ރިޕޯޓް: މަޖިލީހުން ޖިނާއީ ތަހުޤީޤު ކުރުން ބަލައި ގަނެވޭނެތަ؟؟

ރައީސް ނަޝީދު މަޖިލީހަށް ކުރިމަތިލެއްވި ހިސާބުން ބައެއް ފަރާތްތަކުން އޭރު ވެސް ދެއްކި ވާހަކައެކެވެ. އެ ފަރާތްތަކުން އެކަން ސިފަކުރީ ދެ ސަރުކާރެއް އުފެދެން އުޅޭ ކަމުގެ ނިޝާނެއްގެ ގޮތުގައެވެ. އަަދި ރައީސް ނަޝީދުގެ އެ ނިންމެވުމަކީ ބާރުތަކަށް ފެންބޮވައިގެންފައިވާ ކަމުގެ ހެއްކެއްގެ ގޮތުގައި އެއްބަޔަކު ސިފަކުރިއެވެ. ރައީސްކަން ނުލިބުމުން ދެން އޮތް ގޮތަކުން ބާރުތައް އަތްދަށަށް ގެންނެވުމުގެ މަގެއް ކޮއްޓަވަނީ ކަމަށް ފާޑުކިޔާ ފަރާތްތަކުން ބުނަމުން ދިޔައެވެ. މިއަދު މިވަމުންދަނީ ކިހިނެއް ހެއްޔެވެ؟

މަޖިލީހުހެ ރައީސް ހޮވުމުގެ ކެމްޕެއިންގެ ތެރެއިން ބާރުތަކަށް އޮތް ވާދަވެރިކަން ހާމަވާން ފެށިއެވެ. ސަރުކާރަށް އަހަރެއް ނުވަނީސް ޕާޓީ ދެބައިވެ ބޮޑު ހަމަނުޖެހުމަކަށް ދިޔަނުދިނުމަށް އެ ފަހަރު ހޯދި ހައްލަކީ ރައީސް ނަޝީދު މަޖިލީހުގެ ރައީސް އަށް އިންތިހާބުކުރުމެވެ. ނަމަވެސް އެއީ ހާލަތު ނިޔާކުރި ގޮތްތޯ ނުވަތަ ރޭވިގެން ހިނގި ކަމެއްތޯ ސުވާލުކުރާ މީހުން އަދިވެސް މަދެއް ނޫނެވެ. މަޖިލީހުގެ ރިޔާސަތުގައި ހަމަޖެހިވަޑައިގެން ރައީސް ނަޝީދު ދެން ކުރައްވަން ފެއްޓެވި ކަންކަމުގެ މުގޫ ވެސް ގޮސް ގުޅެނީ ބާރުތައް އަތްދަށުކުރުމުގެ މަސައްކަތާ އެވެ. ސަރުކާރުގެ ކަންކަމަށް ސީދާ ގޮތެއްގައި މަޖިލީހުގެ ތެރެއިން ހުރަސްތަކެއް ކުރިމަތިނުކުރެއްވި ނަމަވެސް އިދިކޮޅު ޕާޓީއަކަށް ވުރެ ސަރުކާރަށް އުނދަގޫ ޖައްސަމުން ދަނީ އެމްޑީޕީގެ އެތެރެއިންނޭ ބުނުމަކުން ގޯހަކަށް ނުވާނެއެވެ. ހާއްސަކޮށް ކޮންމެ ކަމަކަށް އުދުޅި ބޭނުމުގެ ސިޔާސަތުގެ ތެރެއިން ކުދިކުދި ކަންކަމުގެ ތެރެއަށް ވެސް މަޖިލީހުގެ ކޮމިޓީތައް ދިޔައީ ވަންނަމުންނެވެ. ނަތީޖާ އެންމެ ފަހުން މި ވަނީ ވަރަށް ބޮޑަށް ގޯސްވެފައެވެ.

