ކޮވިޑް19 އިން ސަލާމަތްވުމަށް ސަރުކާރުގެ ހުރިހާ ވަސީލަތެއް ހާއްސަކުރެވިގެން ދާނެ –ރައީސް

މި ވަގުތު ސަރުކާރުން އެންމެ އިސްކަމެއް ދިނުމަށް ނިންމާފައިވަނީ ރާއްޖެ ކޮވިޑް19 އިން ރައްކާތެރިކުރުމަށްޓަކައި ކުރަންޖެހޭ ކަންކަން ކުރުމަށްކަމަށާއި، އެގޮތުން ސަރުކާރުގެ ހުރިހާ ވަސީލަތެއް މިކަމަށް ހާއްސަކުރެވިގެން ދާނެކަމުގައި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް ބުުނެފިއެވެ. ރައީސް މިހެން ބުނީ ރޭ ނޫސްވެރިންނާ ބައްދަލުކޮށް ކޮވިޑް-19 އާ ގުޅޭ އެންމެ ފަހުގެ މައުލޫމާތު ހިއްސާކުރަމުންނެވެ.

ކޮވިޑް-19 ގައި ރާއްޖޭގެ ހާލަތު މިހާރު ގޮސްފައިވާ ހިސާބު ބަޔާންކުރަމުން ރައީސުލްޖުމްހޫރިއްޔާ އެންގީ މި ވޭތުވެ ދިޔަ އެއް އަހަރު ތެރޭގައި ޕޮސިޓިވް ވި މީހުންނާ މަރުވި މީހުންނާ ގާތްގަނޑަކަށް އެއްވަރަށް މި މަހު އެކަނި ޕޮސިޓިވް ވި މީހުން މަރުވެފައި ވާކަމަށެވެ. އަދި މިއީ ކަންބޮޑުވާ ހިސާބުގައި މިވަގުތު އޮތް ކަމެއް ކަމުގައިވެސް ބުންޏެވެ. އަދި ރާއްޖޭގެ ހާލަތު އިތުރަށް ގޯސްވިޔަ ނުދިނުމަށް އިތުރަށް އެޅުމަށް ނިންމަވާފައިވާ ބައެއް ފިޔަވަޅުތައް މާމިއަދުގެ ވަގުތެއްގައި އަޅަންފަށާނެކަމުގައި އެންގިއެވެ.

advertisement

ރޭގެ ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާ ވަނީ ސިއްހީ ހިދުމަތްތެރިން ވަރުބަލިކަމެއްނެތި ކުރަމުން ގެންދާ މަސައްކަތްތައް ފާހަގަކޮށްފައެވެ.

މި ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާ ވަނީ ހުރިހާ ދިވެހިން ގުޅިގެން ސަރުކާރާ އެއްބައިވެގެން ކޮވިޑް19 ފެތުރުން ހުއްޓުވުމުގައި އަތުކުރިއޮޅާލައިގެން މަސައްކަތްކުރުމަށް އެދިފައެވެ. އަދި ރައީސް އެންގީ އަލަށް އަޅަންފަށާ ފިޔަވަޅުތައް ތަންފީޒުވާން ފެށުމުން އާންމު ހާލަތަށް އަވަހަށް ރުޖޫއަވެވޭނެކަމަށް އުންމީދު ކުރާ ކަމަށެވެ.

ރައީސުލްޖުމްހޫރިއްޔާގެ ވާހަކަގައި ނިންމާލަމުން، ރައީސް ވަނީ ކޮވިޑް19 ގެ ވެކްސިން ގެނައުމަށް ސަރުކާރުން ކުރަމުން ގެންދާ މަސައްކަތްތައް ތަފްސީލުކޮށް ބަޔާންކޮށްފައެވެ. އެގޮތުން ކޮވިޑް19 ވެކްސިން ރާއްޖެއަށް ފޯރުކޮށްދިން ޤައުމުތަކާއި، ސަރުކާރަށް އިތުރަށް ވެކްސިން ހޯދުމަށް ބޭނުންވެގެން ސަރުކާރުގެ ފަރާތުން ވާހަކަ ދެއްކުނު ޤައުމުތަކުގެ ނަންތަކާއި، އެޤައުމުތަކުން ގެނައުމަށް މަސައްކަތްކުރާ ވެކްސިންގެ އަދަދުތައް ވެސް މިރޭގެ ނޫސްވެރިންގެ ބައްދަލުވުމުގައި ބަޔާންކޮށްދިނެވެ.