އެޗްޕީއޭއިން ހައްދަވާނީ ގޯހަކަށް ފަހު ގޯހެއް – ޑރ. އަލީ ނިޔާފް

ހެލްތް ޕްރޮޓެކްޝަން އެޖެންސީން ގޯހަކަށް ފަހު ގޯހެއް ހަދަމުން ދާ ކަމަށް ވިދާޅުވެ، ރާއްޖޭގެ މަޝްހޫރު ނާރުގެ ޑޮކްޓަރު އަލީ ނިޔާފް ކަންބޮޑުވުން ފާޅުކުރައްވައިފި އެވެ. ޑރ. ނިޔާފު މިހެން ވިދާޅުވެފައިވަނީ އޭއެފްސީ ކަޕް ކޮލިފިކޭޝަންގައި ވާދަކުރަން އިންޑިއާގެ ބެންގަލޫރު އެފްސީގެ ކުޅުންތެރިން ރާއްޖެ އައުމުގެ ހުއްދަ ދިނުމާއި ގުޅިގެންނެވެ.

ކޮވިޑް-19 އާ ގުޅިގެން އޭއެފްސީން އެކުލަވާލާފައިވާ ޕްރޮޓޮކޯލްގެ ދަށުން މެޗަށް ނުވަތަ ޕްރެކްޓިހަށް ދާން ނޫން ގޮތަކަށް ޓީމުތަކުގެ ކުޅުންތެރިން ބޭރަށް ނުކުތުން މަނަލެވެ. ނަމަވެސް އިންޑިއާ ޓީމުގެ ބައެއް ކުޅުންތެރިން ވަނީ ހޮޓަލުން ބޭރަށް ނުކުމެ، މާލޭ މަގުތައްމަތީގައި އުޅެފަ އެވެ.

advertisement

ކޮވިޑް-19 އެންމެ ބާރަށް ފެތުރޭ އިންޑިއާއިން ޓޫރިސްޓުންނާއި އާއްމުން ވެސް ރާއްޖެ އައުން މިހާރު ވަނީ މަނާކޮށްފަ އެވެ. ނަމަވެސް އިންޑިއާގެ ޓީމުން ރާއްޖެ އައީ އެޗްޕީއޭގެ ހާއްސަ ހުއްދައެއްގެ ދަށުންނެވެ. އަދި އިންޑިއާގެ ޓީމުން ރާއްޖެ އައިސް، ޕްރޮކޮޓޯލްތަކާ ހިލާފުވެ މަގުމައްޗަށް ނުކުތުމުން ނިޔާފް ނުރުހުން ފާޅުކުރެއްވި އެވެ.

އޭނާ ވިދާޅުވި ގޮތުގައި ހާއްސަ ހުއްދަ ވެސް މިހާރު ދިނުން ހުއްޓާލަން ވެއްޖެ އެވެ. އަދި އެއީ ސައިންޓިފިކަލީ ގަބޫލުކުރެވޭ ކަމެއްތޯ ވެސް އޭނާ އެއްސެވި އެވެ.

އިންޑިއާގެ ކުޅުންތެރިން މާލޭގައި މަގު މައްޗަށް ނުކުތް މައްސަލަ ވަނީ ވަރަށް ބޮޑަށް ހޫނުވެފަ އެވެ. އަދި ކުޅުންތެރިންގެ މި އަމަލަކީ ބަލައިގަނެވޭނެ ކަމެއް ނޫން ކަމަށް ވިދާޅުވެ، ސްޕޯޓްސް މިނިސްޓަރު އަހުމަދު މަހްލޫފް ވަނީ އެ ޓީމުން ވަގުތުން ވަގުތަށް ރާއްޖޭން ދިޔުމަށް ގޮވާލައްވައިފަ އެވެ.