ދުވާލެއްގެ މައްޗަށް ގާތްގަނޑަކަށް 80 ކުޑަކުދިން ޕޮސިޓިވްވޭ

ދުވާލެއްގެ މައްޗަށް ކޯވިޑްޖެހޭ ކުޑަކުދިންގެ އަދަދު އިތުރުވަމުން އަންނަކަމުގެ ކަންބޮޑުވުން ޑޮކްޓަރުން ހާމަކުރައްވައިފިއެވެ. ކޯވިޑް19 ޖެހޭ މީހުންގެ އަދަދު މިފަހުން ރާއްޖޭގައި ވަނީ ވަރަށް ބޮޑަށްވެސް އިތުރުވެފައެވެ.

ކުޑަކުދިންނަށް ކޯވިޑްޖެހޭ މިންވަރު އިތުރުކަން ފާހަގަކުރައްވައި ޑރ. ނަޒްލާ މުސްތަފާ ވިދާޅުވީ، 10 އަހަރުން ދަށުގެ ކުޑަކުދިންގެ ތެރެއިން ދުވާލެއްގެ މައްޗަށް 70 ނުވަތަ 80 ކުދިން މިހާރު ޕޮޒިޓިވްވަމުންއަންނަކަމަށެވެ. އަދި 1 އަހަރުން ދަށުގެ 4 ކުދިން ނޫނީ 5 ކުދިން ދުވާލެއްގެ މައްޗަށް މިހާރު ރާއްޖޭގައި ޕޮޒިޓިވްވާކަމަށެވެ.

advertisement

ދުވަސްވީ މީހުންނާއި އަޅާބަލާއިރު ކުޑަކުދިން ސީރިއަސް ވުމުގެ ފުރުސަތު ދަށްކަމުގައިވިއަސް މިއީ ނުވާނެ ކަމެކޭ ބުނެވެންނެތްކަމަށް ޑރ ނަޒްލާ ވިދާޅުވިއެވެ. އަދި ކުޑަކުދިން ޕޮޒިޓިވްވާ މިންވަރު އިތުރުވުމަކީ ކަންބޮޑުވާންޖެހޭ ކަމެއްގެ ގޮތުގައި ޑރ. ނަޒްލާ ވަނީ ފާހަގަކުރައްވާފައެވެ.
ކޯވިޑްގެ ނަންބަރުތައް އިތުރުވަމުންދާއިރު ދަރިންގެ ސަލާމަތާއި ރައްކާތެރިކަމަށް ގޭގައި މަޑުކުރުމަކީ ކޮންމެހެންވެސް ކުރަންޖެހޭކަމެއްކަމަށް ނަޒްލާ ވިދާޅުވިއެވެ.

ރާއްޖޭގައި ކޯވިޑްގެ ކޭސްތައް މިހާރު ވަނީ ކަންބޮޑުވާންޖެހޭ މިންވަރަކަށް އިތުރުވެފައެވެ. އެގޮތުން ފާއިތުވި 48 ގަޑިއިރުގެ ތެރޭގައިވެސް ރާއްޖޭގައި 766 މީހަކު ވަނީ ކޯވިޑަށް ޕޮޒިޓިވްވެފައެވެ.