ޝާހިދުގެ ކާމިޔާބީ: ޚަރިޖީ ދުނިޔޭގައި ރާއްޖެ އަށް ލިބުނު ކާމިޔާބީއެއް!

ރާއްޖެ ހިމެނީ އާބާދީ ގޮތުން އެންމެ ކުދި ގައުމުތަކުގެ ތެރޭގައެވެ. ނަމަވެސް މީގެ ކުރިން ވެސް ބައިނަލްއަގުވާމީ ދުނިޔޭގައި ރާއްޖޭގެ އަޑު ބައެއް ކަންކަމުގައި ބޮޑެތި ބިޔަ ގައުމުތަކަށް ވުރެ ގަދައެވެ. ހާއްސަކޮށް ތިމާވެށީގެ މައްސަލަތަކާއި ކުދި ޖަޒީރާ ގައުމުތަކަށް ދިމާވާ އެކި މައްސަލަތަކުގައި ބޮޑެތި ބައެއް ގައުމުތަކަށް ވުރެ ރާއްޖޭގެ އަޑު ގަދައެވެ. އަދި ބޮޑެތި ބައެއް މައްސަލަތަކުގައި ރާއްޖޭގެ ވާހަކަތަކަށް ލިބޭ ސަމާލުކަން ވެސް ވަރަށް ބޮޑެވެ. ހޯމަ ދުވަހުގެ ރެއަކީ އެފަދަ ކާމިޔާބީއެއް ރާއްޖެ އަށް ލިބުނު ރެއެކެވެ. އދ. ގެ އާންމު މަޖިލީހުގެ ރައީސްގެ މަގާމު ރާއްޖޭގެ ޚާރިޖީ ވަޒީރު އަބްދުﷲ ޝާހިދު ކާމިޔާބުކުރެއްވުމަކީ މިހާތަނަށް ލިބުނު އެންމެ ބޮޑު ކާމިޔާބީއެވެ.

“މިއަދު ދުނިޔޭގެ ހުރިހާ ގައުމުތަކެއްގެ އިތުބާރާއި ޔަގީންކަން ދިވެހިރާއްޖެ އަށް ލިބިގެން ދިއުމުން، ސާބިތުވެގެން މި ދިޔައީ، މުޅި ދުނިޔެ، މިއަދު ރާއްޖެ ބަލައިގެންފައިވާކަން،” އެމެރިކާގެ ނިއު ޔޯކްގައި ބޭއްވި ޖަލްސާގައި ދިވެހި ބަހުން ވާހަކަ ދައްކަވަމުން ޝާހިދު ވިދާޅުވިއެވެ.

advertisement

މިއީ ތާރީހްގައި ވެސް އދ. ގެ މިހާ އިސް މަގާމަކަށް ދިވެއްސަކު އިންތިޚާބުވި ފުރަތަމަ ފަހަރެވެ. ސެޕްޓެމްބަރު މަހު އދ.ގެ އާންމު މަޖިލީހުގެ ދައުރުގެ ރިޔާސަތު ބަލަހައްޓާނެ ފަރާތެއް ކަނޑައެޅުމަށް ނެގި ވޯޓުގައި 191 ގައުމަކުން ވޯޓު ދިން އިރު 143 ގައުމެއްގެ ތާއީދު ޝާހިދު ހޯއްދެވުމަކީ ރާއްޖޭގެ ޚާރިޖީ ސިޔާސަތު ބޭރު ދުނިޔެއިން ބަލައިގަންނަ ކަމުގެ ފުރިހަމަ ހެއްކެކެވެ. އަދި ގައުމުތަކާ ގުޅުން ބަދަހިކުރުމަށް ސަރުކާރުން ކުރަމުން އަންނަ މަސައްކަތް ކާމިޔާބު ކަމުގެ ފުރިހަމަ ހެއްކެކެވެ. ޝާހިދު ކާމިޔާބު ހޯއްދެވީ އަފްޣާނިސްތާނުގެ ކުރީގެ ފޮރިން މިނިސްޓަރު ޑރ. ރަމްލައި ރަސޫލްއާ ވާދަކުރައްވައެވެ.

