ވިޔަފާރިތަކުން ހުއްދަ ހޯދައިގެން ހިދުމަތް ދިނުމުގައި އަމަލުކުރަންވީ ގޮތް ހާމަކޮށްފި

ކޮވިޑް-19 އިން ރައްކާތެރިވުމަށް އަޅާފައިވާ ޚާއްޞަ ފިޔަވަޅުތަކާއި ގުޅިގެން، މިއަދުން ފެށިގެން 9 ޖޫން 2021 ގެ ނިޔަލަށް މާލެ، ހުޅުމާލެ އަދި ވިލިމާލޭގައި ހިންގާ ވިޔަފާރިތަކުން ހުއްދަ ހޯދައިގެން ވިޔަފާރިކުރާ ތަނުން ޚިދުމަތް ދިނުމުގައި އަމަލުކުރަންވީ ގޮތް އިކޮނޮމިކް ޑިވެލެޕްމަންޓް މިނިސްޓްރީން ހާމަކޮށްފިއެވެ.

މި މުއްދަތުގެ ތެރޭގައި ވިޔަފާރިތަކުން ހުއްދައަށް އެދެންޖެހޭނީ، ހަމައެކަނި އެ ވިޔަފާރިއެއްގެ މުވައްޒަފުންނަށް ކަމަށް އެ މިނިސްޓްރީން އިއުލާން ކުރިއެވެ.

advertisement

މުދާ ވިއްކާ ތަންތަން

• މުދާ ވިއްކާ ތަންތަނުން ޑެލިވަރީ ހިދުމަތް ދެވޭނީ، އެ ތަނެއްގައި މަސައްކަތްކުރާ މުވައްޒަފުންނަށް ހުއްދަ ހޯދުމަށްފަހު، ހެނދުނު 6.00 އިން މެންދަމު 12.00 އަށެވެ.
• މުދާ ވިއްކާ ތަންތަން އާންމުންނަށް ހުޅުވާލައިގެން ހިދުމަތް ދެވޭނީ، އެ ތަނެއްގައި މަސައްކަތްކުރާ މުވައްޒަފުންނަށް ހުއްދަ ހޯދުމަށްފަހު، ހެނދުނު 8.00 އިން ހަވީރު 4.00 އަށެވެ.
• މުދާ ވިއްކާ ތަންތަނުގައި މަސައްކަތްކުރާ މުވައްޒަފުންނާއި ޑެލިވަރީ މުވައްޒަފުންނަށް ހުއްދަ ހޯދުމަށް އެދޭނީ، މޯލްޑިވްސް ޕޮލިސް ސަރވިސްގެ ޕޯޓަލް /https://www.police.gov.mv/permit މެދުވެރިކޮށެވެ.
• މުދާ ވިއްކުމުގެ ވިޔަފާރިކުރާ ކޮންމެ ތަނަކަށް، 2 ސަޕޯޓް ސްޓާފް އަދި 2 ޑެލިވަރީ ސްޓާފުންނަށް ހުއްދަ ދޫކުރެވޭނެއެވެ. އިތުރު މުވައްޒަފުންނަށް ހުއްދަ ބޭނުންވާނަމަ، permit@trade.gov.mv އަށް މި އިޢުލާނާއިއެކު ޝާއިޢުކޮށްފައިވާ އެކްސެލް ޝީޓް ފުރިހަމަކުރުމަށްފަހު ފޮނުވުމުން، އިތުރަށް ދިރާސާކުރުމަށްފަހު، ހުއްދަ ދޫކުރެވޭނެއެވެ.
• އިތުރު ހުއްދައަށް އެދޭ ކޮންމެ ފަރާތަކުންވެސް، ޖުމްލަ މުވައްޒަފުންގެ ޢަދަދު 10 އަށްވުރެ އިތުރުވާނަމަ، 2 ދަންފަޅިއަކަށް ބަހާލައިގެން ޑިއުޓީ ގަޑި ކަނޑައަޅައި، އެކްސެލް ޝީޓުގައި ބަޔާންކުރަންވާނެއެވެ.

