ނާޒިމާ – ދަތިހާލުގައި ދިރިއުޅެމުންދާ ހިތްވަރުގަދަ މަންމައެއް!

އަޅުގަނޑުމެންގެ މި މުޖްތަމައުގައުގައި ދިރިއުޅުން ރޫޅި ވަރަށް ދަތި ހާލުގައި އެކަނިވެރިކަމާއިއެކު އުޅެމުންދާ އެތައް ބަޔަކު އެބައެޅެއެވެ. އޭގެތެރެއިން އެކަކަކީ ނާޒިމާއެވެ.

ނާޒިމާ އަކީ 12 އަހަރުން ދަށުގެ 5 ކުދިންގޮވައިގެން ދިރިއުޅެމުން އަންނަ ވަރަށް އެކަނިވެރި ނަމަވެސް އެހާމެ ހިތްވަރުގަދަ މަންމައެކެވެ. އަދި މިހާރު ނާޒިމާ އިނީ އޭނާގެ ހަވަނަ ދަރިފުޅު ވިހަން ތައްޔާރުވެފައެވެ. ނާޒިމާގެ ކައިވެރި ވަނީ ރުޅިފައެވެ. އޭނާ ދިރިއުޅެމުން ގެންދަނީ އޭނާގެ ދަރިންނާއިއެކު އޭނާގެ މަންމަކައިރީގައެވެ.

advertisement

ދިރިއުޅުމުގެ ހާލަތު ހުރިގޮތުން އާމްދަނީއެއް ހޯދަން އޭނާއަށްވަނީ މަސައްކަތެއް ކުރުމަށް އުޒުރުވެރިވެފައެވެ. ނަމަވެސް މަންމަ އަށް ލިބޭ އެލަވެންސް ރުފިޔާއިން ގޭގެ ޚަރަދު ތަކާއި މާމަދަރިންގެ ޚަރަދުތައް ނާޒިމާގެ މަންމަކުރަނި އެކުދިންދެކެ އިންތިހާއަށް ލޯބިވާހާލުގައެވެ.

ނާޒިމާ ބުނީ ކައިވެންޏަށް 12 އަހަރު ވިއިރު ލިބުނު ޖިސްމާނީ އަދި ނަފުސާނީ އަނިޔާ ބުނެދޭންވެސް ނޭނގޭކަމަށެވެ. ކުރީގެ ފިރިމީހާގެ ގައިގަ ހިފާފައި ހުރި ގޯސް އާދަތަކުގެ ސަބަބުން ހަމަހޭގައި ހުންނަނީ މަދުފަހަރަކުއެވެ. މިގޮތަށް ދިމާވާ ކޮންމެ ރެޔަކީ އެތައް އަނިޔާތަކެއް ލިބިގެންދިޔަ ރޭތަކެއްކަމަށް ނާޒިމާ ބުންޏެވެ. 5 ކުދިންނާއެކު އެއްކޮޓަރިއެއްގައި ނިދާއިރު ދަރިންނަށް ބަލާލުމެއް ނޯވެއެވެ. ވަރިކުރުމަށްފަހު ދަރިންނަށް ކޮށްދޭންޖެހޭ އެއްވެސް ހަރަދެއްވެސް ކުދިންގެ ބައްޕަ ނުކުރާކަމަށް އޭނާ ބުންޏެވެ.