ރައީސް އިބްރާހީމް މުހައްމަދު ސޯލިހް ވެރިކަމާ ހަވާލުވެ ވަޑައިގެންނެވި އިރު ބައިނަލްއަގުވާމީ ދުނިޔޭގައި ރާއްޖެ އޮތީ ވަރަށް ބޮޑަށް އެކަހެރިވެފައެވެ. ހާއްސަކޮށް ކުރީގެ ރައީސް އަބްދުﷲ ޔާމީން ގެންގުޅުއްވި ބައެއް ސިޔާސަތުތަކުގެ ސަބަބުންނާއި ދާޚިލީ ކޯޅުންތަކުގެ ސަބަބުން ޚާރިޖީ ގުޅުންތައް ވެސް އޮތީ ބޮއްސުންލާފައެވެ. އެ ގޮތުން ސައުދީ އަރަބިއްޔާގެ ހިތް ރުއްސުމަށް ކުރީގެ ސަރުކާރުން ކުރި މަސައްކަތުގެ ތެރެއިން ގަތަރާ ގުޅުން ކަނޑައިލުމާއި ރާއްޖޭގެ ބައެއް ކަންކަމަށް ފާޑުކިޔާތީ ކޮމަންވެލްތުން ވަކިވުމާއި އީޔޫއާ ގުޅުން ކެނޑުމާއި ޗައިނާގެ މުށުތެރޭގައި ފިތި ބައެއް އެހެން ގައުމުތަކާ ވެސް ރާއްޖެ ވަރަށް ބޮޑަށް ފެއަށް ޖެހިފައި ވެއެވެ. ނަތީޖާއަކަށްވީ ބައިނަލްއަގުވާމީ ދުނިޔޭގައި ރާއްޖޭގެ އަޑު މަޑުވުމެވެ. އަދި މަގުތައް ބަންދުވުމެވެ. ނަމަވެސް އާ ސަރުކާރުން އެ މަންޒަރު މި ވަނީ މުޅިން ބަދަލުކޮށްލާފައެވެ.

އަބްދުﷲ ޝާހިދުގެ މިންނެތް މަސައްކަތް ހާއްސަ ގޮތެއްގައި ފާހަގަކުރަންޖެހެއެވެ. މީގެ ކުރިން ވެސް ޚާރިޖީ ވަޒީރުކަން ކުރެއްވުމާއި ޚާރިޖިއްޔާގެ ތެރެއިން ގިނަ ތަޖުރިބާތަކެއް ލިބިވަޑައިގެން ހުންނެވުމުން ގައުމުތަކާ ގުޅުން އިޔާދަކުރުމަށް މާ ގިނަ ދުވަހެއް ބޭނުމެއް ނުވިއެވެ. ކުރިއަށް ވުރެ ވެސް އެތައް ގޮތަކުން ބޭރު ދުނިޔެއާއި ރާއްޖެއާ ދެމެދު އޮތް ގުޅުންތައް ބަދަހިވެގެން ދާތަން އަންނަނީ ފެންނަމުންނެވެ. ހާއްސަކޮށް ކޮވިޑްގެ މި ބަލިމަޑުކަމުގެ ތެރޭގައި އެތައް ގައުމަކަށް ނުވެ ހުރި ކަންކަން ރާއްޖެ އަށް މަގުފަހިވެގެން ދިއުމުގެ މައިގަނޑު ސަބަބީ ޚާރިޖިއްޔާގެ މަސައްކަތެކެވެ. އަބްދުﷲ ޝާހިދުގެ މަސައްކަތްޕުޅެވެ. އެ ގޮތުން ވެކްސިން ހޯދުމުގައި ރާއްޖެ އިން ވަނީ ބޮޑު ކާމިޔާބީއެއް ހާސިލްކޮށްފައެވެ. އާބާދީގެ ނިސްބަތުން ކޮވިޑް ވެކްސިންގެ ފުރަތަމަ ޑޯޒް އެންމެ ގިނައިން ދީފައިވާ ގައުމަކީ ރާއްޖެއެވެ. ރާއްޖޭގެ އާބާދީގެ 70 ޕަސެންޓަށް ވަނީ ކޮވިޑް ވެކްޝިންގެ ފުރަތަމަ ޑޯޒް ދީފައެވެ. މީގެ އިތުރުން ހިލޭ އެހީ ހޯދުމުގައި ވެސް ބޮޑު ކާމިޔާބީއެއް ލިބިފައި ވެއެވެ. އަދި އަންނަނީ ހޯދަމުންނެވެ.