ކެއިން ބުއިމުގެ ހިދުމަތް ދޭ ތަންތަން

• ކެއިން ބުއިމުގެ ހިދުމަތް ދޭ ތަންތަނުން ޑެލިވަރީ ހިދުމަތް ދެވޭނީ، އެ ތަނެއްގައި މަސައްކަތްކުރާ މުވައްޒަފުންނަށް ހުއްދަ ހޯދުމަށްފަހު، ހެނދުނު 6.00 އިން މެންދަމު 12.00 އަށެވެ.
• ކެއިން ބުއިމުގެ ހިދުމަތް ދޭ ތަންތަނުން ޓޭކްއަވޭގެ ހިދުމަތް ދެވޭނީ، އެ ތަނެއްގައި މަސައްކަތްކުރާ މުވައްޒަފުންނަށް ހުއްދަ ހޯދުމަށްފަހު، ހެނދުނު 8.00 އިން ހަވީރު 4.00 އަށެވެ.

• ކެއިން ބުއިމުގެ ހިދުމަތް ދޭ ތަންތަނުގައި މަސައްކަތްކުރާ މުވައްޒަފުންނާއި ޑެލިވަރީ މުވައްޒަފުންނަށް ހުއްދަ ހޯދުމަށް އެދޭނީ، މޯލްޑިވްސް ޕޮލިސް ސަރވިސްގެ ޕޯޓަލް https://www.police.gov.mv/permit/ މެދުވެރިކޮށެވެ.
• ކެއިން ބުއިމުގެ ހިދުމަތް ދޭ ކޮންމެ ތަނަކަށްވެސް، 4 ސަޕޯޓް ސްޓާފް އަދި 2 ޑެލިވަރީ ސްޓާފުންނަށް ހުއްދަ ދޫކުރެވޭނެއެވެ. އިތުރު މުވައްޒަފުންނަށް ހުއްދަ ބޭނުންވާނަމަ، permit@trade.gov.mv އަށް މި އިޢުލާނާއިއެކު ޝާއިއުކޮށްފައިވާ އެކްސެލް ޝީޓް ފުރިހަމަކުރުމަށްފަހު ފޮނުވުމުން، އިތުރަށް ދިރާސާކުރުމަށްފަހު، ހުއްދަ ދޫކުރެވޭނެއެވެ.
• އިތުރު ހުއްދައަށް އެދޭ ކޮންމެ ފަރާތަކުންވެސް، ޖުމްލަ މުވައްޒަފުންގެ ޢަދަދު 10 އަށްވުރެ އިތުރުވާނަމަ، 2 ދަންފަޅިއަކަށް ބަހާލައިގެން ޑިއުޓީ ގަޑި ކަނޑައަޅައި، އެކްސެލް ޝީޓުގައި ބަޔާންކުރަންވާނެއެވެ.

ރަޖިސްޓްރީކޮށްފައިވާ ވިޔަފާރިތަކުން އޮފީހުގައި މަސައްކަތްކުރުމަށް ހުއްދައަށް އެދުން

• ކޮންމެހެން އޮފީހުގައި ކުރަންޖެހޭ މަސައްކަތްތަކަށް މުވައްޒަފުން އޮފީހަށް ދިޔުމަށް ބޭނުންވާ ވިޔަފާރިތަކުން، ކޮންމެ މުވައްޒަކުގެ ޑިއުޓީ ގަޑި އަދި ކުރަންޖެހޭ މަސައްކަތުގެ ތަފްސީލު permit@trade.gov.mvއަށް މި އިއުލާނާއިއެކު ޝާއިއުކޮށްފައިވާ އެކްސެލް ޝީޓް ފުރިހަމަކުރުމަށްފަހު ފޮނުވުމުން ހުއްދަ ދޫކުރެވޭނެއެވެ.
• މީގެ ތެރޭގައި، އެއަރޕޯޓުގައި މަސައްކަތްކުރަންޖެހޭ މުވައްޒަފުން، އެއަރލައިންތަކުގެ މުވައްޒަފުން އަދި ސްޓޫޑިއޯއަށް ނުވަތަ މަސައްކަތްކުރާ ތަނަށް ގޮސްގެން މަސައްކަތްކުރަންޖެހޭ މުވައްޒަފުންނަށް އެ ވިޔަފާރިއަކުން، މަސައްކަތްކުރާ ތަނުގެ ތަފްސީލާއިއެކު ހުއްދަ ހޯދުމަށް އެދި ހުށަހެޅިދާނެއެވެ.
• އިތުރު ހުއްދައަށް އެދޭ ކޮންމެ ފަރާތަކުންވެސް، ޖުމްލަ މުވައްޒަފުންގެ ޢަދަދު 10 އަށްވުރެ އިތުރުވާނަމަ، 2 ދަންފަޅިއަކަށް ބަހާލައިގެން ޑިއުޓީ ގަޑި ކަނޑައަޅައި، އެކްސެލް ޝީޓުގައި ބަޔާންކުރަންވާނެއެވެ.

