ރާއްޖޭގެ ފުރަތަމަ ކޮމިއުނިޓީ ފައުންޑޭޝަން އުފައްދައިފި

މަދަނީ ޖަމްއިއްޔާތަކަކީ ކޮންމެ ޤައުމެއްގައިވެސް ވަރަށް މުހިންމު ދައުރެއް ކުޅޭ ބަޔެކެވެ. އެގޮތުން ރާއްޖޭގައިވެސް އެކިއެކި ދާއިރާތަކުގައި މަސައްކަތްކުރާ ގިނަ ޖަމްއިއްޔާތަކެއް ވަނީ އުފެދިފައެވެ. އެހެންނަމަވެސް، މީގެން ގިނަ ޖަމްއިއްޔާތަކުގެ ޝަކުވާއަކީ، އެފަރާތްތައް ބޭނުންވާ ފެންވަރުގައި ހަރަކާތްތައް ހިންގުމަށް ބޭނުންވާ ފައިސާ ނުލިބުމެވެ.

ކަން މިހެން އޮތްއިރުގައި، ރާއްޖޭގެ ފުންނާބު އުސް ބަޔެއް ވިޔަފާރިތަކާއި ކުންފުނި ތަކުން މަދަނީ ޖަމްއްޔާތަކަށް އެހީތެރިވުމުގެ ގޮތުން ހަރަކާތްތެރި ވަމުން މިހާރު އާދެއެވެ. ކޯޕަރޭޓް ސޯޝަލް ރެސްޕޮންސިބިލިޓީ ގެ ދަށުން ހިންގޭ ހަރަކާތްތަކުން މަދަނީ ޖަމްއިއްޔާތަކަށް އެހީތެރިވެދެއެވެ. އަދި މީގެ އިތުރުން މަދަނީ ޖަމްއިއްޔާތަކަށް އެހީތެރިވާ ވަކިވަކި ފަރުދުންވެސް ވަރަށް ގިނައެވެ.

advertisement

މިހާރު މިވަނީ މިފަދަ އެހީތެރިކަން ފޯރުކޯށްދިނުމުގެ ގޮތުން ވަރަށް ތަފާތު ޖަމްއިއްޔާއެއް އުފެދިވައެވެ. މޯލްޑިވިއަން ކޮމިއުނިޓީ ފައުންޑޭޝަން (އެމް.ސީ.އެފް) ގެ މަޤުސަދަކީ އެހެނިހެން ޖަމްއިއްޔާތަކަށް ބޭޏުންވާ މާލީ އަދި ފަންނީ އެހީތެރިކަން ފޯރުކޮށްދިނުމެވެ. އެމް.ސީ.އެފް އިން މިކަން ކުރަނީ މަދަނީ ޖަމްއިއްޔާތަކަށް ބޭނުންވާ ފައިސާ ހޯދުމަށްފަހު، އެފައިސާ އެ ޖަމްއިއްޔާތަކަށް ފޯރުކޮށްދީގެނެވެ. ތަފާތަކީ، އެމް.ސީ.އެފް އަށް ލިބޭ ފައިސާގެ އެއްބައި ހުންނަނީ ސަދަޤަ ޖާރިޔާ އެއްގެ ގޮތުގައި އެއްކައިރި ކުރެވިފައި ކަމެވެ. އެހެންކަމުން އެމް.ސީ.އެފް އަށް ދެވޭ ފައިސާ އަކީ ވަގުތުން މުޖުތަމައުއަށް ފައިދާހުރި ކަންކަން ކުރެވުމުގެ އިތުރުން، އެ ފައިސާ ދޭ ފަރާތަށްޓަކައި ދިގުދެމިގެންދާ ސަދަޤާތަކަށްވެސް ވެގެންދެއެވެ. އެމް.ސީ.އެފް ގެ އަނެއްތަފާތަކީ، ވަކި ދާއިރާއެއްގައި މަސައްކަތް ކުރާ ޖަމްއީއްޔާ ތަކާއި ހިލާފަށް، އެ ޖަމްއިއްޔާއިން ތަފާތު ގިނަ ދާއިރާތަކެއްގެ ހަރަކާތްތަކެއް ހިންގުމަށް އެހީތެރިވާނެ ކަމެވެ.

އެމް.ސީ.އެފް. އިން މިހާރު ވަނީ 3 ފަންޑެއް ހުޅުވާފައިއެވެ.

އިންޑިވިޑުއަލް އިންވެސްޓްމަންޓް ފަންޑު

މި ފަންޑުގެ މަޤުސަދަކީ ވަކިވަކި ފަރުދުންނަށް އެމް.ސީ.އެފް އަށް ސަދަޤާތް ކުރުމަށް މަގުފަހި ކުރުމެވެ. މި ފަންޑުގައި ބައިވެރިވުމަށް ވަކި ވަރަކަށް ފައިސާ ދޭކަށެއް ނުޖެހެއެވެ. ކޮންމެ ފަރުދަކަށްވެސް އެފަރާތަކަށް ދެވެން އޮތް މިންވަރެއް ދެވޭނެއެވެ. އެމް.ސީ.އެފް އިން އެދެނީ ކޮންމެ މެމްބަރެއްވެސް ކޮންމެ މަހަކުވެސް ކޮންމެވެސް ވަރެއް ސަދަޤާތް ކުރުމެވެ. އެހެނީ، ކިތަންމެ ކުޑަ މިންވަރެއްވެސް، އާދަވެގެން ތަކުރާރުކޮށް ސަދަޤާތް ކުރުމަށް އިސްލާމްދީން ބާރުއާޅައެވެ. އެމް.ސީ.އެފް އަށް ދޭ ސަދަޤާތުގެ އެއްބައިން މުޖުތަމައުއަށް ބޭނުންތެރި ހަރަކާތްތައް ހިންގޭއިރު، އެއްބައި ހުންނާނީ ދިގުދެމިހެންދާ ސަދަޤާ ޖާރިއާ އެއްގެ ސިފައިގައި އެއްކައިރި ކުރެވިފައެވެ.