“ކިތަންމެ ރެޔަކު ގަދަކަމުން އޭނާގެ ހިތް އުފާކުރި. މިކަމުގެ ސަބަބުން ކުދިން ބޭނުންނުވެ މިވަނީ ގިނަ ކުދިންތަކެއްވެސް ލިބިފައި. އަޅުގަނޑު މި ކުދިންދެކެ އިންތިހާއަށް ލޯބިވާއިރު އެކުދިންގެ ބައްޕަގެ ފަރާތުން ކުދިންނަށް ލިބެނީ އަނިޔާއާއި ހިތްދަތިކަން. ވަރިކޮށްގެން މިވީ އަށް މަސް ދުވަހުތެރޭ އެއްވެސް ޚަރަދެއް ކުއްޖަކަށް ނުކުރޭ. ބަލިވިޔަސް ސުކޫލު އެއްޗެއް ބޭނުންވިޔަސް މަންމަ އެކަމެއް ކޮށްދޭނީ. ގޭގައި ނެތް ހިފައިގެންގުޅޭ އެއްވެސް އެއްޗެއް. ކުއްޖަކު ލައްވާނެ ރީތި ހެދުންކޮޅެއްހާ ހިސާބުވެސް ނެތް. ބަނޑަށްމިވަނީ މިހާރު ނުވަ މަސް ފުރިފަ. ފައިދާހުރި ރަނގަޅު ކާނާއެއް ކެވުނު ދުވަހެއް ހަނދާނުގައިވެސް ނެތް.” ނާޒިމާ ބުންޏެވެ.

ނާޒިމާ ބުނީ މިހާރު އުޅޭ ގޭގައި ކަރަންޓު މައްސަލަ ވަރަށް ގިނައިންޖެހޭކަމަށެވެ. އެއްރޭ ދަންވަރު ގެއިން ކަރަންޓުކެނޑިގެން ކުދިންނަށް ނިދޭނެ ގޮތެއް ނެތިގެން ކުދިންގެ ބައްޕަ ގެއަށް ދިޔަކަމަށާއި ނަމަވެސް އެކުދިންނަށް ނިދާނެ ތަންކޮޅެއް ދިނުމުގެ ބަދަލުގައި ގެއިން ނެރެލީކަމަށެވެ.
“ވަރިވިފަހުން އެ އާއިލާގެ މީހުންގެ ފަރާތުންވެސް އެއްވެސް އެހީއެއް ނުލިބޭ. ހަރަދު ބޭނުންކަމުގަ ވާނަމަ އަނެއްކާވެސް އެ މީހުން ބުނާގޮތުން ގުޅެންވީ. އެކަމު އަޅުގަނޑަށް އިނގޭ އެއީ ހައްލެއް ނޫންކަން މިކަމުގަ” ނާޒިމާ ބުންޏެވެ.

ނާޒިމާގެ ގޭގައި ޖުމްލަ ދެކޮޓަރި ހުންނައިރު ދެ ފިރިހެން ކުދިންނާއި ކުޑަ ދެ އަންހެންކުދިން ނިދަނީ ނާޒިމާ އާއިއެކު އެ ކޮޓަރީގައެވެ. 10 ފޫޓު 9 ފޫޓު ހުންނަ މި ކުޑަ ކޮޓަރީގައި ކުދިން ނިދަނީ ތިރީގައެވެ. ކޮޓަރީގައި ހުރި އެނދު އަދި އަލަމާރިވަނީ ވަރަށް ބޮޑަށް ބާވެ ހަލާކުވެފައެވެ. ފޮތްތަކާއި ހެދުންތައް ހުންނަނީ ކަރުދާސް ފޮށިގަނޑަށް އަޅާފައެވެ. ނާޒިމާގެ މަންމަގެ ކޮޓަރީގެ ހާލަކީވެސް ހަމަމިއެވެ.

އެއްވެސް ކޮޓަރިއެއްގައި ފާހާނާއެއް ނުހުރެއެވެ. ކޮންމެ ފަހަރަކުވެސް ފާހާނާ ކުރަން ނުކުންނަން ޖެހެނީ ވަކިން ހަދާފައި ހުންނަ ވަޅުކޮޓަރިއަށް ދާށެވެ. މި ފާހާނާ އަކީ ތުއްތު ކުދިންތަކެއް ބޭނުންކުރަން އެކަށީގެންނުވާ ފެންވަރަކަށް ހުރި ތަނެކެވެ. ފާހާނާއަށް ވެސް ހުރީ އެންމެ އާދައިގެ ތިރި ތަށްޓެކެވެ. އެތަށިވެސް ހުރީ ގިނަދުވަސްވެ ވަރަށް ބޮޑަށް ހަޑިވެފައެވެ. ތަނުގައި ހުރި މުށިތައް ވަނީ ތަޅައިގެންގޮސް ހަލާކުވެފައެވެ. ފެންވަރަން ބޭނުންކުރަނީ އަދި ތަންކޮޅެއްދުރުގައި ހުރި ވަޅަކުން ފެން ނަގައިގެންނެވެ. ވަޅުގެ އުސް މިނުގައި ހަތަރުފޫޓުވެސް ނެތެވެ.

