ރިޕޯޓް – އެންމެން ރުއްސާނީ ކިހިނަކުން ހެއްޔެވެ؟

ހިމާރަކާއެކު ކޯރެއް ހުރަސް ކުރަންއުޅުނު ދެބަފައިންގެ ވާހަކަ އަހަރެމެން އަޑުއަހަމުއެވެ. އެންމެން ބުނާ ބަސް އަހަން ހަދައިގެން ދެބަފައިންގެ އަތުން ގޯސްހެދި ހިމާރު ކޯރަށް ވެއްޓި މަރުވީއެވެ. ކޮވިޑް 19 ގެ ހާލަތުގައި ރާއްޖޭގައިވެސް މިވަނީ މިކަހަލަ ގޮތެކޭ ހަރު އުމުރުގެ މީހަކު ބުނާ އަޑު އިވެއެވެ.

ކޮވިޑް 19 އިގެ ރާޅު ބިންދާލުމާއެކު ރާއްޖެ ލޮކްޑައުން ކުރިއެވެ. ބޯޑަރު ބަންދުކޮށް ސަރުކާރު އޮފީސްތަކާއި މިސްކިތްތައް ބަަންދުކޮށް ޤައުމުގެ ހަމަހިމޭން ވިއެވެ. ކަރަންޓީން ފެސިލީޓީތަށް ރިޒޯޓްތަކުގައި ހަދައި ބަލިޖެހޭ އެންމެން އެކަހެރިކޮށް ދައުލަތުގެ ބަޖެޓް ކޮވިޑް 19 އިން އަރައިގަތުމަށް އޮއްސާލިއެވެ. ނަތީޖާއެއްގެ ގޮތުން އެތަށް ބައެއްގެ ވަޒީފާ ގެއްލި، އިޤްތިސާދީ ހަރަކާތްތައް ހުއްޓި، ވިޔަފާރިތަށް ބަނގުރޫޓްވިއެވެ.

advertisement

ސަރުކާރުން ލޯނާއި، އިނަޔާތުގެ ގޮތުން އެތަށް މިލިއަން ރުފިޔާއެއް ހަރަދުކުރަމުންދިޔައީ އިޤްތިސާދު ކޮޅަށްޖަހައި ވަޒީފާ ގެެއްލުނު ފަރާތްތަކުގެ ހައްޤު ރައްކާތެރިކުރުމަށެވެ. ޓޫރިޒަމް އަލުން ފަށައި ބޯޑަރު ހުޅުވާލިއެވެ. އޮފީސްތަކާއި މިސްކިތްތަކާއި ކެފޭ ރެސްޓޯރަންޓްތައް ހުޅުވާލައި އިޤްތިސާދަށް އަލުން ދިރުން ގެނައެވެ. އުއްމީދުގެ ހުޅުކޮޅު ދިއްލި މާލެތެރެ ހޭލެމޭލިވެ ދިރުން ގެނައެވެ.

އިދިކޮޅު ފަރާތްތަކުން ދިޔައީ ލޯކަލް ކައުންސިލް އިންތިހާބު ލަސްކުރަން ސަރުކާރުން މަސައްކަތް ކުރަމުންދާކަމަށް އަޑުގަދަކޮށް އަޑު އުފުލަމުންނެވެ. ކޮވިޑަށް ބެލުމެއްނެތި މުޒާހަރާކޮށް އިންތިހާބު އަވަސްކުރުމަށް ޕްރެޝަރ ކުރަމުންނެވެ. ނަތީޖާއެއް ގޮތުން އިލެކްޝަަން ކޮމިޝަނުން މަޖިލީހުގެ އެހީތެރިކަމާއެކު އޭޕްރިލްގައި އިންތިހާބު ބާއްވަންނިންމިއެވެ. އެކަމާ ގުޅިގެން ކެމްޕެއިންކޮށް މުޅި ރާއްޖެއަށް ދަތުރުކުރެވި އިންތިހާބުގެ ފޯރިއާއެކު ރާއްޖެ އަލުން ގުޅުވާލިއެވެ. .

މިސްކިތްތައް ބަންދުކުރުން ވެގެންދިޔައީ ދީނީ ބައެއް އިލްމުވެރިނަށް އެއްގޮތަކަށްވެސް ރުހެވުނު ކަމަކަށް ނޫނެވެ. މައްކާގެ ހަރަމްފުޅު ބަންދުކުރުވުނު ހާލަތަކީ ކޮވިޑުގެ ހާލަތު ކަމުގައިވިޔަސް، ރާއްޖޭގެ މިސްކިތްތައް ބަންދުކުރުން ވެގެން ދިޔައީ އިސްލާމްދީނާ ދެކޮޅަށް ސަރުކާރުން އެޅި ފިޔަވަޅަކަށެވެ. ބަަންދުކުރެވިފައިވާ މިސްކިތްތައް ހުޅުވާލުމާއެކު ގައިދުރުކުރެމެއް ނެތި، ރައްކާތެރިކަމުގެ އެެއްވެސް ފިޔަވަޅެއްނެތި، މިސްކިތްތައް އަލުން ބޭނުން ކުރުމަށް މިބުނާ އިލްމުވެރިން ބާރު އެޅިއެވެ.

