ކޯޑު ކުރުމުގައި ދިވެހި ކުޑަކުދިން މުޅިން އާ ހަރުފަތަކަށް!

ކޯޑުކޮށް ވެބްސައިޓް ހެދުމާއި ގޭމު ތައްޔާރުކުރުމަކީ ކޮންމެ މީހަކަށް ކުރެވޭނެ ކަމެއް ނޫނެވެ. ނަމަވެސް އުމުރުން 8 އަހަރާއި 15 އަހަރާއި ދެމެދުގެ އެތައް ސަތޭކަ ދިވެހި ކުޑަކުދިން ކޯޑުކޮށް ވެބްސައިޓް ހެދުމާއި، ގޭމުތައްޔާރުކުރުމުގެ އާ ހަރުފަތަކަށްދާން ވަނީ މިސްރާބު ޖަހާފަ އެވެ. ކުޑަކުދިން ސައިންސާއި ޓެކްނޮލިޖީއަށް އަހުލުވެރިކުރުމުގެ ގޮތުން އުގައިލު ފައުންޑޭޝަނާއި ހައުސިން ޑެވެލޮޕްމަންޓް ކޯޕަރޭޝަން (އެޗް.ޑީ.ސީ) އާއި ގުޅިގެން އިނގިރޭސި ވިލާތުގެ ޓީޗަރުން މެދުވެރިކޮށް “ދަ ސަރކްލް” ގެ ނަމުގައި އޮންލައިންކޮށް ކުރިއަށް ގެންދާ ހާއްސަ ޕްރޮގްރާމުތަކުގެ ތެރެއިން ދިވެހި ދަރިވަރުންތައް ދަނީ ކޮމްޕިއުޓަރ ކޯޑިންގެ ފަންނީ ހުނަރުތައް ތަފާތު ގޮތްގޮތުން ދައްކަމުންނެވެ. އެގޮތުން، މި ކުދިންގެ “ކްރިއޭޓިވިޓީ” ފެނިގެން ގޮސްފައިވާ އެއްކަމަކީ މި އީދާއި ދިމާކޮށް އެކުދިންގެ މައިންބަފައިންނާއި އާއިލާ މީހުންނަށް ފޮނުވަން އެކުދިން އަމިއްލައަށް ކޯޑުކޮށް ތައްޔާރުކޮށްފައިވާ އީ ކާޑެވެ.

މި ކާޑު ތައްޔާރުކުރުމުގައި އެކުދިން ވަނީ ޒަމާނީ ވެބްސައިޓް ހަދަން ބޭނުންކުރާ ކޯޑިންގެ ބައިތަކުގެ އިތުރުން ކާޑުގައި އީދާ ގުޅޭ މިއުޒިކު ވެސް ހިމަނާފަ އެވެ. ރާއްޖޭގެ އެކި ކަންކޮޅުތަކުން މިޕްރޮގްރާމު ފުރިހަމަކުރަމުން ގެންދާ އެތައް ސަތޭކަ ކުދިން އެކުދިންގެ ވިސްނުމާއި ފިކުރު އަދި އަމިއްލަވަންތަކަން އެކުދިންގެ އީކާޑުތައް ޑިޒައިންކޮށް ކޯޑު ކުރުމަގައި ވަރަށް ބޮޑަށް ބޭނުން ކޮށްފައި ވެ އެވެ.

advertisement

މި އަހަރުގެ ޖެނުއަރީ މަހުން ފެށިގެން “ދަ ސާރކަލް ބައި އުގައިލު ފައުންޑޭޝަން” ގެ ނަމުގައި އުގައިލު ފައުންޑޭޝަނާއި އެޗް.ޑީ.ސީ އިން ގުޅިގެން އޮންލައިންކޮށް ކިޔަވައިދެމުންގެންދާ މި ޕްރޮގްރާމުގައި ކިޔަވައިދެނީ ރާއްޖެއާއި އަދި އިނގިރޭސިވިލާތުގެ ތަޖުރިބާކާރުންނެވެ.

މި ޕްރޮގްރާމާއި ބެހޭގޮތުން އުގައިލު ފައުންޑޭޝަންގެ ރައީސް ޕްރޮފެސަރ ޑރ.ހަސަން އުގައިލު ވިދާޅުވީ މިއަހަރުގެ ފާއިތުވި ތިން މަސްދުވަހުގެ ތެރޭގައި ކުދިންނަށް ވަރަށް ގިނަ ކަންކަން މި ޕްރޮގްރާމުން ދަސްވެފައިވާކަމަށް ގަބޫލުކުރާކަމަށެވެ.

