އެންމެ ފަހުން އައިޖީއެމްއެޗް އިން ދިވެހި ޑޮކްޓަރުން ޗުއްޓީއާއި އިނާޔަތް ނުލިބޭގޮތަށް ކުޑަ މުސާރައަކަށް ހޯދަން އިއުލާންކޮށްފި

ޑޮކްޓަރުންނާއި އާންމުންގެ ނުރުހުން އަމާޒުވެ ޕްރެޝަރު ބޮޑުވެގެން އެންމެ ފަހުން އައިޖީއެމްއެޗް އިން ދިވެހި ޑޮކްޓަރުން ޗުއްޓީއާއި އިނާޔަތް ނުލިބޭގޮތަށް ވަރަށް ކުޑަ މުސާރައަކަށް ހޯދަން އިއުލާންކޮށްފިއެވެ. ބޮޑެތި މުސާރައަށް ބިދޭސީ ޑޮކްޓަރުންގެންނަން ހެލްތް މިނިސްޓްރީ އިން އިއުލާންކުރިއިރު، ދިވެހި ޑޮކްޓަރުން ކުޑަ މުސާރައަކަށް ވަގުތީ ވަޒީފާއަކަށް އިނާޔަތްތަކާއި ޗުއްޓީނުލިބޭގޮތަށް ހޯދުމަކީ ވަރަށް ބޭއިންސާފުގެ އަމަލެއްކަމަށް ގިނަ ޑޮކްޓަރުން އަންނަނީ ބުނަމުންނެވެ.

advertisement

ރާއްޖޭގައި ބާރު ސްޕީޑެއްގައި ކޮވިޑު-19 ފެތުރެމުން އަންނަ އިރު، ކޮވިޑު-19 އޮޕަރޭޝަނުގައި ފަރުވާ ދިނުމަށް ހިލޭ ސާބަހަށް މަސައްކަތްކުރުމަށް ދިވެހި ޑޮކްޓަރުންނަށް ބާރު އަޅަމުންދާއިރު، ރާއްޖޭގައި މަސައްކަތް ކުރާނެ ޑޮކްޓަރުންނާއި އެހެނިހެން ސިއްހީ ދައިރާގެ މަސައްކަތްތެރިން ހޯދުމަށް އިންޑިއާގައި ވަނީ އިއުލާންކޮށްފައެވެ.
މިގޮތުން އިންޑިއާގެ ނޫހެއްގައި ކޮށްފައިވާ އިއުލާނެއްގައި ވާގޮތުން މިނިސްޓްރީ އޮފް ހެލްތުގެ ދަށުން ހިންގާ ހޮސްޕިޓަލް ތަކަށާއި ސިއްހީ މަރުކަޒުތަކަށް ބޭނުންވާ 550 އަށްވުރެ ގިނަ ސިއްހީ މަސައްކަތްތެރިން ހޯދުމަށް ވަނީ އިއުލާންކޮށްފައެވެ. އޭގެ ތެރޭގައި މެޑިކަލް އޮފިސަރުންނާއި، ނަރުހުންނާއި، ސްޕެޝަލިސްޓުންނާއި، ޑެންޓިސްޓުން، ރޭޑިއޯ ގްރާފަރުން އަދި ފިޒިއޮތެރަޕިސްޓުން ހިމެނެއެވެ.

މިކަމާއި ގުޅިގެން ރާއްޖެއަށް ނިސްބަތްވާ ބައެއް ޑޮކްޓަރުން ވަނީ މެޑިކަލް އެސޯސިއޭސަން ވައިބަރ ގުރޫޕުގައި ކަންބޮޑުވުން ފާޅުކޮށްފައެވެ. މިގޮތުން ޑޮކްޓަރުކަން ކިޔަވައިގެން އަދި ރާއްޖެއިން ވަޒީފާ ހަމަނުޖެހި ތިބި ބައެއް ފަރާތްތަކުން ވަނީ ދިވެހިންނަށްވީމައި ޖެހެނީ ހިލޭ މަސައްކަތް ކުރަން ކަމަށާއި ބިދޭސީންނަށްވީމައި ބޮޑު އުޖޫރަ ދީގެން ވަޒީފާ ދެވޭ ކަމަށް ބުނެ ނުރުހުން ފާޅުކޮށްފައެވެ.

ކޮވިޑް ހޭދަ ތިން ބިލިއަނަށް ވުރެ މައްޗަށް ގޮސްފައިވެފައިވާއިރު، ފައިސާ ނެތްކަމަށްބުނެ އައިޖީއެމްޗް އިން އަލަށް ތަމްރީންވި ނަވާރަ ޑޮކްޓަރުން ހިލޭ ސާބަހަށް މަސައްކަތް ކުރުވުމަށް ބާރުއަޅަމުންދާކަމުގެ މަޢުލޫމާތު ވަނީ ލިބިފައެވެ.
ކޮވިޑުގެ ސަބަބުން ޑޮކްޓަރުން އިންތިހާއަށް ބޭނުންވެ، މިހާރު މަސައްކަތްކުރަމުންދާ ޑޮކްޓަރުން 15 ގަނޑިއިރުގެ މަސައްކަތްކުރަމުންދާއިރު، ޑޮކްޓަރުން ވަނީ ވަރުބަލިވެ މާޔޫސްވެފައިވީ ކަމުގައި ނަމަވެސް، އައިޖީއެމްއެޗްގެ މެނޭޖްމަންޓުން ހަރަދު ކުރެވެން ނެތްކަމަށްބުނެ، އަލަށް ތަމްރީންވި 19 ޑޮކްޓަރަކު ވަޒީފާއެއް ނެތި ތިބޭތާ 2 މަސްދުވަސް ވެފައިވާކަމަށް މަޢުލޫމާތު ލިބިފައިވެއެވެ. މިކަމުގެ ސަބަބުން މިހާރު މަސައްކަތްކުރަމުންދާ ގިނަ ޑޮކްޓަރުންގެ ހައްޤުތަށް ގެއްލި، ސިއްހީދާއިރާ ބޮއްސުންލައިގެން ހިނގައިދާނެކަމުގެ ބިރު އޮތްކަމަށް ބައެއް ސީނިއަރ ޑޮކްޓަރުން ވަނީ ވިދާޅުވެފައެވެ.

އަލަށް ތަމްރީންވި ޑޮކްޓަރުން ހިލޭސާބަހަށް މަސައްކަތްކުރުވުމަށް ބާރު އަޅަމުންދާއިރު، ސަރުކާރުން ވަނީ އެތައް ބިލިއަން ރުފިޔާއެއް މިކަމަށް ޙަރަދުކޮށް ކުރެވެން އޮތް ހުރިހާކަމެއް ކުރާނެކަމުގެ ޔަޤީންކަން ރައްޔިތުން ދީފައެވެ.