އދ.ގެ އާންމު މަޖިލީހުގެ ރައީސްކަން ރާއްޖެ އަށް ލިބުމަކީ މުސްތަގުބަލުގައި ގިނަ ފައިދާތަކެއް ކުރާނެ ކަމެކެވެ. މަހެއްހާ ދުވަހު ނިއު ޔޯކްގައި ހުންނެވުމުން ޝާހިދަށް ބައެއް ފަރާތްތަކުން ފާޑު ވިދާޅުވި ނަމަވެސް ހަގީގަތުގައި ކެމްޕެއިންގެ މަސައްކަތުގެ ތެރެއިން އެމަނިކުފާނު ވަނީ ކޮވިޑްގެ މިހާލަތުން އަރައިގަތުމުގައި ގިނަގުނަ މަސައްކަތްތަކެއް ވެސް ކުރައްވާފައެވެ. އެ ގޮތުން އެމެރިކާ އިން އެންމެ ފުރަތަމަ ބޭރުގެ ގައުމުތަކަށް ވެކްސިން ފޯރުކޮށްދޭ ގައުމުތަކުގެ ލިސްޓްގެ ކުރީގައި ރާއްޖެ ހިމެނުމާއި ހިލޭ އެހީ ހޯއްދެވުން ފާހަގަކޮށްލެވެއެވެ. މި ނޫން ވެސް އެތައް ކަމެއް އެ މަނިކުފާނާއި ޚާރިޖިއްޔާގެ ތެރެއިން ވަނީ ރާއްޖެ އަށް މަގުފަހިކޮށްދީފައެވެ.

ރާއްޖެ ފަދަ އާބާދީ ކުޑަ އަދި ވަސީލަތްތައް މަދު ގައުމަކުން މިފަދަ މަގާމަކަށް ވާދަކުރުމަކީ ވެސް ގިނަ ބަޔަކަށް ހައިރާންކަން ލިބިގެންދިޔަ ކެމެކެވެ. ނަމަވެސް އަވަށްޓެރި ގައުމުތަކުގެ އެހީތެރިކަމާ އެކު ހާއްސަކޮށް ރާއްޖޭގެ އެކުވެރި ގާތް ގިނަ ގައުމުތަކެއްގެ އެހީތެރިކަމާ އެކު މިއަދު މިވަނީ އާބާދީގެ ގޮތުން ކިތަންމެ ކުޑަޔަސް ދިވެހި ރާއްޖެއަކީ ވެސް ބައިނަލްއަގުވާމީ ދުނިޔޭގައި އެހެން ގައުމުތަކަށް ވަކި ދޫކުރާނެ ގައުމެއް ނޫންކަން ސާބިތުކޮށްދީފައެވެ. މިކަން ހާސިލްވެފައި މިވަނީ އެންމެ ގައުމެއް ދެ ގައުމެއްގެ ރުހުން ހޯދައިގެނެއް ނޫނެވެ. ގައުމުތަކުގެ ހައްގުގައި ހާއްސަކޮށް ކުދި ޖަޒީރާ ގައުމުތަކުގެ ހައްގުގައި އާއި ތިމާވެށީގެ މައްސަލަތަކުގައި ރާއްޖެއިން ސާބިތުކަމާ އެކު މަސައްކަތް ކޮށްދޭނެ ކަމުގެ ޔަގީންކަން އެ ގައުމުތަކަށް ދީގެންނެވެ. އެ ގައުމުތަކުން އެކަން ގަބޫލުކުރީ ރާއްޖޭގެ ޚާރިޖީ ސިޔާސަތާ މެދު ހިތްހަމަޖެހޭތީއެވެ. ހާއްސަކޮށް ފާއިތުވި ދެ އަހަރާއި ބައިގެ ތެރޭގައި ރާއްޖެއިން ކޮށްފައިވާ މަސައްކަތުގެ ސަބަބުންނެވެ. މިއީ އާދައިގެ ކާމިޔާބީއެއް ނޫނެވެ.