ކައުންސިލްތަކުން އެންމެބޮޑު އިސްކަމެއް ދޭންޖެހޭނީ، ޤައުމީ ތަރައްޤީގެ ޕްލޭނަށް – ރައީސް

އިއްޔެ ހުވާކުރި ކައުންސިލްތަކުން، އެންމެ ބޮޑު އިސްކަމެއް ދޭންޖެހޭނީ، ޤައުމީ ތަރައްޤީގެ ޕްލޭނާ އެއްގޮތަށް، ރައްޔިތުންނަށް އެންމެ ފައިދާ ހުރި ގޮތަށް، ސިޓީތަކާއި ރަށްތައް ތަރައްޤީކޮށްދިނުމަށްކަމުގައި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް އަންގައިފިއެވެ. ރައީސް މިހެން އެންގީ ކައުންސިލަރުން ހުވާކުރުމާއި އަންހެނުންގެ ކޮމިޓީތަކުގެ މެންބަރުން އިޤްރާރުވުމުގެ މުނާސަބަތުގައި ރައީސުލްޖުމްހޫރިއްޔާ ޤައުމާ މުހާތަބުކުރަމުންނެވެ.

އަދި ރައީސުލްޖުމްހޫރިއްޔާ ވަނީ އިއްޔެ ހަޤީޤީ ލާމަރުކަޒީ ނިޒާމުން، އަތޮޅުތަކާއި ސިޓީތަކާއި ރަށްތައް، ހިންގަން ފެށި ދުވަސްކަމަށް ވާތީ އާއި އިއްޔެއަކީ ފުރަތަމަ ފަހަރަށް ރައްޔިތުންގެ އާންމު ވޯޓަކުން އިންތިހާބުކުރި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތައް، ޤާނޫނީ ހައިސިއްޔަތާއެކު މަސައްކަތްކުރަން ފެށި ދުވަސްކަމަށް ވާތީ މިދުވަސް ރާއްޖޭގެ ލާމަރުކަޒީ ނިޒާމުގެ ތާރީހުގައި، ރަން އަކުރުން ފެވިގެންދާނެދުވަހެއްގެ ގޮތުގައި ފާހަގަކޮށްފައެވެ. އަދި މި ފެށުނު ކައުންސިލްތަކުގެ ދައުރާއެކު، ފިރިހެނުންނާ އެއް ހަމައެއްގައި، އަދި މަޤާމުގެ ގޮތުންވެސް އެއް ފެންވަރެއްގައި، އަންހެނުން ތަމްސީލުކުރާ މިންވަރު އިތުރުވެގެންދާނެކަމަށާއި އެގޭ ނަތީޖާއެއްގެ ގޮތުން ޤައުމީ ތަރައްޤީގެ ދުވެލި އިތުރުވެގެންދާނެ ކަމުގެ ޔަޤީންކަން އެބައޮތް ކަމުގައި ވަނީ ބުނެފައެވެ.

މިމޭރުމުން އިތުރަށް ވާހަކަ ކުރިއަށް ގެންދަމުން، ރައީސުލްޖުމްހުރިއްޔާ ވަނީއަލަށް ދައުރު މިފެށުނު ކައުންސިލްތަކުން ރައްޔިތުންގެ އުންމީދުތައް ހަޤީޤަތަކަށް ހަދައިދިނުމަށް އިލްތިމާސް ކޮށްފައެވެ. އެގޮތުން ރައްޔިތުންގެ ލާބަޔާއި މަޞްލަހަތަށް އިސްކަން ދީގެން، ރައްޔިތުންގެ ހިޔާލާއި މަޝްވަރާއާ އެއްގޮތަށް، ތަރައްޤީގެ ޕްލޭންތައް ތައްޔާރުކޮށް، އެ ޕްލޭނާ އެއްގޮތަށް ރަށްރަށާއި ސިޓީތައް ތަރައްޤީ ކުރުމަށް، ހުރިހާ ކައުންސިލަރުންވެސް، ހާއްސަ ސަމާލުކަމެއް ދޭނެ ކަމަށް އުންމީދުކުރާ ރައީސް އެންގިއެވެ.

އަދި ކައުންސިލްތަކަށް ރައްޔިތުން ހަވާލުކުރި އަމާނާތައް ފުރިހަމައަށް ރައްކާތެރުމަށާއި، އެކައުންސިލަރެއް ތަމްސީލުކުރައްވާ ރަށާއި އަތޮޅަށް ނުވަތަ ސިޓީއަށް ތަރައްޤީ ގެނައުމަށް މަސައްކަތްކުރާ ނަތީޖާ ހޯދައިދިނުމަށް ކައުންސިލަރުންގެ ފަރާތުން އެދިފައެވެ.

އިތުރަށް ވާހަކަ ދައްކަމުން ރައީސުލްޖުމްހޫރިއްޔާ ވަނީ މިހާރު މުޅި ދުނިޔެއަށާއި ރާއްޖެއަށް ކުރިމަތިވެފައިވާ ކޯވިޑް-19ގެ ބަލިމަޑުކަން ކޮންޓްރޯލް ކުރުމަށް ކައުންސިލްތަކުން މިހާރަށް ވުރެ ފުޅާ ދާއިރާއެއްގައި ހަރަކާތްތެރިވުމަށް ބާރުއަޅުއްވާފައެވެ. އެގޮތުން ބަލި ކޮންޓްރޯލްކުރުމަށް އަޅާ ފިޔަވަޅުތައް މިހާރަށްވުރެ ފުރިހަމައަށް ތަންފީޒުކުރުމަށް ހާއްސަ ސަމާލުކަމެއް ދިނުމަށްވަނީ ހުރިހާ ކައުންސިލަރުންގެ ފަރާތުން އެދިފައެވެ