ސަރުކާރުގެ ނިންމުން ތަންފީޒުކުރުމަށް ސްޓެލްކޯއިން ފެނާއި ކަރަންޓު ބިލުން މޭމަހު ޑިސްކައުންޓް ދެނީ

ސަރުކާރުން ނިންމުމާއި އެއްގޮތަށް ސްޓެލްކޯއިން ކަރަންޓާއި، ފެނުގެ ހިދުމަތްދޭ ރަށްރަށުގެ މެއި މަހުގެ ޔޫސޭޖަށް ހަދާ ބިލްތަކަށް ޑިސްކައުންޓު ދޭން އެ ކުންފުނިން ނިންމައިފިއެވެ.

އެގޮތުން ސްޓެލްކޯއިން ވިދާޅުވީ، މި މަހުގެ އާންމު ގޭބިސީތަކުން ބޭނުންކުރާ ކަރަންޓަށް ދައްކަން ޖެހޭ އަދަދުގެ 40 އިންސައްތަ އާއި އާންމު ގޭބިސީތަކުން ބޭނުންކުރާ ފެނަށް ދައްކަން ޖެހޭ އަދަދުން 30 އިންސައްތް ޑިސްކައުންޓް ލިބޭނެ ކަމަށެވެ.

advertisement

މީގެ އިތުރުން އާންމު ވިޔަފާރިތަކުން ބޭނުންކުރާ ފެނާއި ކަރަންޓަށް ދައްކަން ޖެހޭ އަދަދުން 20 އިންސައްތައިގެ ޑިސްކައުންޓެއް ލިބޭނެ ކަމަށް ވެސް ސްޓެލްކޯއިން ވިދާޅުވެއެވެ.

ބިލުން ޑިސްކައުންޓް ލިބިފައިވާ މިންވަރު ސްޓެލްކޯގެ އެޕްލިކޭޝަން މެދުވެރިކޮށް ބަލައިލެވޭނެ ކަމަށް އެ ކުންފުނިން ބުނެއެވެ. އަދި އެސްއެމްއެސްގެ ގޮތުގައި ބިލު ފޯނަށް ލިބޭއިރު، ބިލު ބަލައިލެވޭ ގޮތަށް ލިންކެއް ހިމަނާފައިވާ ކަމަށާއި އެ ލިންކުން ވެސް ޑިސްކައުންޓް އަދަދު ފެންނާނެ ކަމަށް އެ ކުންފުނިން ބުނެފައިވެއެވެ.

ކޮވިޑް19ގެ ހާލަތު މިވަގުތު ހުރި ގޮތުން އެކުންފުނީގެ ބިލިން ކައުންޓަރުތައް ބަންދުކޮށްފައިވާތީ ބިލު ދައްކާ ފަރާތްތަކުން އެކުންފުނީގެ މޮބައިލް އެޕްލިކޭޝަނާއި ވެބްސައިޓު ބޭނުންކުރުމަށް އެކުންފުނިން ވަނީ އިލްތިމާސްކޮށްފައެވެ. އަދި ކަސްޓަމަރުންނަށް ފަސޭހަ އަދި އަވަސް ޚިދުމަތެއް ދިނުމުގެ ގޮތުން ވެބްސައިޓް މެދުވެރިކޮށް އެއްފަހަރާ އެއް ބިލަށްވުރެ ގިނަ ބިލަށް ފައިސާ ދެއްކުމުގެ އިންތިޒާމްވެސް އެ ކުންފުނިން ވަނީ ހަމަޖައްސައިދީފައެވެ.