ވިޔަފާރީގައި ބޭނުންކުރާ ވެހިކަލް އަދި މުވައްޒަފުންގެ ވެހިކަލްތަކާބެހޭ

• މި މުއްދަތުގެ ތެރޭގައި، ވިޔަފާރިތަކުން މުދާ ފޯރުކޮށްދިނުމަށް އަދި މޯލްޑިވްސް ޕޮލިސް ސަރވިސްއިން ދޫކޮށްފައިވާ ހުއްދަ އޮތް މުވައްޒަފުން މަސައްކަތަށް ދިޔުމަށް ބޭނުންކުރާ ވެހިކަލަށް މޯލްޑިވްސް ޕޮލިސް ސަރވިސް ނުވަތަ މި މިނިސްޓްރީން ހުއްދައެއް ނަގާކަށެއް ނުޖެހޭނެއެވެ.
• މީގެ ކުރިން ވިޔަފާރީގައި ބޭނުންކުރާ ވެހިކަލަކަށް ހުއްދަ ދީފައިވާނަމަ، އެ ވެހިކަލެއް ދުއްވާ މުވައްޒަފަކަށް ހުއްދަ ނަގަންޖެހޭނެއެވެ. އަދި، މިގޮތުން ހުއްދައަށް އެދޭނީ، permit@trade.gov.mv އަށް މުވައްޒަފުންގެ ތަފްސީލު ފޮނުވައިގެންނެވެ.

މީގެ ކުރިން މޯލްޑިވްސް ޕޮލިސް ސަރވިސް މެދުވެރިކޮށް ދޫކޮށްފައިވާ ހުއްދަތައް

• 13 ފެބްރުއަރީ 2021 އިން ފެށިގެން މޯލްޑިވްސް ޕޮލިސް ސަރވިސްއިން ވިޔަފާރިތަކަށް ދޫކޮށްފައިވާ ހުއްދަތައް މި މުއްދަތުގެ ތެރޭގައި ބޭނުންކުރެވޭނެއެވެ.

ތިލަފުށީގައި ހިންގާ ސިނާޢީ މަސައްކަތްތައް

• · މި އިއުލާނާއި ގުޅިގެން، ގުދަން، ބޯޓުޔާޑު ފަދަ ތަންތަނުގައި މަސައްކަތްކުރާ މުވައްޒަފުންނާއި، މާލެ-ތިލަފުށި ގައި ދާއިމީކޮށް ދިރިއުޅޭ ފަރާތްތައް މަސައްކަތައް ދިޔުމަށް މޯލްޑިވްސް ޕޮލިސް ސަރވިސްއިން އިތުރު ހުއްދައެއް ނަގާކަށް ނުޖެހޭނެއެވެ.
• · މިފަދަ ފަރާތްތަކުގެ ވިޔަފާރިތަކުގައި މަސައްކަތްކުރާ މުވައްޒަފުންނަށް ދޫކޮށްފައިވާ ހުއްދަ ބޭނުންކޮށްގެން، މަސައްކަތްކުރުމަށް މާލެ އާއި ތިލަފުއްޓާ ދެމެދު ދަތުރުކުރެވޭނެއެވެ.

ކޮންސްޓްރަކްޝަން ސައިޓްތައް

• މި މުއްދަތުގެ ތެރޭގައި، ކޮންސްޓްރަކްޝަން ސައިޓްތަކުގައި މަސައްކަތްކުރުމަށް ހުއްދަ ދޫކުރެވޭނީ، އެ ސައިޓަކަށް ގެއްލުމެއް ލިބޭނެފަދަ ހާލަތުތަކުގައި، އެ ކަމެއްގެ ތަފްސީލު ފޮނުވުމުން އިތުރަށް ދިރާސާކުރުމަށްފަހުގައެވެ.

މި އިޢުލާނާއި ގުޅިގެން އިތުރު މައުލޫމާތު ސާފުކުރައްވަން ބޭނުންވާނަމަ، permit@trade.gov.mv އަށް އީމެއިލް ކުރެއްވުމަށް އެދިފައިވެއެވެ.