ގުޅީފަޅު ބަނދަރު ތަރައްޤީކުރުމުގައި ކައުންސިލް ނިންމުމާ ހިލާފުވާނަމަ ކޯޓަށް ދާނަން – މުއިއްޒު

މާލެ ސިޓީ ކައުންސިލްގެ ނިންމުމާ ހިލާފަށް ގުޅިފަޅުގައި ވިޔަފާރި ބަނދަރު ތަރައްގީ ކުރާ ނަމަ އެކަމާ ދެކޮޅަށް ކޯޓަށް ދާނެ ކަމަށް މޭޔަރު ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.

ރޭބޭއްވި ނޫސްވެރިންގެ ބައްދަލުވުމުގައި މާލޭ ސިޓީގެ މޭޔަރު މުއިއްޒު ވިދާޅުވީ ގުޅިފަޅަކީ މާލޭގެ ރައްޔިތުންގެ ގެދޮރުގެ މައްސަލައަށް އޮތް ހައްލު ކަމަށެވެ. އެކަން ތަންފީޒުކުރުމަށް ހުރިހާ މަސައްކަތްތައް ކުރާނެ ކަމަށް އޭނާ ވިދާޅުވި އެވެ.

advertisement

ގުޅީފަޅުން 1،244 ގޯތިދޭން ސަރުކާރުން ނިންމާފައިވާއިރު ނޫސްވެރިންގެ ބައްދަލުވުމުގައި މުއިއްޒު ވިދާޅުވީ މަދުވެގެން 30،000 ރައްޔިތުންނަށް ގެދޮރު ލިބޭނެ ގޮތަށް ޕްލޭން ރިވައިސްކުރާނެ ކަމަށް ރައީސުލްޖުމްހޫރިއްޔާ ވިދާޅުވެފައިވާކަމަށެވެ.

ގުޅިފަޅު ހިއްކުމާ ގުޅޭ އީއައިއޭ ކޮންސަލްޓަންޓާއެކު ބޭއްވި ބައްދަލުވުމެއްގައި ސިޓީ ކައުންސިލުން ވެސް ބައިވެރިވި އެވެ. މުއިއްޒު ވިދާޅުވީ މިހާރު ހުށަހަޅާފައިވާ ޕްލޭނާ އެއްގޮތަށް އެކަން ކުރިއަށް ގެންދަން ތާއީދު ނުކުރާކަން އަންގާފައިވާ ކަމަށެވެ. މުއިއްޒު ވިދާޅުވީ، މަސައްކަތައް އެއްވެސް އަލިމަގެއް ނުފެނިއްޖެނަމަ ކައުންސިލުން ކޯޓަށް ގޮސްގެންވެސް އިންސާފުވެރިގޮތެއް މާލޭގެ ރައްޔިތުންނަށް ހޯދައިދިނުމަށް ނިންމާފައިވާކަމަށެވެ.

މުއިއްޒު ވިދާޅުވީ ގުޅިފަޅުގައި ވިޔަފާރި ބަނދަރެއް ހިންގުމަކީ، އެތަނާ ނުބައްދަލު ކަމެކެވެ. އޭގެ ސަބަބަކީ އެވަރުގެ ޕޯޓަކަށް އެތަން އެކަށީގެންނުވުމެވެ. މުއިއްޒު ގަބޫލުކުރައްވާ ގޮތުގައި، ބްރިޖުން ގުޅާލައިފައި އޮންނަ ގުޅިފަޅަކީ މާލޭގެ މީހުން ދިރިއުޅެން އެންމެ ރަނގަޅު ތަނެވެ.