advertisement

މަޖިލީހަކީ ދައުލަތެއް ހިންގުމަށް ބޭނުންވާ ގާނޫނުތައް ހެދުމާއި އެކަމަށް ފަހިކުރުމާއި އެ ގާނޫނުތަކުގެ މަތީގައި ދައުލަތް ހިނގާ ގޮތަށް ފާރަލައި ޖަވާބުދާރީކުރުވުމުގެ މަސައްކަތްކުރުމަށް އޮތް މައި އިދާރާއެވެ. ނަމަވެސް އޭގެ މާނައަކީ ދައުލަތުގައި އުފެދިފައި ހުރި ހުރިހާ މުއައްސަސާތަކެއްގެ އާންމު މަސައްކަތުގެ ތެރެއަށް ވަނުމެއް ނޫނެވެ. އަދި އެއީ މުތުލަގަށް މަޖިލީހަށް ލިބިފައި އޮތް ބާރެއް ވެސް ނޫނެވެ. މަޖިލީހަކީ ކޮންމެ މައްސަލައެއް ބަލަންޖެހޭ އިދާރާގެ ގޮތުގައި ގާނޫނުއަސާސީގައި ލިޔެފައެއް ނެތެވެ. ނަމަވެސް ރައީސް ނަޝީދުގެ ޒައާމަތުގައި މަޖިލީހުގެ ތެރެއިން ފެންނަނީ މުޅިން ތަފާތު މަންޒަރެކެވެ. ހާއްސަކޮށް އެމަނިކުފާނަށް ވަފާތެރި މެންބަރުންގެ ފަރާތުންންނެވެ. ބައެއް ފަހަރު މުޅި ދައުލަތުގެ މަސައްކަތް މަޖިލީހުން ކުރަން އުޅެނިއްޔޭ ހީވާ ފަހަރު ވެސް މަދެއް ނޫނެވެ.

ފާޑުވިދާޅުވާ މަޖިލީހުގެ މެންބަރަކު ވިދާޅުވީ 100 މީދަލަށް ވުރެ ރައީސް ނަޝީދާއި އެ މަނިކުފާނުގެ މެންބަރުންގެ އުނދަގޫ ސަރުކާރަށާއި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހަށް ބޮޑުކަމަށެވެ. މަޖިލީހުގައި ރައީސް ނަޝީދަށް ތާއީދުކުރާ މެންބަރުންގެ އަގުލަބިއްޔަތު ނެތުމަކީ މި ސަރުކާރު މިހާތަނަށް ވެސް ދެމި އޮތުމުގެ ސަބަބު ކަމަށް އެ މެންބަރު ވިދާޅުވިއެވެ. އެހެން ނޫން ނަމަ ސަރުކާރަށް މިހާރު ނޭވާލެވޭ ވަރަށް ވެސް ނޭވާ ނުލެވުނީސް ކަމަށް އެ މެންބަރު ވިދާޅުވިއެވެ. މަޖިލީހުގައި ނަގަމުންދާ ވޯޓުތަކާއި ނިންމާ ނިންމުންތަކަށް ބަލާއިރު މި ވަގުތު އެމްޑީޕީގެ މަޖިލިސް މެންބަރުންގެ މެޖޯރިޓީ އޮތީ ރައީސް ސޯލިހްގެ ފެކްޝަނަށެވެ.

ކުރިން ވާހަކަ ދެއްކެވި މެންބަރު އެ އިޝާރާތްކުރެއްވީ މަޖިލީހުގެ ކޮމިޓީތަކުން ބަލާފައިވާ އަދި ބަލަމުން އަންނަ ބައެއް މައްސަލަތަކަށާއި މަޖިލީހުގައި ކުރެވޭ ބަހުސްތަކުގައި ސަރުކާރަށް ކުރިމަތިވާ ފާޑުކިޔުންތަކަށެވެ. ހަގީގަތުގައި ވެސް އިދިކޮޅު މެންބަރުންނަށް ވުރެ އެމްޑީޕީ މެންބަރުންގެ ފަރާތުން މި ސަރުކާރަށް ރައްދުވާ ފާޑުކިޔުމާއި ކުރާ ޖެއްސުން ބޮޑެވެ. ތަހުގީގީ އިދާރާތަކުން ބަލަމުންދާ މައްސަލަތަކުގެ ތެރެއަށް އަމިއްލަ އަށް ވަދެ ކޮމިޓީތަކުގެ ޖިނާއީ ތަހުގީގުތައް ކޮށް، މީހުން ހާޒިރުކޮށް ސުވާލުކުރުން ފަދަ އަމަލުތައް މަޖިލީހުގެ ތެރެއިން ދަނީ ފެންނަމުންނެވެ. ރައީސް ނަޝީދަށް ދިން ބޮމުގެ ހަމަލާގެ މައްސަލައިގެ ތަހުގީގުގައި ވެސް ފެންނަނީ މިފަދަ މަންޒަރެކެވެެ.