ކޯޕަރޭޓް އިންވެސްޓްމަންޓް ފަންޑް

މިއީ ވިޔަފާރިތަކަށް ހާއްސަ ފަންޑެކެވެ. މިފަންޑުގައި ބައިވެރިވުމަށް އެއްބަސްވުމެއްގައި ސޮއިކުރެވޭނެއެވެ. އަދި އެއަށްފަހު އެ ފަރާތަކުން މަހުން މަހަށް ނުވަތަ އަހަރަށް އެއްކޮށް އެފަރާތަކަށް ފެންނަވަރެއް އެމް.ސީ.އެފް އަށް ސަދަޤާތް ކުރާނީއެވެ. މި ފަންޑަށް ލިބޭ އެހީއިންވެސް ވަކި ބަޔެއް ސަދަޤަ ޖާރިއާ އެއްގެ ސިފައިގައި ދިގުދެމިގެންދާނެއެވެ. އަދި އަނެއްބައިން އެކި ހަރަކާތްތައް ހިންގޭނެއެވެ. ކުދިވިޔަފާރިތަކަށް ރޭއްޖޭގެ ފުންނާބު އުސް ބައިނަލްއަޤުވާމީ ކުންފުނިތަކާއި އެއް މިންގަނޑެއްގައި ސީ.އެސް.އާރް ގެ ހަރަކާތް ނުހިންގިދާނެއެވެ. ނަމަވެސް ގިނަ، ކުދި ވިޔަފާރިތަކަކުން، އެފަރާތަކަށް މުޖުތަމައުއަށް އަނބުރާދެވެން އޮތް މިންވަރަކުން ދިނުމުން، މި ހުރިހާ އެހީ އެއް އެއްވެގެން، ވަކި ވިޔަފާރިއަކުން ކުރެވޭނެ ވަރަށް ވުރެ ބޮޑަތި ކަންކަން ހާސިލް ކުރެވިދާނެއެވެ. އެމް.ސީ.އެފް ގެ މަޤުސަދަކީ މިކަން މަގުފައިކޮށް ދިނުމެވެ.

ލެގަސީ ފަންޑު ނުވަތަ ހަދާނީ ފަންޑު

މިއީ ނިޔާވެފައިވާ ފަރާތަތްކުގެ ނަމުގައި އެފަރާތްތަކުގެ އާއިލާ އިން ނުވަތަ ހެޔޮއެދޭ ފަރާތްތަކުން ސަދަޤާތް ކުރުމަށް މަގުފަހި ކޮށްދިނުމަށް އުފައްދާފައިވާ ފަންޑެކެވެ. މިގޮތުން ނިޔާވެފައިވާ ފަރާތްތަކުގެ ހަނދާނުގައި އުފެއްދޭ ފަންޑުތަކަށް ޖަމާކުރެވޭ އެހީ އެއްކޮށް އިންވެސްޓް ކުރެވޭނެއެވެ. އަދި އެ އިންވެސްޓްމަންޓް އިން ލިބޭ ފައިދާ އެކި ހަރަކާތްތަކަށް ބޭނުންކުރެވޭނެއެވެ. އެހެންކަމުން މި އެހީ ވެގެންދާނީ ދާއިމަށް ދެމިގެންދާ ސަދަޤަ ޖާރިއާއަކަށެވެ. މިފަދަ ފަންޑެއް ވިޔަފާރިއަކަށްވެސް ނުވަތަ އާންމުންނަށްވެސް ހުޅުވިދާނެއެވެ. މިސާލަކަށް ދިގުމުއްދަތަކަށް ހިދުމަތްކުރުމަށް ފަހު ކުންފުނީގެ ވަޒީފާއިން ރިޓަޔަރ ވާ މުވައްޒަފަކަށް އޭނަގެ އާހިރަތަށް ފައިދާ ކުރަނިވި މިފަދަ ފަންޑެއް ހުޅުވައި ދިނުމަކީ ކިހާ ރަނގަޅު ވަދާއީ ހަދިޔާއަކަށް ވާނެނޫންތޯއެވެ؟

އެމް.ސީ.އެފް ގެ ހުރިހާ ފަންޑުތަކެއްވެސް ބިނާވެފައިވާ ފަލްސަފާ އަކީ ވަކި ފަރުދަކަށް ވަރަށް ބޮޑު އެހީއެއް ނުވަތަ ސަދަޤާތެއް ދެވެން ނެތްކަމުގައިވިޔަސް، ގިނަ ބަޔެއްގެ ސަދަޤާތް އެއްކޮށްލައިގެން ވަރަށް ބޮޑު އެހީގެ ފަންޑެއް އުފެއްދިދާނެކަމެވެ. އަދި އެމް.ސީ.އެފް ގެ ޚާއްޞަ ކަމަކީ ކޮންމެ ފަންޑަކުންވެސް ދިގުދެމިގެންދާ ސަދަޤާ ޖާރިއާ އެއް އުފެދިގެން ދިޔުމެވެ. އެމް.ސީ.އެފް ގެ ހަރަކާތްތަކާއި ބެހޭ އިތުރު މައުލޫމާތި އެ ޖަމްޢިއްޔާގެ ވެބްސައިޓް http://www.mcf.org.mv އިން ލިބެން ހުންނާނެއެވެ.