ރެސްޓޯރެންޓް ކެފޭތަކުގެ ވިޔަފާރި ޑެލިވަރީއަށް ބަދަލުކުރި ކުރުމަކީ އެވިޔަފާރީގައި އުޅުއްވާ ބޭފުޅުން އެއްގޮތަކަށްވެސް ރުހެވުނު ކަމަކަށް ނުވިއެވެ. ޕްރެސް ކޮންފަރެންސް ބާއްވައި މިކަމުގައި އިހްތިޖާޖަކަށް ދާނެކަމަށާއި އަލުން ހުޅުވުމަށް ހުއްދަ ދިނުމަށް ސަރުކާރަށް ޕްރަޝަރ ކުރެވެނުވެ. އަދި ނަތީޖާއެއްގެ ގޮތުން އުސޫލަތަކަކާއި އެކު ހުއްދަ ދެވުނަސް ގިނަތަންތަނުން މިކަންކަމަކަށް އަމަލެއް ނުކުރާކަން ފާހަގަ ކުރެވުނެވެ.

ގެސްޓްހައުސް ވިޔަފާރި ކުރާ ފަރާތްތަކުން ދިޔައީ ގެސްޓްހައުސްތައް ހުޅުވާލުމަށް އެދެމުންނެވެ. ހުއްދަ ދެވުމާއެކު ގިނަ ގެސްޓްހައުސްތައް ބޭނުންކުރެވުނީ އޭސިއާ ސަރަހައްދުގެ މަސައްކަތްތެރިންގެ ކަރަންޓީން މަންޒިލެއްގެ ގޮތުގައެވެ. އަދި މިކަންކަން ބޮއްސުންލައި އެތަށް ރަށެއްގައި ކޮވިޑު ފަތުއަޑު ކިޔާފައި ފެތުރިގަތެވެ.

ކޮވިޑްގެ ހާލަތު އަނެއްކާވެސް އޭޕްރިލްމަހު ގޯސްވެގެން ދިއުމާއި ގުޅިގެން މިހާރު މިވަނީ ލޮކްޑައުން ހާލަތެއްގައެވެ. އަދި މިކަމަށް މެދުވެރިވި ހުރިހާ ހާލަތެއްގެ ޒިންމާ އަޅުވަނީ ސަރުކާރުގެ ބޮލުގައެވެ. އިދިކޮޅުން އިންތިހާބު އަވަސްކުރަން ޕްރެޝަރ ކުރިކަަމަކަށް މިހާރު ނުވެއެވެ. ދީނީ އިލްމުވެރިން ގައިދުރުކުރަން ދެކޮޅު ހެދި ހެދުމާއި، ކާބޯތަކެތި އުފައްދާ ފަރާތްތަކުން ކެފޭތަށް ހުޅުވާލަން ކުރި މަސައްކަތާއި، ގެސްޓްހައުސްތައް ކަރަންޓީން މަރުކަޒުތަކެއްގެ ގޮތުގައި ބޭނުންކުރުމުގެ ޒިންމާވެސް ނަގަން މިޖެހުނީ ސަރުކާރަށެވެ.

މިހާލަތަށް އަނެއްކާ ކޮވިޑްގެ ކަންކަން އަައުމުގެ ޒިންމާ ސަރުކާރުގެ ބޮލުގައި އެކަނި އެޅުވާކަށް ނެތެވެ. ނަމަވެސް އަހަރު ދުވަސް ވީއިރުވެސް އެންމެ ގޯސް ހާލަތަކަށް ގޮސްފިނަމަ ވާންޖެހޭ ތައްޔާރީތަށް ވުމުގައި ސަރުކާރުގެ މަސައްކަތް ދެރަވަރުކަން ފާހަގަ ކުރެވެއެވެ. އަދި ކުރެވުނު ހަރަދަށް ބަލާއިރު ނަތީޖާ ހަމަ ސުމެކެވެ. ގިނަބަޔަަކު ދެކޭގޮތުގައި ސަރުކާރުން ބޭނުންވީ އެންމެ ރުއްސާށެވެ. ހިމާރާއެކު ކޯރު ހުރަސްކުރި ދެބަފައިންގެ ހާލަތުން އެގެނީ އެންމެން ރުއްސަން ހަދައިގެން އަމާޒުން ކައްސާލައި ކެހި ލިބުމަކީ ދުނިޔޭގެ އުސޫލުކަމެވެ.