ރައީސް ނަޝީދަށް ދިން ހަމަލާއަކީ ބަލަންޖެހޭ ސީރިއަސް މައްސަލައެކެވެ. އަދި ރައީސް ނަޝީދަށް އިންސާފު ލިބުމަކީ ވަރަށް މުހިންމު ކަމެކެވެ. ނަމަވެސް އެ ކަންކުރުމަށްޓަކައި ޖިނާއީ ތަހުގީގުކުރުމުގެ ބާރު ލިބިދީފައިވާ އިދާރާތައް އެބަހުއްޓެވެ. އެކަން ކުރަން ވެސް އެބަ ކުރެއެވެ. މަޖިލީހުން ކުރަންޖެހޭ ކަމަކީ އެ ތަހުގީގުތަކަށް ފާރަވެރިވުމެވެ. ސެކިއުރިޓީ ބްރީޗްވެގެން ހިނގާފައިވާ ކަމެއްގެ ގޮތުގައި ބެލެވޭ ނަމަ އެ މައްސަލަ ވެސް ބަލަންވީއެވެ. ނަމަވެސް އެކަން ކުރަންޖެހޭނީ ގާނޫނުތަކުގައި ވެސް ބުނެފައި އޮންނަ ގޮތަށެވެ. ސެކިއުރިޓީ ދިނުމަށްޓަކައި ހަވާލުކޮށްފައިވާ މުއައްސަސާ އިން އިހްމާލުވެފައިވާ ނަމަ އެ އިހްމާލެއް ބެލުމަކީ ކުރަންޖެހޭ ކަމެކެވެ. ނަމަވެސް މަޖިލީހުގެ ޒިންމާއަކީ އެކަމުގައި ޒިންމާވާ ފަރާތްތައް ޒިންމާދާރުކުރުވުމެވެ. ހަމަލާ ދިން އިރު އެ ތަނުގައި ތިބި މީހުންނާއި އެ ތަނުގައި ހަރަކާތްތެރިވިހާ އެންމެން މަޖިލީހަށް ހާޒިރުކޮށްގެން ސުވާލުކުރާ ނަމަ އެ ކުރެވެނީ ޖިނާއީ ތަހުގީގެކެވެ. އެކަން މަޖިލީހުގެ ކޮމިޓީއަކުން ކުރާ ނަމަ ފުލުހުންގެ އިދާރާ އާއި އެ ނޫން ވެސް އިދާރާތަކުގެ ބޭނުމެއް ނެތެވެ.

މިހާރު އެންމެ ހޫނުވެފައިވާ މައްސަލައަކީ މަޖިލީހުގެ 241 ކޮމިޓީން ބަލާ މައްސަލައަކަށް ވަކިވަކި ސިފައިން ނުފޮނުވުމަށް އެމްއެންޑީއެފް އިން ނިންމި ގާނޫނީ ނިންމުމެއް މަޖިލީހަށް ފޮނުވި އިރު ސޮއިކުރި ފަރާތާ މެދު ފިޔަވަޅު އެޅުމުގެ މައްސަލައެވެ. އެއީ މަޖިލީހުގެ އިމްތިޔާޒާބެހޭ ކަމެއްގެ ގޮތުގައި ބަލައި އެ މައްސަލަ އިމްތިޔާޒާ ބެހޭ ކޮމިޓީން ބެލުމަށް ނަޝީދަށް ތާއީދުކުރައްވާ ބޭފުޅުން ކުރެއްވި މަސައްކަތަށް ހުރަސް އެޅުއްވީ ވެސް އެމްޑީޕީގެ މެންބަރުންތަކެކެވެ. އެކަމާ ގުޅިގެން އެއީ “ޣައްދާރުން”ގެ ގޮތުގައި އެއްބަޔަކު ދަނީ ސިފަކުރަމުންނެވެ. ނަމަވެސް ހަގީގަތަކީ އެ ބޭފުޅުން އެ ގޮތަށް ނިންމެވީ ސަބަބުތަކެއް ހުރެގެން ކަމެކެވެ. އެއީ މިހާރު ވެސް މަޖިލީހުގެ އެހެން ކޮމިޓީއަކުން ބަލަމުން އަންނަ މައްސަލައަކަށް ވާތީ އެވެ. އަދި އެއީ އެމްއެންޑީއެފްގެ ނިންމުމެއް ކަމަށްވާ އިރު އެ ކަމުގައި ފިޔަވަޅެއް އަޅާ ނަމަ އަޅަންޖެހޭނީ އެ ތަނުގެ ވެރިންނަށް ކަމަށް ބައެއް މެންބަރުން ދެކިވަޑައިގަންނަވައެވެ. އެހެންކަމުން ފިޔަވަޅެއް އަޅާ ނަމަ ޗީފް އޮފް ޑިފެންސް އަދި ޑިފެންސް މިނިސްޓަރަށް ފިޔަވަޅު އަޅަން ނުކެރިގެން އުޅެނީ ކީއްވެތޯ އާއި މިއަށް ވުރެ ކުދި ކުދި ކަންކަމުގައި ވަޒީރުންގެ އިތުބާރު ނެތްކަމުގެ މައްސަލަތައް ހުށަހަޅާފައިވާ އިރު މިފަދަ ބޮޑު މައްސަލައެއްގައި ޒިންމާވާންޖެހޭ ފަރާތުގެ ގޮތުގައި ގިނަ ބަޔަކު ތުހުމަތުކުރާ ޑިފެންސް މިނިސްޓަރު މާރިޔާ ދީދީގެ އިތުބާރު ނެތްކަމުގެ މައްސަލަ ހުށަހަޅަން ނުކެރިގެން އުޅެނީ ކީއްވެގެންތޯ ބައެއް ފަރާތްތަކުން ދަނީ ސުވާލުކުރަމުންނެވެ.

