ފިނޭންސް މިނިސްޓަރަށް ލަފާދިނުމަށް ބައިނަލްއަގުވާމީ އެޑްވައިޒަރެއް ހަމަޖައްސައިފި

މިނިސްޓްރީ އޮފް ފިނޭންސް އިން ވަނީ މިނިސްޓަރަށް ލަފާ ދިނުމަށް ބައިނަލްއަގްވާމީ އެޑްވައިޒަރެއްގެ ގޮތުގައި، ޑރ. ޝާންތާ ޑެވަރަޖަން ހަމަޖައްސާފައެވެ. ޑރ. ޑެވަރަޖަން ވަނީ ވޯލްޑް ބޭންކް ގްރޫޕްގެ އެކްޓިންގ ޗީފް އިކޮނޮމިސްޓް އަދި ޑިވެލޮޕްމަންޓް އިކޮނޮމިކްސްގެ ސީނިއަރ ޑިރެކްޓަރުގެ މަގާމު އަދާކޮށްފައެވެ.

ޑރ. ޝާންތާ ޑެވަރަޖަނަކީ ޖޯރޖްޓައުން ޔުނިވަރސިޓީގެ ޕްރެކްޓިސް އޮފް އިންޓަރނޭޝަނަލް ޑިވެލޮޕްމަންޓް ގެ ޕްރޮފެސަރެކެވެ. މީގެ ކުރިން، ވޯލްޑް ބޭންކްގެ މިޑްލް އީސްޓް، ނޯތް އެފްރިކާ އަދި ސައުތް އޭޝިއާ ސަރަހައްދުތަކުގެ ޗީފް އިކޮނޮމިސްޓްގެ މަގާމުގެ އިތުރުން، 2004 ގެ ވޯލްޑް ޑިވެލޮޕްމަންޓް ރިޕޯޓު ގައި ވެސް މަސައްކަތް ކޮށްފައިވެއެވެ. އަދި 1991 ވަނަ އަހަރާއި ހަމައަށް، ޑރ. ޑެވަރަޖަން ވަނީ ހަރވާޑް ޔުނިވަރސިޓީގައިވެސް މަސައްކަތް ކޮށްފައެވެ. މީގެ އިތުރުން ޑރ. ޑެވަރަޖަން ވަނީ އިކޮނިމިކްސްގެ ދާއިރާއިން ޔުނިވަރސިޓީ އޮފް ކެލިފޯނިއާ އިން ޕީ.އެޗް.ޑީ އަދި ޕްރިންސްޓަން ޔުނިވަރސިޓީ އިން ހިސާބުގެ ރޮނގުން ޑިގްރީ ހާސިލްކޮށްފައިވެއެވެ.

advertisement

“އަޅުގަނޑުމެންގެ ޓީމާއި ޑރ. ޑެވަރަޖަން ގުޅުމަކީ ވަރަށް ހާއްސަ ކަމެއްގެ ގޮތުގައި ފާހަގަކުރަން. ޑރ.ޑެވަރަޖަންގެ އިރުޝާދާއި ލަފާގެ މަތިން ބައިނަލްއަގްވާމީ ފަރާތްތަކާއެކު އޮންނަ ގުޅުން ވަރުގަދަކުރުމަށާއި، ކޮވިޑް-19 ގެ ޕެންޑަމިކް ހާލަތުން އަރައިގަނެ، އިޤްތިސާދު އަލުން އާރާސްތުކޮށް، އަދި މިފަދަ ކަންކަމުން ރައްކާތެރިކުރެވިފައިވާ އިޤްތިސާދެއް ބިނާކުރުމަށް މަގުފަހިވާނެ” ފިނޭންސް މިނިސްޓަރު އަމީރުވަނީ އަންގާފައެވެ.