ޖިމްތަކާއި ސެލޫންތަކުގެ ވެރިން ގޮތްހުސްވެފައި

އެޗްޕީއޭއިން ވަކިވަކި ވިޔަފާރިތަކަށް އަމާޒުކޮށްގެން ވިޔަފާރިތައް ހުއްޓާލުމަކީ ހަމަޖެހޭ ކަމެއްނޫންކަމަށް ޖީމްތަކާއި ސެލޫންތައް ހިންގާ ބައެއް ފަރާތްތަކުން ބުނެފިއެވެ.

އެފަރާތްތަކުން ބުނެފައިވަނީ ޖިމްތަކާއި ސެލޫންތަކަކީވެސް ބޮޑެތި ކުލި ދީގެން ހިންގަމުންއަންނަ ތަންތަންކަމަށެވެ. އާންމުގޮތެއްގައި ޖިމްއެއްގެ ކުލީގެ ގޮތުގައި އުޅެނީ 70،000 އާއި 85،000 އާއި ދެމެދުގެ އަގެއްގައިކަމަށާއި، މުވައްޒަފުންގެ ގޮތުގައި 8 ނުވަތަ 12 މީހުން ހަރަކާތްތެރިވަމުން އަންނަކަމަށެވެ. އެހެންކަމުން އެހެން ވިޔަފާރިތަކަށްވެސް ގައިޑްލައިންއާއި އެއްގޮތައް ހިންގުމުގެ ފުރުސަތު ލިބެންޖެހޭނެކަމަށެވެ.

advertisement

ޖިމްތަކާއި ސެލޫންތަކުގައި މަސައްކަތްކުރާ މުވައްޒަފުންވެސް ދިރިއުޅެނީ މިތަންތަނުން ލިބޭ އާމްދަނީންކަމަށް އެ ވިޔަފާރިތަކުން ވަނީ ބުނެފައެވެ. އަމިއްލަ އިސްނެގުމުން އެންމެ ފުރަތަމަ ބަންދުކުރި ތަންތަނުގެ ތެރޭގައި ޖިމްތައް ހިމެނޭކަމަށާއި، މިހާތަނަށްވެސް ޖިމްތަކުން ވާނީ ގައިޑްލައިންއަށް ޕޮލޯކޮށްފައިކަމަށް ވަނީ ބުނެފައެވެ.

ޖިމްތަކުން މިހާތަނަށް ޕޮޒިޓިވްވީ ކިހާ މީހުންނެއްކަމެއް އަދި ނުރައްކާއޮތް މިންވަރު ބުނެދިނުމެއްނެތި ޖިމްތަކާއި ސެލޫންތައް ބަންދުކޮށްގެނެއް ހާސިލްކުރަން ބޭނުންވާ ކަންކަން ހާސިލްވާނެކަމަށް ޤަބޫލުނުކުރެވޭކަމަށްވެސް މި ވިޔަފާރިތަކުން ވަނީ ބުނެފައެވެ. އެހެންކަމުން އެޗްޕީއޭއިން ބަލަންޖެހޭ ކަންކަމަށް ބެލުމަށްފަހު ހުރިހައި ވިޔަފާރިތަކަކަށް ހަމަހަމަ އުސޫލެއްގެ މަތިން ފުރުސަތު ފަހިކޮށްދޭނެކަމަށް އުންމީދުކުރާކަމަށް ސެލޫންތަކާއި ޖިމްތަކުން ވަނީ ބުނެފައެވެ.