ނަޝީދާއި ނަޝީދަށް ތާއީދުކުރައްވާ މެންބަރުން ދެކިވަޑައިގަންނަވާ ގޮތުގައި ރައީސް ސޯލިހް އުޅުއްވަނީ އެ “ތަހްގީގަށް” ހުރަސް އެޅުއްވުމަށެވެ. ނަމަވެސް އެކަން އެގޮތަށް ކޮށްގެން ސަރުކާރަށް އޮތީ ކޮން ފައިދާއެއް ހެއްޔެވެ؟ ކޯލީޝަނެއްގެ ނަމުގައި އޮތަސް ސަރުކާރު ހިންގަނީ އެމްޑީޕީންނެވެ. އެހެންކަމުން އެމްޑީޕީގެ ރައީސަށް ދިން ހަމަލާއެއްގެ މައްސަލަ އެންމެ އަވަހަށް އެންމެ ބޮޑަށް ބަލަން ބޭނުންވާނީ ވެސް ސަރުކާރުންނެވެ. ހާއްސަކޮށް އެމަނިކުފާނުގެ އެންމެ އެކުވެރިޔާ، ރައީސް ސޯލިހްއެވެ. ނަމަވެސް އޭގެ މާނައަކީ ގާނޫނޫތައް ބޮލާލާ ޖަހާފައި، ރައީސް ނަޝީދު ކަމުގައި ވިޔަސް ކޮންމެ ކަމެއް ވަރިހަމަ ކަމަށް ބަލައިގެން ތިބުމެއް ނޫނެވެ. ދައުލަތުގެ ތަހުގީގީ އިދާރާތަކުން އެ މައްސަލަ ވަރަށް ހަލުވިކަމާ އެކު ކުރިއަށް އެބަ ގެންދެއެވެ. އެ ތަހުގީގާ މެދު ހިތްހަމަނުޖެހޭ ނަމަ ނުވަތަ އެކަން ކުރާ ގޮތް ކަމުނުދާ ނަމަ އެ ތަންތަނުގެ ވެރިން ހާޒިރުކޮށް ޒިންމާދާކުރަންވީއެވެ. ނަމަވެސް ވަކިވަކި ފުލުހުންނާއި ސިފައިން މަޖިލީހަށް ހާޒިރުކޮށްގެން ކުރާ މަސައްކަތަކީ ޖިނާއީ ތަހުގީގެއްގެ ތެރެއަށް ވަނުން ކަމަށް ނޫނީ ނުވާނެއެވެ. މީގެ ކުރިން ވެސް ވައްކަމާއި ޖިންސީ ގޯނާގެ މައްސަލަތައް ފަދަ ބައެއް މައްސަލަތަކުގައި މަޖިލީހުން ވަނީ ޖިނާއީ ތަހުގީގެއްގެ ގޮތުގައި ސިފަވާ ގޮތަށް އަމަލުކޮށްފައެވެ. ނަމަވެސް ކޮންމެ މައްސަލައެއްގެ ތެރެއަށް މަޖިލީހުން ވަނުމަކީ ޑިމޮކްރެޓިކް ވެރިކަމެއްގައި އަދި ހާއްސަކޮށް ރިޔާސީ ވެރިކަމެއްގެ ނިޒާމާ ވެސް ނުގުޅޭ ކަމެކެވެ. އެއީ ގާނޫނު އަސާސީ ވެސް ދަންނަ ގޮތެއް ނޫނެވެ. ކޮންމެ ކަމަކަށް މަޖިލީހުން އުދުޅި ބޭނުން ބަލައެއް ނުގަނެވެއެވެ.