“އަޅުގަނޑު އުފާވޭ ކުދިންގެ ހުނަރު ފެނިފަ. ހާއްސަކޮށް ދަސްކޮށްދޭ ބައިތަކުގައި އެކުދިން އަމިއްލަ ވިސްނުން ގެންގުޅޭގޮތް. ފާއިތުވި ކުޑަ ދުވަސްކޮޅުގައި އެޗް.ޓީ.އެމް.އެލް އަދި ޖާވާ ސްކްރިޕްޓް ފަދަ ބައިތައް ބޭނުންކޮށްގެން މިކުދިން ވަނީ އާދައިގެ ކާޑެއް ހެދުމުން ފެށިގެން، ވެބްސައިޓް އަދި ގޭމު އަމިއްލައަށް ތައްޔާރުކުރެވޭ ވަރަށް ކޯޑިންސް ދަސްކޮށްފަ. އެތައް ސަތޭކަ ކުދިން މި ޕްރޮގްރާމުގައި އުޅޭއިރުވެސް ހުރިހާ ކުދިންގެ ކޯޑު ކުރުމާއި ވިސްނުމުގެ ފެންވަރު އެއްހަމައެއްގައި ކުރިއަށް ނެރެވޭތީ އަދި ވަކިން އުފާވޭ. އަޅުގަނޑު ވަރަށް ހިތްހަމަޖެހޭ އެޗްޑީސީގެ އެހީތެރިކަމާއި އެކު މިދަފަ ޕްރޮގްރާމެއް މެދުވެރިކޮށް ކުދިންނަށް ޒަމާނީ ތައުލީމުގެ ބައިތައް ފޯރުކޮށްދެވޭތީ.” ޕްރޮފެސަރ އުގައިލު ވިދާޅުވި އެވެ.

ޕްރޮފެސަރ އުގައިލު ވަނީ ޕްރޮގްރާމުގައި ބައިވެރިވާ އުމުރުން 13 އަހަރުގެ ކުއްޖަކު އަމިއްލައަށް ކޯޑުކޮށް ތައްޔާރުކޮށް އެބޭފުޅާއަށް ފޮނުވާފައިވާ އީކާޑެއް އަމިއްލަ ސޯޝައަލް މީޑިއާގައި ހިއްސާކޮށްފަ އެވެ.

ދަ ސާރކަލް ގައި ބައިވެރިވާ އުމުރުން 12 އަހަރުގެ މިންހާ ބުނާގޮތުން، މި ޕްރޮގްރާމުގައި ހަވާލުކުރެވޭ ހުރިހާ މަސައްކަތެއް ވެސް އޭނާ ފުރިހަމަކުރަނީ ވަރަށް ޝައުގުވެރިކަމާއި އެކުގައެވެ. އަދި ކޯޑުކުރުމުގެ އިތުރުން ކަންކަމުގައި ވިސްނުންގެންގުޅެންވީ ގޮތް ދަސްވެގެންދާކަމަށް ޕްރޮގްރާމުގެ ދަރިވަރުން ފާހަގަކުރެ އެވެ.

“މި ޕްރޮގްރާމުން ވަރަށް ގިނަ އެއަޗެހި ދަސްވޭ. ކޯޑުކުރުމުގެ އިތުރުން ހަވާލުކުރެވޭ ތަފާތު މަސައްކަތުން ކަންކަމުގައި ވިސްނުން އިސްކުރަންވީ ގޮތް އެނގިގެންދޭ. މިއީ ކުރިން ހީވެސް ނުކުރާހާ ތަފާތު ކަމެއް.” ޕްރޮގްރާމުގައި ކިޔަވަމުންދާ އުމުރުން 11 އަހަރުގެ އަހުމަދު ބުންޏެވެ.

މިކުދިންގެ މައިންބަފައިން ބުނާގޮތުން މި ޕްރޮގްރާމުގައި ދެވޭ މަސައްކަތްތައް އެކުދިން ޝައުގުވެރިކަމާއި އެކު އެކުދިން އަމިއްލައަށް ކޮށް ނިންމާލަ އެވެ.

“އަޅުގަނޑު ނުޖެހޭ އޮންލައިން ކުލާސް ފެށޭ ގަޑި ހަދާންކޮށްދޭކަށް ވެސް. ކްލާސް އޮންނަ ދުވަހަކު ބުނާނެ މިއަދު އޮންނާނެއޭ ދަ ސާރކަލް ކްލާސްތައް. ކުދިންނަށް ދެވޭ ހުރިހާ މަސައްކަތެއް ވެސް ރޭވި ތައްޔާރު ކުރެވިފައި ހުންނަނީ އެކުދިން ވަރަށް ގަޔާވާގޮތަށް ކަމަށް ދެކެން” އުމުރުން 11 އަހަރުގެ އާޝަލް ގެ މަންމަ ބުންޏެވެ.

“ދަ ސާރކަލް” ގެ ހަރަކާތްތަކުގެ ތެރޭގައި ހިމެނޭ ކޯޑިން އެންޑް ކްރިޓިކަލް ތިންކިން އަދި “ލީޑަރސް އޮފް ޓުމޯރޯ” މިއީ އެޗް.ޑީ.ސީގެ އިޖްތިމާއީ ޒިންމާގެ ތެރެއިން އުގައިލު ފައުންޑޭޝަނާއި އެކު ކުރިއަށްގެންދާ ހާއްސަ ހަރަކާތެކެވެ. މި ހަރަކާތުގެ އިތުރުން އެޗް.ޑީ.ސީ އިން ވަނީ އުގައިލު ފައުންޑޭޝަނާއި ގުޅިގެން “ދަ ސާރކަލް ސްޕޭސް”ގެ ނަމުގައި ހުޅުމާލޭގައި ލައިބްރަރީއެއް ވެސް ހުޅުވާފަ އެވެ.