ނާޒިމާ އެންމެ ދެރަވަނީ ކުދިންނަށް ރަނގަޅު ކާނާ އާއި އުފާވެރި ދިރިއުޅުމެއް ހޯދައި ދިނުމަށް އޭނާގެ އެވަރުގެ ފޯރުންތެރިކަމެއް ނެތީމައެވެ. އޭނާ ބުނީ އެކަނިވެރި މައިންނަށް ލިބޭ އިނާޔަތް ވެސް އަދި ވަނީ ހަމަނުޖެހިއެވެ. މީގެ އިތުރުން ކުދިންނަށް އަންނައުނު ހޯދަދީ ސުކޫލަށް ބޭނުންވާ ތަކެތިވެސް ހޯދުމަކީ ދަތިކަމެކެވެ. ކުދިންގެ ބައްޕަ ފަރާތުން އެންމެ ކުޑަމިނުން އެހީތެރިކަމެއް ނުލިބޭއިރު ނާޒިމާ އަތުގައި ހުރި ރަންކޮޅުވެސް ގަދަކަމުން އަތުލައިގެން އޭނާވަނީ މަސްތުވާތަކެތި ގަތުމަށް ވިއްކާލާފައެވެ. އަދި އެންމެ ފަހުން ޒަކާތުގެ ގޮތުގައި ލިބުނު ރުފިޔާއިން ފާހާނާ ހިޔާކުރަން ގަތް ޓިނުތަށްވެސް ވަނީ ވަގަށް ވިއްކާލާފައެވެ. ގޭގެ ފާރުތަކުގައި ސިމެންތި ޖަހާފައި ނެތް އިރު ބަދިގެއަށްވީ ބައިގެ ޓިނުތައްވަނީ އެއްކޮށް ހަލާކުވެ ފޫގޮއްސައެވެ. މި ކަމުގެ ސަބަބުން ވިއްސާރަ ދުވަސްވަރެއްނަމަ ބަދިގެއަށް ފެންއެޅި މުޅިތަން އޮންނަނީ ހަޑިވެފައެވެ.

މަމްސް އެންޖީއޯއިން ވަނީ މި އާއިލާއަށް އެހީތެރިވުމަށް ޚާއްސަ ކެމްޕެއިނެއް ފަށާފައެވެ. އެ ޖަމިއްޔާއިން ބުނީ އަމާޒަކީ މި އާއިލާއަށް ކާބޯތަކެތި، ގެއަށް ކޮންމެހެން ބޭނުންވެފައިވާ ފަރުނީޗަރު، ކެއްކުމަށް ބޭނުންވާ ތަކެތީގެ އިތުރުން ކުދިންނައް ބޭނުންވާ އަންނައުނު، ކިޔަވާ ސާމާނު އަދި ރީތިވާ އެއްޗެހި ފަދަ އާންމު ދިރިއުޅުމުގައި ބޭނުންޖެހޭ ތަކެތި ފޯރުކޮށް ދިނުމަށް މަސައްކަތް ކުރުންކަމަށެވެ.
މި އާއިލާގައި އުޅެނީ 12 އަހަރާއި 10 އަހަރުގެ 2 ފިރެހެންކުދިނެވެ. އަދި 3 އަހަރާއި 8 އަހަރާއި އަދި 2 އަހަރު ބައިގެ އަންހެން ކުދިންނެވެ. ފައިސާގެ އެހީ ދެއްވަން ބޭނުންވާނަމަ މަމްސް އެންޖީއޯގެ އެކައުންޓަށް ފައިސާ ފޮނުވުމުން މި އާއިލާއަށް އެހީތެރިވެދެވޭނެއެވެ،
އެކައުންޓް ނަންބަރ :
7730000294482 ރުފިޔާ
7730000294483 ޑޮލަރު