އެމަޖެންސީ މެޑިކަލް ސަރވިސްއަކީ ވަކި ޚިދުމަތެއްގެ ގޮތުގައި ހަދަނީ

އެމާޖެންސީ މެޑިކަލް ސާވިސްއަކީ ވަކި ހިދުމަތެއްގެ ގޮތުގައި ހަދައި މިކަމަށް ގުޅާނެ ވަކި ނަންބަރެއް ގާއިމުކުރުމުގެ މަސައްކަތް ފަށައިފިއެވެ. މި ބަދަލަކީ، ފަރުވާ ލަސްވުމުގެ ސަބަބުން އުމުރުން 10 އަހަރުގެ ފާތިމަތު މިޝްކާ މުހައްމަދު މަރުވުމާ ގުޅިގެން ހެދި ކޭސް ރިވިއުއަށްފަހު ގެންނަން ނިންމި ބަދަލެކެވެ.

މިޝްކާގެ މަރާ ގުޅިގެން ހެލްތު މިނިސްޓްރީން ކުރިއަށް ގެންދިޔަ ކޭސް ރިވިއުގައި ވަނީ މިޝްކާ އަށް ސިއްހީ ހިދުމަތް ފޯރުކޮށްދިނުމުގައި ހެލްތު އެމަޖެންސީ އޮޕަރޭޝަން ސެންޓަރުން އަމަލުކޮށްފައިވާ ގޮތާއި، ހަރަކާތްތެރިވެފައިވާ ގޮތް ދެނެގަތުމަށް އެއްކޮށްފައިވާ މައުލޫމާތާއި ފާހަގަވި ކަންތައްތަކެވެ.

advertisement

ހެލްތު މިނިސްޓްރީން އާންމުކޮށްފައިވާ ކޭސް ރިވިއުގައި ގިނަ ކަންތައްތަކެއް ވަނީ ފާހަގަކޮށްފަ އެވެ. އެގޮތުން މިޝްކާގެ ހާލު ގޯސްވާތީ އެތައް ފަހަރަކު ގުޅުމުން ވެސް އެމްބިއުލާންސް ފޮނުވައިދެވިފައި ވަނީ އޭގެ ދެ ގަޑިއިރާ 26 މިނެޓު ފަހުން ކަން ވަނީ ހާމަވެފަ އެވެ. އެހެންކަމުން ދެވަނަ ފަހަރަށް އެފަދަ ކަމެއް ތަކުރާރު ނުވާނެ ގޮތަކަށް މަސައްކަތްތަކެއް ކުރަން ނިންމާފައިވާ ކަމަށް ބުނެފައިވެ އެވެ.

އެގޮތުން ކޮވިޑް19 އަށް ޕޮޒިޓިވްވާ ފަރާތްތައް ޑޮކްޓަރަށް ދައްކައި، އައުޓް ޕޭޝަންޓު ބޭސިސްގައި ފަރުވާ ލިބޭނެ އިންތިޒާމް މާލެ ސަރަހައްދު (މާލެ، ހުޅުމާލެ، ވިލިމާލެ) ގައި ހަމަޖައްސައި، އެތަންތަނަކީ 24 ގަޑިއިރު ހިދުމަތްދޭ ތަންތަން ކަމުގައި ހަމަޖެއްސުމުގެ މަސައްކަތް ކުރަމުން އަންނަ ކަމަށް ރިވިއުގައިވެ އެވެ. މިނިސްޓްރީން ބުނީ، އެފަދަ ތަންތަނަށް ކޮވިޑް19 އަށް ޕޮޒިޓިވްވެފައިވާ މީހުން “ވޯކް އިން” ކޮށްގެން ހިދުމަތް ހޯދޭނެ ކަމަށެވެ.

އޭގެ އިތުރުން، ކޮވިޑަށް ޕޮޒިޓިވްވެފައިވާ މީހަކު އެމަޖެންސީ ހާލަތެއްގައި އެމްބިއުލާންސް ހޯދަން ސިއްހީ ހިދުމަތް ދޭ އެއްވެސް ތަނަކަށް ގުޅައިފި ނަމަ، އެތަނަކުން އެފަރާތެއް ބޭނުންވާ ސިއްހީ ހިދުމަތް ދިނުމަށްޓަކައި އެމްބިއުލާންސް ފޮނުވަން ޖެހޭނެ ގޮތަށް އުސޫލުތައް ކަނޑައަޅައި، ހިއްހީ ހިސުމަތްދޭ ފަރާތްތަކަށް އެކަން އެންގުމުގެ މަސައްކަތް ކުރަމުން އަންނަ ކަމަށް ހެލްތުން ބުންޏެވެ.

އެޗްއީއޯސީގެ މެޑިކަލް ރެސްޕޯންސް މިހާރު ހިނގަމުންދާ ގޮތަށް ބަދަލުތަކެއް ގެންނަން ވަނީ ނިންމައިފަ އެވެ. އޭގެތެރޭގައި ކޯލް ސެންޓަރަށް އަންނަ އިމަޖެންސީ ކޯލްތަކަށް އަވަސްމިނުގައި ހުރިހާ ކްލަސްޓާތަކުން ފިޔަވަޅު އަޅަމުންދޭތޯ މޮނިޓަކުރެވޭނެ ގޮތްތަކެއް ހަމަޖެއްސުމާއި، ކޯލް ސެންޓަރަށް އަންނަ އިމަޖެންސީ ކޯލްތައް ރަނގަޅށް ކެޓަގަރައިޒް ކުރެވޭނެ ނިޒާމު ހަރުދަނާކުރުމާއި، މަދު ވަގުތު ކޮޅެއްގެތެރޭގައި އިމަޖެންސީ ކޭސް އަކަށް ބޭނުންވާ އެމްބިއުލާންސް ޓްރިގާކުރެވޭނެ ގޮތަށް ނިޒާމަށް ބަދަލު ގެނައުން ހިމެނެއެވެ.