްގެން ރާއްޖެ އަށް ފަރުޖެއްސޭނެ ގޮތެއް ނެތެވެ. ބަލިޖެހިގެން ހާލު ބޮޑުވާ މީހާ ނުވަތަ މަރުވާ މީހުންނަށް ވުރެ އިގްތިސާދީ ނިކަމެތިކަމުގައި ދިގުމުއްދަތަށް ކުރާ އަސަރުގައި ހާލުގައި ޖެހޭ މީހުން އިތުރު ނަމަ ފިޔަވަޅުތަކުގެ ބޭނުމެއް އެބަ އޮތްތޯއެވެ؟ ވަކިވަކިން އޮތް ރަށްތަކެއްގައި ކޮންޓްރޯލްނުވާ ވަރަށް ބަލި ފެތުރިގެން ދަނީ އެކަން މެނޭޖްކުރަން ތިބި ބައެއްގެ ދޯހަޅި ސިޔާސަތުތަކުގެ ސަބަބުންނެވެ. ގައިޑްލައިތައް ހެދުމުގައި ވަކި ބައެއްގެ މަސްލަހަތަށް ބެލުމުންނެވެ. އެޗްޕީއޭ ފެއިލްވެފައި ވުމުންނެވެ. ކުރާ ހޭދައާ އަޅާ ބަލާއިރު ނަތީޖާ ނެރެވިފައެއް ނެތުމުންނެވެ.